USAID საქართველოს მხარდაჭერით და ილიას სახელმწიფო უნივერსიტეტის ორგანიზებით მკვლევრებისა და კვლევითი ორგანიზაციების პროფესიული ეთიკის კოდექსი შემუშავდა. პროექტის ტექნიკური მხარდამჭერია USAID/HICD 2020.

პროფესიული კოდექსის განხილვა დღეს მოეწყო და პროცესში განხილვაში მონაწილეობას იღებდნენ ილიას სახელმწიფო უნივერსიტეტის რექტორი, გიგა ზედანია, ამერიკის შეერთებული შტატების ელჩი, კელი დეგნანი, ბრიტანეთის ელჩის მოადგილე, კლეარ ოლბლესი, ასევე USAID საქართველოს მისიის წარმომადგენლები, კვლევითი ორგანიზაციები, მკვლევრები და პროფესორ-მასწავლებლები.

კელი დეგნანის აზრით, საზოგადოებრივი აზრის კვლევები მოქალაქეებს საკუთარი გასაჭირის დაფიქსირების საშუალებას ყველაზე უკეთ აძლევს. ის იმედოვნებს, რომ შეიქმნება ასოციაცია, რომელიც კვლევების შესახებ ცნობიერების გაზრდას შეუწყობს ხელს.

"ძალიან მნიშვნელოვანია საზოგადოებრივი აზრის კვლევა და ის შედეგები, რაც გასული თვეების მუშაობამ მოიტანა, რადგან მოქალაქეები, რომელთაც არ აქვთ შესაძლებლობა საკუთარი მოსაზრებები ან საჭიროებები ხმამაღლა დააფიქსირონ, კვლევების საშუალებით ახერხებენ ამას. ამასთანავე, გაწეული მუშაობა საჯარო პირებისთვის, პოლიტიკოსებისთვის არის მნიშვნელოვანი ინსტრუმენტი, რათა მათ ისეთი ღონისძიებები გაატარონ, რაც საზოგადოების მოთხოვნებს პასუხობს. კოდექსი აწესებს სტანდარტებს და პრინციპებს, რომლებიც მნიშვნელოვანი იქნება კვლევითი ორგანიზაციებისთვის, ასევე, დიდი იმედი მაქვს, შეიქმნება ასოციაცია, რომელიც იმუშავებს კვლევების საკითხზე და მათ შესახებ ცნობიერებას გაზრდის", — აცხადებს კელი დეგნანი.

ილიას სახელმწიფო უნივერსიტეტის რექტორმა, გიგა ზედანიამ ასოციაციის შექმნა დაანონსა, რომელიც კვლევებთან დაკავშირებულ თემებზე რამდენიმე მიმართულებით იმუშავებს, მან ხარისხიანი კვლევითი ინსტიტუტების მნიშვნელობაზეც ისაუბრა.

"კოდექსს დაეფუძნება საზოგადოებრივი აზრის კვლევის ორგანიზაციების პროფესიული ასოციაცია, რომლის მიზანიც იქნება როგორც კვლევების ხარისხის ზრდა, ისე ეთიკური პრინციპების დაცვა. ეს არის ძალიან მნიშვნელოვანი რამ კვლევის და მეცნიერების განვითარებისთვის, ამასთან, დემოკრატიული მექანიზმების გაძლიერებისა და სამოქალაქო სექტორის განვითარებისთვის, რადგან პროფესიული ორგანიზაციები საზოგადოებას ძალიან აკლია". — განაცხადა გიგა ზედანიამ.

ილიას სახელმწიფო უნივერსიტეტი ასოციაციის მხარდაჭერას გააგრძელებს. უნივერსიტეტის მკვლევრის და ღონისძიების ფასილიტატორის, ზარინა ბურკაძის თქმით, კვლევითი ინსტიტუტების განვითარებას სხვადასხვა ხერხით შეუწყობენ ხელს, მათ შორის, მკვლევართა და მედიის წარმომადგენელთა გადამზადებით და პროფესიული განვითარების ხელშეწყობით.

"ჩვენ დავეხმარებით ასოციაციას გამართულ ფუნქციონირებაში და ჩვენს წვლილს შევიტანთ, რათა ყველა მკვლევარმა აღნიშნული ეთიკის კოდექსით იხელმძღვანელოს. პროცესი მოიაზრებს საგანმანათლებლო საქმიანობას, კონფერენციებს, ასევე პერსონალის გადამზადებას, როგორც მკვლევრების, ისე მედიის წარმომადგენლების, იმისათვის, რომ საზოგადოებრივი აზრის კვლევები ზუსტად აღიქვან და საზოგადოებას მიაწოდონ. ორიენტირებული ვიქნებით იმაზეც, რომ გვყვავდეს სამიზნე ჯგუფები, მათ შორის, ჟურნალისტები, მკვლევრები. დავეხმაროთ მათ გადამზადებაში და პროფესიულად გავაძლიეროთ, რათა დავიცვათ ისინი პოლიტიკური თუ სხვა ტიპის აქტორების მხრიდან თავდასხმისგან", — ამბობს ზარინა ბურკაძე.