ევროპული საქართველოს ერთ-ერთი წევრის, სერგი კაპანაძის განცხადებით, ნაციონალური მოძრაობის თავმჯდომარის, ნიკა მელიას დასაკავებლად ენმ-ს ოფისში “სპეცოპერაციის ჩატარება და ოპოზიციის ლიდერების აღება” მოუწევთ.

"ხელისუფლებამ უნდა თქვა, რა გეგმა აქვს. თუ ისინი აპირებენ მელია დაიჭირონ და ამ გზით მისი ნეიტრალიზება მოახდინონ, ჩვენ ვიქნებით აქ იმისთვის, რომ ნიკას დავუჭიროთ მხარი. მათ მაშინ მოუწევთ ამ ყველა ადამიანის აქ ყოფნის პირობებში, რაღაც სპეცოპერაციის ჩატარება და ამ ოპოზიციის ლიდერის აღება. რამდენად ამას გადაწყვეტენ, ვნახავთ ყველა", — განაცხადა მან.

მისივე თქმით, ნებისმიერი გადაწყვეტილება, რომელსაც დღეს სასამართლო მელიას საქმეზე მიიღებს, იქნება პოლიტიკური, რადგან მთლიანად ეს პროცესია "პოლიტიკური" და მას "სამართლებრივი საფუძველი არ გააჩნია".

კაპანაძე ევროკავშირის ელჩის საქართველოში, კარლ ჰარცელის განცხადებასაც გამოეხმაურა. მისი თქმით, "ძალიან მნიშვნელოვანია იმის გათვალისწინება, რაც ევროკავშირის ელჩმა თქვა".

"იმ პირობებში, როცა სასამართლო არაა დამოუკიდებელი და არსებობს ეჭვები მისი დამოუკიდებლობის მიმართ, გადაწყვეტილება, რომელიც შეიძლება იყოს მიღებული, შეიძლება იყოს ამ კრიზისი არა განმუხტავი, არამედ კიდევ უფრო მეტ კრიზისში შემყვანი", — განაცხადა კაპანაძემ.

დღეს ჰარცელმა თქვა, რომ სასამართლო სისტემის მიმართ უნდობლობა და პოლარიზაცია ქვეყანაში პოლიტიკურ სიტუაციას "ფეთქებადს" ხდის. ჰარცელმა ისიც აღნიშნა, რომ შიშობს, ამ საქმეს დიდი გავლენა ექნება ქართულ პოლიტიკურ გარემოზე, დღევანდელი მდგომარეობა კი პოლიტიკური დიალოგისკენ დაბრუნების შესაძლებლობას გაართულებს და უფრო გადასწევს მეხუთე რაუნდის თარიღს.

ქართულმა ოცნებამ პლენარულ სხდომაზე ნიკა მელიას იმუნიტეტი მეორედაც მოუხსნა, რითიც პროკურატურას ისევ მისცა მისი დაკავების უფლება. მმართველ გუნდში ამ განმარტებას არ იზიარებენ და ამბობენ, რომ მათ არა დაპატიმრების, არამედ პატიმრობის მოთხოვნის უფლება გასცეს და გადაწყვეტილება სასამართლომ უნდა მიიღოს.

ეს პირველი შემთხვევა არ არის, როდესაც მმართველი გუნდი პროკურატურას მელიას დაპატიმრების უფლებას აძლევს. 2019 წლის 26 ივნისს 91 ხმით, 0-ის წინააღმდეგ, ქართულმა ოცნებამ იგივე საკითხზე დადებითი გადაწყვეტილება მიიღო. მაშინაც მსჯელობის საგანი იყო ნიკა მელიას ბრალდება 20 ივნისის საქმეზე. კენჭისყრის დღეს ოპოზიციის სკამები ცარიელი იყო და მელია მმართველი გუნდის პირისპირ მარტო იჯდა. თუმცა ქართულ ოცნებაშიც არ ყოფილა ყველა "მომხრე". სამმა დეპუტატმა: მირიან წიკლაურმა, რომან კაკულიამ და ბექა ოდიშარიამ მაშინ ხმის მიცემისგან თავი შეიკავეს, მარიამ ჯაშმა კი კენჭისყრაში მონაწილეობა არ მიიღო.

მაშინ პროკურატურამ ქართული ოცნებისგან პატიმრობის უფლება მიიღო, სასამართლოსგან კი არა. მელიას გირაო და ელექტრონული სამაჯურის ტარება შეეფარდა, რომელიც ენმ-ის ლიდერმა ერთ-ერთ აქციაზე დემონსტრაციულად მოიხსნა, რასაც უწყებიდან მორიგი გირაოს გადახდის, გადაუხდელობის შემთხვევაში კი პატიმრობის მოთხოვნა მოყვა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ერთკვირიანი ვადა, რომელიც პროკურატურამ მელიას გირაოს გადასახდელად მისცა, ამოიწურა ისე, რომ ენმ-ს თავმჯდომარეს ეს მოთხოვნა არ დაუკმაყოფილებია. სწორედ ამიტომ, პროკურატურამ პარლამენტს მიმართა და ქართულმა ოცნებამ დადებითი გადაწყვეტილება მიიღო.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება. გამოძიება სისხლის სამართლის კოდექსის 225-ე მუხლის პირველი და მეორე ნაწილით მიმდინარეობს. ამ მუხლით 4-დან 9 წლამდე სისხლისსამართლებრივი პასუხისმგებლობა ძალადობრივი ჯგუფის ხელმძღვანელობისა და მასში მონაწილეობისთვის დგება.

პროკურატურა მელიასთვის პატიმრობას ითხოვდა, თუმცა 2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.