მოქალაქეთა ჯგუფი საზოგადოებას კორონავირუსის პანდემიასთან გასამკლავებლად 4 სამოქალაქო ინიციატივას სთავაზობს. ინიციატივებს შორისაა უფასო ინტერნეტი, ონლაინ სწავლების პლატფორმა, სახალისო თამაშები თუ სხვა.

სამოქალაქო მოძრაობა შენმოქმედის წევრები ამბობენ, რომ პროექტებში ჩართვა ყველას შეუძლია, როგორც ფინანსური და მატერიალური, ისე ადამიანური თუ ინტელექტუალური რესურსით.

"COVID 19-ის პირობებში აღარ არსებობს უმნიშვნელო გადაწყვეტილებები და ლოკალური პასუხისმგებლობები. ბოლო რამდენიმე თვემ გვაჩვენა, რომ ერთი ადამიანის ერთმა მოქმედებამ შეიძლება მთელი სამყარო შეცვალოს და ახალი გამოწვევების დაძლევა მხოლოდ ერთად და ერთობით არის შესაძლებელი", — ამბობენ მოძრაობის დამფუძნებლები.

სამოქალაქო მოძრაობის 4 ინიციატივაა: კომპიუტერი და ინტერნეტი ყველა ოჯახს, სწრაფი რეაგირების საგრანტო კონკურსი, კენწერო და Game of Homes. თითოეული მათგანი მოიცავს შემდეგს:

კომპიუტერი და ინტერნეტი ყველა ოჯახს

ორგანიზაციაში ამბობენ, რომ პირველ ეტაპზე, პრიორიტეტი მიენიჭებათ სოციალურად დაუცველ მრავალშვილიან ოჯახებს, მარტოხელა მშობლებსა და მასწავლებლებს, შემდგომ კი ინიციატივა საჭიროების მქონე სხვა მოქალაქეებზეც გავრცელდება.

ინიციატივაში ჩართვა შესაძლებელია როგორც დონაციის, ისე საჭიროების მქონეთა ნომინირების კუთხით. მსურველებს დეტალური ინფორმაციის მიღება ფონდი პროდემოსის გვერდზე შეუძლიათ.

სწრაფი რეაგირების საგრანტო კონკურსი

საგრანტო კონკურსი სამოქალაქო საზოგადოებისა და მედია ორგანიზაციებისათვის იქნება განკუთვნილი. ამ ინიციატივის მიზანი COVID-19-ის პანდემიის შედეგად შექმნილ ვითარებაში მაქსიმალურად ეფექტიანი და ეფექტური ინიციატივების მხარდაჭერაა. საგრანტო კონკურსი მიმართული იქნება არსებული კრიზისის შედეგად წარმოქმნილი პრობლემების გადაჭრის ან შემსუბუქებისკენ.

კონკურსში მონაწილეობის მსურველი სამოქალაქო საზოგადოებისა (ააიპ) და მედია ორგანიზაციებისთვის კონცეფციის წარდგენის ბოლო ვადა 4 აპრილია.
საგრანტო კონკურსის განაცხადი და დეტალური ინფორმაცია შეგიძლიათ იხილოთ აქ.

კენწერო

კენწერო ინოვაციური ონლაინ საგანმანათლებლო პლატფორმაა, რომელიც მოქალაქეებს შესთავაზებს:

  • მსოფლიო მასშტაბით არსებულ საგანმანათლებლო რესურსებს ქართულ ენაზე;
  • ახალ რეალობაზე მორგებულ ონლაინ კურსებსა და ტრენინგებს ქართველი და უცხოელი ტრენერების მონაწილეობით;
  • შესაბამის საგანმანათლებლო და დასაქმების პერსპექტივებს;
  • ონლაინ დისკუსიის შესაძლებლობებს.

Game of Homes — თვითიზოლაციური თამაშები სახლში დარჩენის წასახალისებლად

ინიციატივა Game of Homes არასამთავრობო ორგანიზაცია დემოკრატიის ლაბორატორიასა და კომუნიკაციების კომპანია კრაკენთან ერთად ხორციელდება. Game of Homes ფეისბუქის ჯგუფია, რომელიც მის წევრებს სახლის პირობებში ყოველდღიურ გამოწვევებს, თამაშებს, გართობის სხვადასხვა ხერხსა და შესაბამის პრიზებს სთავაზობს. გარდა ამისა, მცირე ბიზნესს, რომელიც ყოველდღიურ პრიზებს აწესებს, პროექტი ეხმარება გაყიდვების სტიმულირებასა და საკუთარი პროდუქციის რეკლამირებაში. ინიციატივაში ჩასართველად ჯგუფში დამატებაა საჭირო.

მოძრაობა შენმოქმედი სექტორი 3-ისა და ფონდ პროდემოსის ინიციატივაა. მოძრაობის წევრებს სჯერათ, რომ კორონავირუსიის გლობალურ პანდემიასთან გამკლავება საზოგადოების ყველა წევრის ჩართულობითაა შესაძლებელი. მათი პირველი ინიციატივა "მადლიერების ტაში" იყო, რომელსაც საქართველოს მასშტაბით ბევრი ადამიანი შეუერთდა.