აჭარის ფინანთა და ეკონომიკის მინისტრის, ჯაბა ფუტაკარაძის განცხადებით, ბათუმის ბულვარის დირექტორის გათავისუფლების მიზეზი მისი საჯარო განცხადებები არ გამხდარა.

"ბათუმის ბულვარის დირექტორი გათავისუფლდა სახელმწიფო აუდიტის სამსახურის დასკვნის საფუძველზე, საიდანაც ირკვევა, რომ განხორციელდა არამართლზომიერი ქმედება — ბიუჯეტის სახსრების არამიზნობრივი ხარჯვა. მნიშვნელოვანია, რომ ეს გადაწყვეტილება არ უკავშირდება ბულვარის ყოფილი დირექტორის მიერ გაკეთებულ საჯარო განცხადებებს. აქვე უნდა აღვნიშნო, რომ რჩება შთაბეჭდილება, რომ მან ეს განცხადებები გააკეთა საზოგადოებაში გარკვეული იმუნიტეტის შექმნის მიზნით. არსებული დასკვნის საფუძველზე აღძრულია სასამართლო საქმე და მიმდინარეობს ამ საქმესთან დაკავშირებით შესაბამისი ორგანოების მიერ ყველა კანონით განხორციელებული საქმიანობა", — განაცხადა მან.

ბათუმის ბულვარის დირექტორი ამბობს, რომ სამსახურიდან გაათავისუფლეს. მან On.ge-სთან განაცხადა, რომ თანამდებობიდან გათავისუფლება საკრებულოში მის გამოსვლას უკავშირდება. ჯინჭარაძის თქმით, სამსახურიდან გაშვების მიზეზად აჭარის მთავრობაში სახელმწიფო აუდიტის ანგარიშში დარღვევებს ასახელებენ, რაზეც ის ამბობს, რომ ადგილი მხოლოდ ტექნიკურ შეცდომას ჰქონდა. ჯინჭარაძე აღნიშნავს, რომ ეს არ არის ის საფუძველი, რის გამოც ის თანამდებობიდან მოხსნეს.

"რა თქმა უნდა, გავასაჩივრებ. ქალაქს სჭირდება გადარჩენა. არც ოპოზიციაში ვაპირებ წასვლას და არც პოლიტიკაში", — განაცხადა ჯინჭარაძემ On.ge-სთან.

ჯინჭარაძის თანამდებობიდან გათავისუფლებასთან დაკავშირებით On.ge აჭარის მთავრობის პრესსამსახურს დაუკავშირდა. ისინი კომენტარს ამ დრომდე არ აკეთებენ.

ბათუმის ბულვარის დირექტორმა, ირაკლი ჯინჭარაძემ 30 მარტს განაცხადა, რომ წინააღმდეგია ზღვის სანაპირო კერძო საკუთრებაში გადავიდეს. მისი თქმით, ბულვარის არის საჯარო და ის უნდა იყოს ყველასთვის ხელმისაწვდომი.

მისივე თქმით, ბულვარის განაშენიანების დოკუმენტი აწესრიგებს მშენებლობებს და ეს დოკუმენტი იქნება ყველასთვის, "დახვეწილი და მოქნილი".

"მე წინააღმდეგი ვარ პლაჟების გადაცემის კერძო საკუთრებაში. პრაქტიკიდან გამომდინარე არც ერთმა მოგვიტანა შედეგი. ცუდი [შედეგი მოგვიტანა]. ვხედავთ რომ შუაგულ ძეგლში, ძველ ტერიტორიაზე აუზია შემოღობილი, უნდა ალიანსს ასევე პლაჟი მერიოტისათვის და უნდა სხვადასხვა კომპანიას.

ხვალ ჩვენ მოვალთ ისე, რომ ვერავინ ვერ შევალთ თუ არ გადავიხდით 50 და 100 ლარს. ეს შეუძლებელია. ბულვარი არის საჯარო სივრცე, ქვეყნის მთავარი საჯარო სივრცე და არა მარტო ქალაქის", — ამბობს ჯინჭარაძე.

ბათუმის საკრებულოში ბათუმი თაუერისთვის ზღვის პირას 3 380მ2 მიწის ნაკვეთის 15 წლით პირდაპირი განკარგვის წესით გადაცემას განიხილავენ. აღნიშნულ საკითხთა დაკავშირებით დეპუტატებისთვის კითხვების დასმა სურდათ მოქალაქეებს, რომლებიც ღია სხდომაზე დასწრებას ცდილობდნენ. თუმცა თავდაპირვლად მათ ამის საშუალება არ მისცეს, რაც ხმაური და დაპირისპირება მოჰყვა.

სხდომაზე შესვენება გამოცხადდა, რის შემდეგაც სამი მოქალაქე დარბაზში შეუშვეს. მათ ბულვარის ტერიტორიის გადაცემასთან დაკავშირებით თავიანთი უკმაყოფილება გამოთქვეს. ამჟამად კვლავ შესვენებაა გამოცხადებული.