ყოფილი მაღალჩინოსანის, ლევან მამალაძის განცხადებაზე ჟურნალისტების შესაძლო ლიკვიდაციის შესახებ შინაგან საქმეთა სამინისტრომ გამოძიება დაიწყო. მამალაძემ იმედის ეთერში აღნიშნა, რომ ექსპრეზიდენტი მიხეილ სააკაშვილი გეგმავს TV პირველის ჟურნალისტების, ნოდარ მელაძისა და მაკა ჩიხლაძის ლიკვიდაციას. გამოძიება სიხლის სამართლის კოდექსის 18-109 მუხლით დაიწყო, რაც განზრახ მკვლელობის მომზადებას გულისხმობს.

ნოდარ მელაძის განცხადებით, გამოძიებამ მათ მოწმეთა დაცვის პროგრამაში ჩასმა შესთავაზა. თუმცა, მისი თქმით, როცა უწყებას ჰკითხეს აპირებდნენ, თუ არა მათ დაკითხვას, რადგან აქვთ მოსაყოლი მმართველი პარტიის მხრიდან მუქარების შესახებ, პასუხად უთხრეს, რომ ამ ეტაპზე მათი გამოკითხვის საჭიროებას ვერ ხედავნ.

"დღეს დამიკავშირდნენ მას შემდეგ, რაც რამდენჯერმე გავაკეთე განცხადება იმის შესახებ, რომ თუ პოტენციურად ადამიანები სამთავრობო მედიის ეთერში ლაპარაკობენ იმის შესახებ, რომ იგეგმება ჩემი და ჩემი კოლეგის ლიკვიდაცია, მაშინ სად არის შინაგან საქმეთა სამინისტრო. გვითხრეს, რომ დაწყებული არის გამოძიება ჩემი და მაკა ჩიხლაძის სავარაუდო სიცოცხლის ხელყოფის ფაქტთან დაკავშირებით და ამ გამოძიების ფარგლებში მზად არიან, რომ ჩაგვსვან მოწმეთა დაცვის პროგრამაში და შემოგვთავაზონ სახელმწიფო დაცვა", — განაცხადა მელაძემ.

გამოძიების დაწყებაზე ინფორმაციის მიღებამდე მელაძემ აღნიშნა, რომ ჩნდება ეჭვი,რომ ხელისუფლებას თავად აქვს დაგეგმილი ანგარიშსწორება და ცილობს, ეს სხვას დააბრალოს. მისი თქმით, მსგავსი ინტერვიუები სამთავრობო მედიაში შემთხვევით არ ხდება.

"ჩვენი აზრით, სრულიად შემთხვევითი არ არის, როდესაც სამთავრობო მედიამ დაიწყო იმის პროპაგანდა, რომ იგეგმება გამომიძებელი ჟურნალისტების, მათ შორის, ჩემი მკვლელობა და თუ ამას განახორციელებს ვინმე, ეს არის ოპოზიციის დაგეგმილი. ასეთი ახალი ამბები და ვრცელი ინტერვიუები სამთავრობო მედიის ეთერში და მათ მიერ კონტროლირებად პრესაში შემთხვევით, რა თქმა უნდა, არ ჩნდება", — აღნიშნა მან.

ყოფილი დეპუტატი და ედუარდ შევარდნაძის პრეზიდენტობის დროინდელი ქვემო ქართლის რწმუნებული, ლევან მამალაძე ამტკიცებს, რომ საქართველოში ჟურნალისტების, ნოდარ მელაძისა და [მაკა] ჩიხლაძის მკვლელობა იგეგმება. იმედთან ინტერვიუში ის ამბობს, რომ დანაშაულს ექსპრეზიდენტი მიხეილ სააკაშვილი და ყოფილი იუსტიციის მინისტრი, ზურაბ ადეიშვილი გეგმავენ და ეს ინფორმაცია უკრაინული წყაროებისგან მიიღო. მისი თქმით, მოისმინა ჩანაწერები, თუმცა ეს მტკიცებულება ეთერში არ წარუდგენია.

"ეს არის ეს ბე უს ყოფილი თანამშრომლები, რომელთაც მე ვიცნობ და მათ აქვთ ჩემთან კონტაქტი. მათ აქვთ ტექნიკური საშუალება, რომ ასეთი ინფორმაცია მოიპოვონ. მათ იცოდნენ მე სადაც ვიყავი, გამოვიდნენ კონტაქტზე, მე ვნახე და მოვისმინე ეს მასალა. [..] ორი ნაწილისგან შედგება, ერთი არის სატელეფონო საუბარი და მეორე არის ვიდეოჩანაწერი, როცა სააკაშვილი ტელეფონზე საუბრობს", — განაცხადა მან.

ლევან მამალაძემ ქვეყანა ნაციონალური მოძრაობის ხელისუფლებაში მოსვლის შემდეგ დატოვა, რადგან მას ბრალი დასდეს ქრთამის გამოძალვაში და 17 წლით თავისუფლების აღკვეთა მიუსაჯეს. ის ამბობს, რომ სააკაშვილმა რეპრესიები მოუწყო.

კითხვაზე, ხომ არ არის ეს ინფორმაცია რეინკარნაციის და ქვეყანაში დაბრუნების მცდელობა, ის პასუხობს, რომ წლებია ამ თემებზე მუშაობს და არანაირი პოლიტიკური ინტერესი არ აქვს. მისივე თქმით, ერთადერთია, ვის მიმართაც სამართალი არ აღასრულა არც ყოფილმა და არც მოქმედმა ხელისუფლებამ.