როგორია ცხოვრება ჩრდილოეთ კორეაში? ნახეთ არალეგალური ფოტოები ჩაკეტილი ქვეყნიდან

ფოტოგრაფმა მაიკლ ჰუნიევიჩმა ლონდონიდან ჩრდილოეთ კორეაში ამოყო თავი. დიდი რისკის მიუხედავად, მან არალეგალური ფოტომასალა შეაგროვა და სამყაროს აჩვენა, როგორ ცხოვრობენ ადამიანები მსოფლიოს ერთ-ერთ ყველაზე უცნაურ სახელმწიფოში, ჩრდილოეთ კორეაში.

ჩამორთმეული პასპორტი

სასტუმროში მისვლისთანავე გიდმა ფოტოგრაფს პასპორტი ჩამოართვა და გააფრთხილა, რომ სასტუმროდან მარტო არ გასულიყო. რადგან პასპორტი არ გაქვთ, ავტოავარიის შემთხვევაში საავადმყოფოში ვერავინ მიხვდება, ვინ ხართ - ასეთი იყო ოფიციალური მიზეზი.

სასტუმრო Yanggakdo

ფოტოგრაფი სასტუმრო Yanggakdo-ში დაბინავდა. სასტუმრო მდინარეში, პატარა კუნძულზეა აშენებული და ტურისტებს ეკრძალებათ კუნძულის საკუთარი ნებით დატოვება. სასტუმროს ხუმრობით ალკატრასსაც უწოდებენ.

ფარული ვიდეოგადაღება სასტუმროს ნომერში

სასტუმროს ლიფტში მეხუთე სართულის ღილაკი უბრალოდ არ არსებობს. ვარაუდობენ, რომ მეხუთე სართულზე ტექნიკური ოთახებია, საიდანაც სასტუმროს ბინადრების ყველა ქმედება კონტროლდება. ვიდეო და აუდიო ზედამხედველობა ოთახებზეც ვრცელდება.

ხედავ მხოლოდ იმას, რაც მათ სურთ, რომ დაინახო

ფოტოგრაფი და მისი ჯგუფის წევრები ვალდებულნი იყვნენ, ქალაქში მხოლოდ გიდის თანხლებით გადაადგილებულიყვნენ. ავტობუსის მძღოლი, რომელიც ტურისტებს ქალაქს აჩვენებდა, სვლას ანელებდა, როცა ლამაზ უბანში ხვდებოდნენ. ამის საპირისპიროდ, მოძრაობა ჩქარდებოდა, როცა ღარიბი კვარტლები უნდა გაევლოთ. დაუშვებელი იყო, ტურისტებს ქალაქის ცუდი მხარე ენახათ ან გადაეღოთ.

აღელვებული მიმტანები

მიმტანები მუდმივად ღელავდნენ მომსახურების დროს. ყველა მოქალაქე დაძაბული იყო და ენას კბილს აჭერდა უცხოელებთან საუბრისას.

მუდმივი კონტროლი

აქ ყველგან ჯარისკაცები დგანან და მათი მთავარი ფუნქცია ყველა ადამიანის კონტროლია.

ცარიელი დახლები

რთულია, ვერ შეამჩნიო ცარიელი დახლები, რაც ეკონომიკის კოლაფსის ნიშანია. როგორც ჰუნიევიჩი აღნიშნავს, 1 კილოგრამი ვაშლი დაახლოებით 5 დოლარი ღირს. სიღარიბე და შიმშილი მილიონობით მაცხოვრებელს სტანჯავს.