უკრაინის საგარეო საქმეთა სამინისტროს ინფორმაციით, ოფიციალური ვიზიტით საქართველოს პრემიერმინისტრი დენის შმიგალი ეწვევა, უკრაინაში კი საქართველოს ვიცე-პრემიერი და საგარეო საქმეთა მინისტრი, დავით ზალკალიანი ჩავა. განცხადებაში არ არის დაზუსტებული, როდის შედგება ვიზიტები, აღნიშნულია მხოლოდ ის, რომ უკრაინის საგარეო საქმეთა მინისტრის მოადგილემ და უკრაინაში საქართველოს საქმეთა დროებითმა რწმუნებულმა ამ საკითხებზე იმსჯელეს.

"მხარეებმა დასახეს გეგმები უახლოესი პერსპექტივისთვის, რომელთა შორის არის ვიცე-პრემიერისა და საგარეო საქმეთა მინისტრის, დავით ზალკალიანის ვიზიტი უკრაინაში, ეკონომიკური თანამშრომლობის საკითხებში ორმხრივი კომისიის სხდომა და უკრაინის მთავრობის ხელმძღვანელის, დენის შმიგალის საქართველოში ოფიციალური ვიზიტის ორგანიზება", — აცხადებენ უკრაინის საგარეო უწყებაში.

განცხადებაში, სახელწოდებით "უკრაინა და საქართველო სტრატეგიულ პარტნიორობას აძლიერებენ" განხილულია მიხეილ სააკაშვილის ირგვლივ განვითარებული მოვლენებიც. კერძოდ, უკრაინის საგარეო უწყება კიდევ ერთხელ ადასტურებს, რომ არ ერევა სხვა ქვეყნების საქმეებში და კონკრეტულ მოქალაქეთა განცხადებებმა ურთიერთობებზე გავლენა არ უნდა მოახდინოს. გარდა ამისა, უკრაინულმა მხარემ კიდევ ერთხელ მოუწოდა საქართველოს, რომ უზრუნველყოს სწრაფი და მიუკერძოებელი გამოძიება დაკავებული უკრაინელი მეზღვაურების საქმეზე. ქართველ დიპლომატს უკრაინის საგარეო უწყების ნოტა გადასცეს, სადაც დაფიქსირებულია მათი გათავისუფლების თხოვნა.

"საქართველო უკრაინის სტრატეგიული პარტნიორია. ჩვენთვის მნიშვნელოვანია, განვავითაროთ პოლიტიკური დიალოგი მაღალ და უმაღლეს დონეზე, გავაძლიეროთ ორმხრივი ურთიერთობები სხვადასხვა სფეროში, რაც უკრაინისა და საქართველოს ინტერესებსა და ჩვენს ევროპულ და ევროატლანტიკურ სწრაფვებს შეესაბამება", — განაცხადა უკრაინის საგარეო უწყების მინისტრის მოადგილემ.


8 თებერვალს ექსპრეზიდენტმა, მიხეილ სააკაშვილმა დაპოსტა, რომ დაუმორჩილებლობის აქცია არის "პირველი მერცხალი" იმისა, რაც აუცილებლად არის გასაკეთებელი ქეყანაში. მისი თქმით, მოსახლეობა არ დაემორჩილება შეზღუდვებს, ჯარიმებსა და სასამართლო გადაწყვეტილებებს, რომლებიც მხოლოდ მმართველი გუნდის სასარგებლოდაა.

9 თებერვალს, საგარეო საქმეთა სამინისტროში შეხვედრის შემდეგ, უკრაინის ელჩმა, იგორ დოლგოვმა განაცხადა, რომ სააკაშვილის მოწოდებები დაუმორჩილებლობაზე არ ეხმარება საქართველო-უკრაინის ორმხრივ ურთიერთობებს. ამავე დღეს, კრიტიკას სააკაშვილმა კრიტიკითვე უპასუხა და ელჩს "კორუმპირებულ", "სამარცხვინო" უწოდა. სააკაშვილის მტკიცებით, დოლგოვი უკრაინის ექსპრეზიდენტმა, პოროშენკომ ერთადერთ მიზნით "მის წინააღმდეგ" საბრძოლველად დანიშნა. მისივე თქმით, დოლგოვი აზიანებს უკრაინისა და საქართველოს იმიჯს პოსტსაბჭოთა ქვეყნებში.

უკრაინის საგარეო საქმეთა სამინისტრო საქართველოს ექსპრეზიდენტისა და უკრაინის რეფორმების ასოციაციის თავმჯდომარის, მიხეილ სააკაშვილის ბრალდებებს ელჩის, იგორ დოლგოვის მიმართ ემოციურსა და არაარგუმენტირებულს უწოდებს. უწყება აცხადებს, რომ სააკაშვილის განცხადებები შესაძლოა შეფასდეს, როგორც სტრატეგიული პარტნიორის, საქართველოს შიდა საქმეებში ჩარევა, რაც მიუღებელია.