20 ოქტომბერს ოსკაროსანმა მსახიობმა მეთიუ მაკკონაჰიმ თავისი ავტობიოგრაფია Greenlights (მწვანე შუქები) გამოაქვეყნა, სადაც მსახიობი ყვება, რომ მოზარდობის ასაკში არაერთხელ გახდა სექსუალური ძალადობის მსხვერპლი.

წიგნის პირველ ნახევარში მსახიობი სხვა მნიშვნელოვან საკითხებთან ერთად სექსუალური შევიწროების გამოცდილებას იხსენებს: როგორც მაკკონაჰი წერს, მისი პირველი სქესობრივი კავშირი თავისი სურვილით არ მომხდარა და ის შანტაჟის მსხვერპლი იყო.

"როცა პირველად მქონდა სექსი, ეს შანტაჟით მოხდა და მაშინ 15 წლის ვიყავი. მაშინ მეგონა, რომ ქორწილამდე სექსის გამო ჯოჯოხეთში მოვხვდებოდი, ახლა კი უბრალოდ ვიცი, რომ ასე სულაც არ არის", — წერს მაკკონაჰი მემუარებში.

მსახიობი წიგნში ასევე აღნიშნავს, რომ ეს ერთადერთი შემთხვევა არ იყო, როცა მას თავისი სურვილის წინააღმდეგ სექსუალური ხასიათის გამოცდილება ჰქონდა:

"18 წლისას ფურგონის საბარგულში უგონოდ ვიყავი, როცა კაცმა სექსუალურად იძალადა".

მეთიუ მაკკონაჰი თავის მემუარებთან ერთად.

ფოტო: MATTHEW MCCONAUGHEY / TWITTER

50 წლის მსახიობი სულ ახლახან გამოქვეყნებულ მემუარებში თავის ცხოვრების სხვადასხვა ეტაპსა და კონკრეტულ მომენტებზე მოგვითხრობს, რომელთაც ის სამ ფერად ყოფს: მწვანე, ყვითელი ან წითელი — მოვლენები, რომლებიც მას ნაბიჯის გადადგმაში ეხმარებოდა, აყოვნებდა ან აჩერებდა.

ადრეულ წლებთან ერთად ის იხსენებს თავისი მშობლების ურთიერთობას, კარიერულ გზას, ქორწინების დეტალებს კამილა ალვესთან და საკუთარ ცხოვრების ფილოსოფიასაც უზიარებს მკითხველს. ყველა განვლილი გამოცდილების მიუხედავად, მეთიუ მაკკონაჰი წერს, რომ ის თავს მსხვერპლად მაინც არ აღიქვამს:

"თავი მსხვერპლად არასდროს მიგვრძნია. ძალიან ბევრი მიზეზი მაქვს იმის დასაჯერებლად, რომ სამყარო მუდამ ჩემს გაბედნიერებას გეგმავს".