TV პირველის ტელეწამყვანი, ნინო ჟიჟილაშვილი ამბობს, რომ საინფორმაციო სამსახურის განვითარების მიმართულებით მისი და არხის ხელმძღვანელობის ხედვები ერთმანეთს არ დაემთხვა. ამის შესახებ მან On.ge-ს წერილობითი განუცხადა.

"კონკრეტულ საკითხებზე ვერ შევთანხმდით. ამიტომ მოგვიხდა ამ სეგმენტში დაშორება. გუნდი, რომელთან ერთადაც TV პირველში მოსვლის დღიდან ვმუშაობ, ახლა ტოკშოუს მიმართულებას დავუთმობთ მთელ ენერგიას.

განსაკუთრებულ წარმატებას ვუსურვებ ამ არხის ნიუსის ახალგაზრდა შემადგენლობას — პრინციპულს, საქმიანს და ღირსეულს, რომელთან ერთადაც ჩვენ 2 თვეში შევძელით რთული და საზოგადოებისთვის ძალიან კრიზისული პერიოდი სარედაქციო შეცდომების გარეშე გაგვევლო და ნიუსის ყურებადობაც გაგვეზარდა. ყველამ, ვინც ამ გუნდს შეუერთდება უნდა იცოდეს, რომ დასჭირდება თავისუფლად გაზრდილ ჟურნალისტურ თაობასთან მუშაობის უნარები", — აღნიშნა ნინო ჟიჟილაშვილმა.

დღეს, პირველ მაისს ცნობილი გახდა, რომ ნინო ჟიჟილაშვილი TV პირველის საინფორმაციო სამსახურის უფროსი აღარ იქნება. საინფორმაციო სამსახურს არხის დირექტორი და ტელეწამყვანი, ინგა გრიგოლია უხელმძღვანელებს.

ნინო ჟიჟილაშვილი საინფორმაციო სამსახურის უფროსად თებერვლის ბოლოს დაინიშნა. მისი წასვლა სამსახურის უფროსობიდან დროში დაემთხვა TV პირველში ნოდარ მელაძის გადასვლას.

ნოდარ მელაძემ მთავარი არხის საინფორმაციო სამსახურის უფროსის თანამდებობა აპრილში დატოვა. ის TV პირველზე მთავარი პროდიუსერი გახდა და ყოველკვირეულად საავტორო გადაცემასაც წაიყვანს. მელაძესთან ერთად TV პირველში მთავარი არხის რამდენიმე ჟურნალისტიც გადავიდა.