"გამარჯობა, თქვენ კორონას პაციენტთან ახლოს იყავით"

დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

19 მარტის მდგომარეობით:

241 563 დადასტურებული შემთხვევა მსოფლიოში
9 982 გარდაცვლილი
86 689 გამოჯანმრთელებული

საქართველოში:

კორონავირუსის დადასტურებული შემთხვევა - 40
კარანტინის რეჟიმში - 1 592
სტაციონარში მეთვალყურეობის ქვეშ - 262
გამოჯანმრთელებული - 1

დღის ფაქტი

"გამარჯობა, თქვენ კორონას პაციენტთან ახლოს იყავით" - ისრაელის ჯანდაცვის სამინისტრო სმსებს უგზავნის იმ ადამიანებს, რომელთა ტელეფონის GPS კორონავირუსის მქონე პაციენტის GPS-ის მახლობლად ფიქსირდება.

დღის მთავარი ჰედლაინი მსოფლიო მედიაში:

24 საათის განმავლობაში პირველად უხანში კორონავირუსის არც ერთი შემთხვევა არ დაფიქსირებულა

ბოლო 24 საათის განმავლობაში პირველად ჩინეთის ქალაქ უხანში, სადაც COVID-19-ის ეპიდემია დაიწყო, კორონავირუსის არც ერთი შემთხვევა არ დაფიქსირებულა. ინფორმაციას ამის შესახებ ჩინეთის ჯანდაცვის კომისია ავრცელებს.

ეპიდემიის დაწყების დღიდან ჩინეთში კორონავირუსით სულ 80 928 ადამიანი დაინფიცირდა და 3 245 გარდაიცვალა. გამოჯანმრთელდა 70 ათასზე მეტი ადამიანი.

დღის ფოტო: მელბურნში მცხოვრები მოხუცი ქალი "მომმარაგებლების" გამო პროდუქტების გარეშე დარჩა

კორონავირუსის თაიმლაინი

19 იანვარი: 100 შემთხვევა
24 იანვარი: 1 000 შემთხვევა
28 იანვარი: 5 000 შემთხვევა
12 თებერვალი: 50 000 შემთხვევა
6 მარტი: 100 000 შემთხვევა
14 მარტი: 150 000 შემთხვევა
18 მარტი: 200 000 შემთხვევა
19 მარტი: 225 000 შემთხვევა

დღის კარგი ამბავი

სამედიცინო სერიალები საავადმყოფოებს ნიღბების მარაგს გადასცემენ

Fox-ის სერიალმა The Resident გადაღებებისთვის განკუთვნილი ნიღბები, ხელთათმანები და ექიმების სამოსი ატლანტას ჰოსპიტალს გადასცა. ABC-ის The Good Doctor გეგმავს, რომ აღჭურვილობა ვანკუვერს გადასცეს, გრეის ანატომიის სპინოფმა, Station 19-მა კი N95 ნიღბები ონტარიოს სახანძრო დეპარტამენტს აჩუქა.

რა ხდება მსოფლიოში:

დღეს ყველაზე მეტი შემთხვევა იტალიაში (+5322), ესპანეთსა (+3194) და გერმანიაში (+2993) დაფიქსირდა;
გადაიდო კანის ფესტივალი;
რუსეთში კორონავირუსით პირველი ადამიანი გარდაიცვალა;
მსოფლიო საპატრიარქო ყველა რელიგიურ მსახურებასა და წესის შესრულებას წყვეტს;
ილონ მასკი დაგვპირდა, რომ საჭიროების შემთხვევაში ტესლა სასუნთქი აპარატების წარმოებას დაიწყებს;
აშშ-ში შემთხვევების რაოდენობამ ბოლო 24 საათში 40%-ზე მეტით იმატა;
აშშ ემზადება, რომ პანდემია 18 თვეს, ან მეტს გასტანს;
სამხრეთ კორეაში გამოჯანმრთელებული ადამიანების რაოდენობამ ახალი ინფიცირებების რიცხვს გადააჭარბა;
სტარბაქსის თანამშრომლები ობიექტების დახურვას ითხოვენ. მათი თქმით, ყავა პირველადი საჭიროება არაა;
კვლევა აჩვენებს, რომ თუ ჩინეთის მთავრობა სამი კვირით ადრე დაიწყებდა კორონავირუსის შეჩერების ღონისძიებებს, შემთხვევების რაოდენობა 95%-ით ნაკლები იქნებოდა, გავრცელების არეალი კი - შეზღუდული;
ავსტრალიამ და ახალმა ზელანდიამ საზღვრები ჩაკეტეს;
იტალიაში გარდაცვლილთა რიცხვმა ჩინეთში დაღუპულების რიცხვს გადაუსწრო;
მონაკოს პრინცს კორონავირუსი დაუდასტურდა;
დანიაში სუპერმარკეტი 1 ცალ სადეზინფექციო სითხეს $5,8-ად ყიდის, 2-ს — $145-ად.

რა ხდება საქართველოში:

დღეს კორონავირუსით ინფიცირებულთა რაოდენობა 40-მდე გაიზარდა, ესპანეთში კი კორონავირუსით საქართველოს მოქალაქე გარდაიცვალა. გარდაცვლილი ქალი 74 წლის იყო.

დღესვე შევიტყვეთ, რომ საქართველოს მასშტაბით ყველა სავაჭრო ობიექტი იხურება, სურსათის მაღაზიების, აფთიაქების, ბანკების, ბენზინგასამართების გარდა.

ვიდეო, რომელიც უნდა ნახოთ:

თვითიზოლაციაში მყოფი გალ გადოტი ცნობილ მეგობრებთან ერთად Imagine-ს მღერის

როგორ გავიგოთ, რამდენ ხანს გვეყოფა სანიტაიზერი?

ეს ვებსაიტი გამოგითვლით, რამდენ დღეს გეყოფათ არსებული სანიტაიზერი, ან - რამდენი უნდა მოიმარაგოთ.

აქვე გეტყვით, რომ თუ კორონავირუსმა თქვენი ყოველდღიური რეჟიმიც შეცვალა და, ჩვენი რედაქციის მსგავსად, თქვენც სახლიდან გიწევთ მუშაობა, შემოგვიერთდით Facebook ჯგუფში და გავუზიაროთ ერთმანეთს ეს საინტერესო გამოცდილება.