მას შემდეგ, რაც რამდენიმე დღის წინ ცნობილმა ლიტერატორებმა ჯოან როულინგის "სიძულვილისგან" დასაცავი განცხადება გააკეთეს, 200-ზე მეტმა მწერალმა, გამომცემელმა და ჟურნალისტმა ღია წერილი გაავრცელა, სადაც ისინი ტრანსგენდერი და არაბინარული იდენტობის მქონე ადამიანებისადმი საკუთარ მხარდაჭერას გამოხატავენ.

წერილის იდეა, რომელიც აღწერილია, როგორც "ტრანსთემისა და არაბინარული იდენტობის მქონე ადამიანებისადმი გაგზავნილ სიყვარულის და სოლიდარობის შეტყობინებად", მწერლებს — კირენ მილვუდ ჰარგრეივსა და დეიზი ჯონსონს — ეკუთვნით, ხელმომწერთა შორის კი ჯუნო დოუსონი, ელიზაბეთ დეი, მაქს პორტერი, ნიკეშ შუკლა, სარა კოლინზი, ირენოსენ ოკოიე, მერი ჯინ ჩენი, ნოაზ დოლენი, ოლივია სუდიქი, შარლინ ტეო და პატრიკ ნესი არიან. წერილში აღნიშნულია, რომ "არაბინარული იდენტობის მქონე ადამიანთა სიცოცხლე ღირებულია, ტრანსგენდერი ქალები ქალები არიან, ტრანსგენდერი კაცები — კაცები, ტრანსთემის უფლებები კი ადამიანის უფლებებია".

"კულტურა არის და ყოველთვის უნდა იყოს საზოგადოებრივი ცვლილებებისთვის ბრძოლის ფრონტის ხაზზე, ამიტომ, როგორც მწერლები, რედაქტორები, ლიტერატურული აგენტები, ჟურნალისტები და გამომცემლები, ვაცნობიერებთ, რამდენად მნიშვნელოვანი როლი აკისრია ჩვენს ინდუსტრიას ტრანსგენდერი და არაბინარული იდენტობის მქონე ადამიანების მხარდაჭერასა და მათთვის კეთილდღეობის შექმნაში", — წერია წერილში.

ივლისის თვეში გამოქვეყნებულ ღია წერილში ცნობილმა მწერლებმა, რომელთა შორის როულინგი, მარგარეტ ეტვუდი და სალმან რუშდი არიან, "აზრის გამოთქმის" შეზღუდვა გააპროტესტეს.

ფოტო: AP, Getty, Tim Knox

ბრიტანელი მწერლისა და ჰარი პოტერის შემქმნელის, ჯოან როულინგის, განცხადებებმა, რომელიც ტრანსგენდერთა უფლებებს შეეხებოდა, განსაკუთრებით, შენიშვნამ, რომ "თუ სქესი ნამდვილი არაა, მაშინ მთელ მსოფლიოში მცხოვრები ქალების რეალობა იშლება", ბევრი გააღიზიანა, თუმცა მწერალს არაერთი დამცველი გამოუჩნდა. მას შემდეგ, რაც როულინგის ახალი დეტექტიური რომანი, Troubled Blood, გამოიცა, სადაც სერიული მკვლელი მსხვერპლების გასაბითურებლად ქალის სამოსშია გამოწყობილი, მწერალი ინტერნეტსივრცეში თავდასხმის მსხვერპლი გახდა და მას ტრანსფობიაში დასდეს ბრალი. მიუხედავად წიგნის გამოცემას მოყოლებული ფართო განხილვისა და პოლემიკისა, რომანი ბესტსელერი გახდა.

მწერლისადმი მიმართული სიძულვილის ტალღა ასევე ღია წერილით გააპროტესტა 58-მა მწერალმა, მათ შორის იენ მაკიუენმა, ლიონ შრივერმა, სიუზენ ჰილმა და ფილიპ ჰენშერმა. წერილში ხაზგასმულია, რომ შეურაცხყოფა, რომლის მსხვერპლიც როულინგი გახდა, "სოციალურ მედიაში არსებული ღვარძლიანი, ავტორიტარული და მიზოგინიური ტენდენციის გამოხატულებაა".

"როულინგი ყოველთვის გამოირჩეოდა ღირსეული და თანამგრძნობი ხასიათით", — ნათქვამია წერილში, რომელიც Sunday Times-ში გამოქვეყნდა, — "აქ ხელისმომწერნი ვიმედოვნებთ, რომ თუკი უფრო მეტი ადამიანი აიმაღლებს ხმას ონლაინსივრცეში ქალების შეურაცხყოფის სამიზნედ ქცევაზე, ასეთ დისკუსიაში ჩართვას ნაკლებად მიმზიდველად ან მომგებიანაც მაინც ვაქცევთ".

მიუხედავად იმისა, რომ ტრანსგენდერი და არაბინარული იდენტობის მქონე ადამიანების მხარდასაჭერ წერილში ჰარი პოტერის შემქმნელის სახელი მოხსენიებული არაა, მისი ხელისმომწერნი, რომელთა შორის რედაქტორებს, ჟურნალისტებსა და ლიტერატორებს ვხვდებით, ქვიარ ადამიანებისადმი თანაგრძნობის მნიშვნელობას ხაზს უსვამენ.

"ჩვენ თქვენ გვერდით ვდგავართ, თქვენი გვესმის, თქვენ გხედავთ, თქვენ გცნობთ და გვიყვარხართ. სამყარო თქვენით უკეთესია", — აღნიშნულია წერილში.