გუშინ, 6 ივლისს, ოსკაროსანი იტალიელი კომპოზიტორი ენიო მორიკონე გარდაიცვალა, რომელმაც თავისი მუსიკით უამრავი ხელოვანი შთააგონა, დაწყებული ფილმების კომპოზიტორებით, გაგრძელებული სხვა სტილებისა თუ ჟანრების წარმომადგენლებით.

მის გარდაცვალებას Facebook-ზე პოსტი მიუძღვნა გერმანელმა კომპოზიტორმა ჰანს ციმერმა, რომელიც ბავშვობიდანვე ძლიერ შთაგონებული იყო ლეგენდარული იტალიელის ნამუშევრებით, განსაკუთრებით მორიკონეს მიერ Once Upon a Time in the West-ისთვის დაწერილი მუსიკით, რომელმაც თავის დროზე ციმერს ფილმის კომპოზიტორობა გადააწყვეტინა.

"ენიო.

პირველად რომ მოვისმინე მისი მუსიკა, პირველივე ნოტმა მთლიანად მომიცვა და აღარ გამიშვა. არასდროს გადამიწყვეტია ფილმის კომპოზიტორობა. ეს ჩემ ნაცვლად ენიომ და სერჟიო ლეონემ გააკეთეს, როცა თავიანთი მაგიით ტკბობის საშუალება მომცეს. ენიომ მასწავლა, რომ ყველაზე მარტივი, სუფთა და წრფელი მელოდია ყველაზე რთული დასაწერია. მასწავლა, რომ ეს არც უნდა იყოს მარტივი და რომ ჩვენ დიად მისიას ვასრულებთ, რომელსაც სერიოზულად და მოკრძალებით უნდა მივუდგეთ მუსიკის წერისას.

და რომ ჩვენი მოვალეობაა, ვიყოთ რეჟისორის საუკეთესო მეგობარი და შთაგონება.

კარგი დირიჟორი ორკესტრთან ერთად სუნთქავს.

ახლა თუ მის კომპოზიციებს მოუსმენთ, ჯერ კიდევ გაიგონებთ მის სუნთქვას... შესაძლოა, ვერ დაინახოთ... მაგრამ ყოველთვის გაიგონებთ...

ჩაო, მაესტრო!" — დაწერა ციმერმა.

ნახეთ, როგორ ემშვიდობება მსოფლიო ლეგენდარულ კომპოზიტორს: