მართალია, მთელს მსოფლიოში კორონავირუსის გავრცელების გამო კინო და სატელევიზიო წარმოების დროებით შეჩერებასთან ერთად უამრავი დაგეგმილი პროექტის პრემიერამაც გადაიწია, თუმცა იმ მაყურებლებს, რომლებსაც ანიმაციები განსაკუთრებულად გვიყვარს, თამამად შეგვიძლია უკეთესის მოლოდინი გვქონდეს და ვიმედოვნოთ, რომ ყველა სასურველი ანიმაციის პრემიერას ამ წელსვე კინოთეატრებში დავესწრებით.

წელს ბაზარზე ცნობილი გიგანტი კომპანიები უამრავ სიურპრიზს გვიმზადებენ, რომელთაგანაც რამდენიმე გამორჩეული პროექტის შესახებ მოგითხრობთ, რათა ისინი არ გამოგრჩეთ და წლის განმავლობაში ყურადღებით მიადოვნოთ თვალი დაგეგმილ სიახლეებს.

1. Onward

იმასთან ერთად, რომ დისნეი თავისი ცნობილი ანიმაციების მიხედვით არაერთ ფილმს იღებს, იქნება ეს მულანი, ლილო და სტიჩი თუ პიტერ პენი, ამავდროულად ორიგინალი ანიმაციების შექმნასაც აგრძელებს. მათ შორისაა დისნეისა და Pixar-ის საერთო პროექტი Onward, რომელიც ერთი ოჯახის ჯადოსნური ისტორიის შესახებ მოგვითხრობს.

ეს ანიმაცია გამორჩეულია იმითაც, რომ მასში დისნეის პირველი ღიად ქვიარ პერსონაჟიც შეგვხვდება. აღსანიშნავია, რომ სწორედ ამის გამო ანიმაცია რუსეთში დააცენზურეს.

პრემიერის თარიღი: 6 მარტი.

2. Soul

Pixar წელს მაყურებლებს კიდევ ერთ ამბიციურ პროექტს წარუდგენს: Soul, რომლის შექმნაზეც ოსკაროსანი ანიმაციის, Inside Out-ის შემქმნელებმა იმუშავეს.

ეს ანიმაციური ფილმი სკოლის მასწავლებლის შესახებ მოგვითხრობს, რომელიც ჯაზის ვარსკვლავობაზე ოცნებობს. ეს Pixar-ის პირველი ანიმაციაა, რომლის მთავარი გმირიც შავკანიანი იქნება.

პრემიერის თარიღი: 19 ივნისი.

3. Raya and the Last Dragon

ფოტო: Disney

დისნეი წელს გამორჩეულად მრავალფეროვანი თემატიკის მქონე ანიმაციებს გვთავაზობს და მათ შორისაა Raya and the Last Dragon-იც, რომელიც სამხრეთ აზიელი მებრძოლი ქალის შთამაგონებელ ისტორიას გააცოცხლებს ეკრანებზე.

ანიმაციის შექმნაზე Moana-ს, Frozen-სა და Zootopia-ს შემქმნელები მუშაობდნენ, რაც იმის გარანტიას გვაძლევს, რომ წინ ნამდვილად დაუვიწყარი სანახაობა გველოდება.

პრემიერის თარიღი: 25 ნოემბერი.

4. Connected

ანიმაციური სერიალების მოყვარულებისთვის Gravity Falls საკულტო შოუა და სწორედ მისმა ერთ-ერთმა შემქმნელმა, მაიკ რიანდამ საოცრად სასაცილო ანიმაცია გადაიღო, რომელიც თანამედროვე ოჯახის კომიკური თავგადასავლის შესახებ მოგვითხრობს.

ანიმაცია Sony-ის პროდუქციაა, რომელმაც 2018 წელს ოსკაროსანი Spider-Man: Into the Spider-Verse შემქნა, შესაბამისად, წელსაც ნამდვილად ღირს დიდი ინტერესით დაველოდოთ და შევაფასოთ მათი ახალი ნამუშევარი.

პრემიერის თარიღი: 18 სექტემბერი.

5. The Willoughbys

ფოტო: Netflix

მას შემდეგ, რაც ნეტფლიქსის შარშანდელმა ანიმაცია Klaus-მა მაყურებლების მოწონებასთან ერთად ოსკარისა და ოქროს გლობუსის ნომინაციებიც დაიმსახურა, როგორც ჩანს, კომპანია ამით გაჩერებას არ აპირებს და კიდევ უფრო საინტერესო სიახლეებს გვიმზადებს.

მათ შორისაა The Willoughbys, რომელიც ცნობილი საბავშვო წიგნების ავტორის, ლოის ლოურის ნაწარმოების მიხედვით გადაიღეს.

პრემიერის თარიღი: 22 აპრილი.

6. Over the Moon

ფოტო: Netflix

ნეტფლიქსი კიდევ ერთ ამბიციურ პროექტზე მუშაობს, რომელიც მუსიკალური ანიმაცია იქნება და მთავარი გმირი გოგოს შესახებ მოგვითხრობს, რომელსაც მთვარესთან შეხვედრა სურს.

ამ პროექტზე ლეგენდარული გლენ კლინი მუშაობს, რომელსაც მანამდე ისეთი საკულტო ანიმაციების შექმნაში მიუღია მონაწილეობა, როგორებიცაა ტარზანი, პოკაჰონტასი თუ ურჩხული და მზეთუნახავი.

პრემიერის თარიღი: ჯერჯერობით უცნობია.

7. Scoob!

კინოსტუდია Warner Bros.-მა გადაწყვიტა, რომ იმისათვის, რათა ახალ თაობას სკუბი-დუს ფრენჩაიზი არ დავიწყებოდა სრულიად ახალი ანიმაციით შეეხსენებინა ეს ცნობილი ისტორია.

ახალი ანიმაცია კვლავ სკუბისა და მისი მეგობრების მისტიკური თავგადასავლების შესახებ მოგვითხრობს.

პრემიერის თარიღი: 15 მაისი.

8. Trolls: World Tour

2016 წელს გამოსული ცნობილი ანიმაცია ეკრანებზე სიქველით ბრუნდება, რომელიც კიდევ უფრო ფერადი და მუსიკალური იქნება.

Trolls: World Tour-ში ორ მთავარ გმირს ისეთი ცნობილი მომღერლები ახმოვანებენ, როგორებიც არიან ჯასტინ ტიმბერლეიკი და ანა კენდრიკი.

პრემიერის თარიღი: 10 აპრილი.

9. The SpongeBob Movie: Sponge on the Run

სპანჯბობის სიყვარული თუ არა, ამ ანიმაციის ნახვა მარტო იმიტომაც ღირს, რომ მასში არც მეტი, არც ნაკლები კიანუ რივზი გამოჩნდება!

პრემიერის თარიღი: 22 მაისი.

10. Minions: The Rise of Gru

წელს ეკრანებზე კიდევ ერთი ცნობილი ანიმაციური ფილმების სერიის ახალ ნაწილს ვიხილავთ: მინიონების ისტორია გრძელდება.

ახალი 3D ანიმაცია Toy Story 2-სა და Despicable Me-ს შემქმნელმა, კაილი ბალდამ გადაიღო.

პრემიერის თარიღი: 3 ივლისი.