Blush თქვენს ნამუშევრებში ლამაზი ილუსტრაციების დამატების შესაძლებლობას გაძლევთ. სხვადასხვა მხატვრის მიერ გაკეთებული ილუსტრაციები შესაძლოა თქვენი ნამუშევრის ნაწილად აქციოთ და მეტი უნიკალურობისთვის ისინი სურვილისამებრ შეცვალოთ კიდეც.

Blush-ის იდეა მის შემქმნელებს ზუსტად იზოლაციის დროს გაუჩნდათ და იგი უკვე ნებისმიერი მსურველისთვის ხელმისაწვდომია.

ყველა ილუსტრაცია თემატურად არის დახარისხებული, რაც სასურველი ილუსტრაციის ძიების პროცესს ჯეროვნად ამარტივებს. გარდა ამისა, თქვენ შეგიძლიათ ისარგებლოთ სხვადასხვა მომხმარებლების კოლექციებით, რომლებიც მათ პორტფოლიოში მოიპოვება.

ნებისმიერი ილუსტრაციის სასურველი ფორმით ცვლილებისას თქვენ არ კარგავთ მის მნიშვნელობას და მას უფრო უნიკალურს ხდით. ფლაგინის საშუალებით შეგიძლიათ შექმნათ ილუსტრაცია და ელვის სისწრაფით დაარედაქტიროთ ის ფერებისა და ფორმების უსასრულო კომბინაციების გამოყენებით.

რაც ყველაზე მთავარია, Blush ნებისმიერ ილუსტრაციას და მათი რედაქტირების საშუალებას სრულიად უფასოდ გთავაზობთ მიუხედავად იმისა, იყენებთ თუ არა სერვისს პირადი თუ კომერციული მიზნებისთვის. ილუსტრაციების რედაქტირებისა და მათი გამოყენებისთვის საკმარისია რამდენიმე კლიკით პირადი ანგარიში შექმნათ.

იმისთვის, რომ გამოიყენოთ ილუსტრაციები საკმარისია დარეგისტრირდეთ Blush.design-ზე, მარჯვენა ზედა კუთხეში გაიაროთ რეგისტრაცია (Sign Up). ამის შემდეგ შეგიძლიათ აირჩიოთ სასურველი თემატიკის ილუსტრაცია და თქვენი სურვილით შეურჩიოთ ობიექტებს ფერები და ფორმები, ვარცხნილობა, ტანსაცმელი, დგომისა თუ ჯდომის ფორმა და სხვა მრავალი.

გარდა ამისა ილუსტრაციების რედაქტორს აქვს Randomize ფუნქცია, რაც შემთხვევითობის პრინციპით თავად შეარჩევს ცვლილებებს. ილუსტრაციაზე თითოეული ობიექტი ცალ-ცალკე რედაქტირდება. პროცესი იმდენად მარტივი და გასაგებია, რომ მე პირველივე წუთებიდან, ზედმეტი ძიების გარეშე მივიღე სასურველი ილუსტრაცია, რომელსაც აქვე გაჩვენებთ.