პოეტი და პერფორმერი, ფსევდონიმით ანდრო დადიანი, აცხადებს, რომ მისი ნამუშევარი თეატრისა და კინოს უნივერსიტეტში გამართულ ფესტივალზე ცენზურის გამო ჩამოხსნეს.

ფესტივალი ლიტერატურა სოლიდარობისთვის პანდემიის შედეგად უხელფასოდ დარჩენილ არტისტებისთვის სოლიდარობის გამოცხადების მიზნით ტარდებოდა.

როგორც დადიანმა On.ge-ს უთხრა, თეატრალურმა უნივერსიტეტმა მისი ნამუშევრის, სახელწოდებით "შე *ლეო", სასწრაფოდ ჩამოხსნა მოითხოვა, მიუხედავად ფესტივალის ორგანიზატორების მიერ ახსნა-განმარტებისა, რომ ნამუშევარზე ასახული სიტყვა დღევანდელი ცხოვრების ნაწილია და არ შეიძლება ცენზურა დაედოს.

"არ შეიძლება ცენზურა დაედოს ხელოვნების ნიმუშს იმის მიხედვით, რომ ვიღაცის ესთეტიკურ კრიტერიუმს მიღმაა, მით უფრო, რომ ეს სივრცე სახელოვნებო დაწესებულებაა და ხელოვანის თავისუფლების შესახებ არ უნდა ესწავლებოდეთ. ეს ნაქარგი ორი სიტყვა, 4 თვე იკემსებოდა და თავისი უხამსობით, პორნოგრაფიული პირდაპირობით, ქუჩური და გადაგვარებული გრამატიკული ფორმით გამოხატავს იმას, რაც ჩვენს ირგვლივაა", — ხსნის ანდრო დადიანი.

ის On.ge-ს ნამუშევრის ინსპირაციაზეც ესაუბრა და გვითხრა, რომ მის შეყვარებულს ეძღვნება.

"'ნამუშევარი ჩემს შეყვარებულს, დავითს ეძღვნება, რომელთანაც პრობლემები მქონდა შარშან, როცა ამ ტილოს ვქარგავდი, წელს იმავე პრობლემებმა უფრო ფესვგადგმულმა იჩინეს თავი და ეს დაგროვილი წყენა მინდოდა მისთვის მიმეწვდინა. როცა ფესტივალმა ''ლიტერატურა სოლიდარობისთვის'' შემომთავაზა რაიმე გამეტანა გამოსაფენად სხვა ნამუშევრებზე არც მიფიქრია დიდხანს", — განაცხადა ანდრო დადიანმა.

ავტორის თქმით, გარდა პირადი ემოციებისა, ამ ნამუშევრით ის გარკვეულ მესიჯებს საზოგადოებასაც უგზავნის და ამბობს, რომ ეს ერთგვარად მიმართვაა სოციუმთან.

"ეს ცენზურა მოულოდნელი არ იყო, რადგან ირგვლივ ყველაფერი კვლავწარმოებიკენ და ტავტოლოგიისკენ გვიბიძგებს. იმედი არაა, რომ შემოქმედებითი სიმართლე, წამიერი გაელვების გარდა, სადმე ღირსებად გამოცხადდება. ამ ნორმად ქცეულ სიმახინჯეს და მის გამამყარებლებსაც მიემართება ეს ფრაზა. როგორმე უნდა გავარღვიოთ ეს ბოროტი წრე, სიტყვებს თავისი ენერგეტიკა აქვთ, თუ სიტყვა განიცდება ე.ი. ის ჯერ გარემოში იყო და მერე გარდაიქმნა სიტყვად და მის ჩახშობაზე ფიქრს აზრი არ აქვს და თუკი მაინც შეეცდება ვინმე ამის გაკეთებას, უნდა იცოდეს, რომ ეს ფაშიზმია", — აცხადებს დადიანი.

On.ge დაუკავშირდა ფესტივალის ორგანიზატორს, რომელიც ამბობს, რომ ნამუშევრის ჩამოხსნის გადაწყვეტილება უნივერსიტეტის წარმომადგენლების თხოვნით მიიღო.

"უნივერსიტეტის თხოვნით მივიღე გადაწყვეტილება, რომ ჩამომეხსნა ნამუშევარი, რადგან მათ თვიანთი ფორმატი აქვთ, თავიანთი წესები აქვთ. გამომდინარე იქიდან, რომ საუნივერსიტეტო სივრცე სრულიად უსასყიდლოდ 4 დღის განმავლობაში დამიდგა გვერდით, არტისტთან შეთანხმებითაც ჩამოვხსენით ეს ნახატი და ვისაუბრეთ ყველანაირი ინციდენტების გარეშე", — ამბობს თაკო შუკაკიძე.

ის ასევე აცხადებს, რომ მისთვის როგორც ანდრო დადიანის, ისე უნივერსიტეტის პოზიცია გასაგებია.

"სივრცის პოზიციაც და არტისტის პოზიციაც ჩემთვის გასაგებია. ორივეს ჩემი წილი პატივისცემა აქვს... მესმის მე ანდროსი. სხვა სივრცეში შეიძლება ჩვეულებრივად გამოვფინოთ, ალბათ, უფრო მეტად სამუზეუმო სივრცეში", — განმარტავს ის.