მსოფლიოში ცნობილმა პორნოგრაფიულმა საიტმა Pornhub-მა დააანონსა, რომ თავის პლატფორმაზე პირველ არაპორნოგრაფიულ ფილმს გამოუშვებს.

Shakedown — ასე ჰქვია 2018 წელს გადაღებულ საათი და 12 წუთის ხანგრძლივობის დოკუმენტურ ფილმს, რომელიც ამერიკელმა რეჟისორმა, ლეილა ვაინრაუბმა გადაიღო.

ფილმი ლოს-ანჯელესის სტრიპტიზკლუბში ქვიარ ქალებისა და კაცების ცხოვრების შესახებ მოგვითხრობს. მას რეჟისორი 2002-დან 2017 წლამდე, 15 წლის განმავლობაში პერიოდულად იღებდა და საბოლოოდ, იუმორით, სევდიანი ემოციებითა და ინფორმაციული დეტალებით სავსე სურათი შექმნა ამ სუბკულტურის "მიწისქვეშა" ცხოვრების შესახებ.

Pornhub-ზე ფილმის ნახვა ნებისმიერ მსურველს ერთი თვის განმავლობაში უფასოდ შეეძლებათ, შემდეგ კი მისი ხილვა Criterion Channel-ზე იქნება შესაძლებელი.

ფოტო: SHAKEDOWN FILM LLC

Variety-ის ცნობით, რეჟისორი იმედოვნებს, რომ პორნოსაიტზე ფილმის განთავსებით ყველაზე მეტად ქალ მაყურებლებს მოიზიდავს — ფილმი ძირითადად ლესბოსელ ქალებზე მოგვითხრობს. ჯერჯერობით Pornhub-ის გენდერულად ჩაშლილ მონაცემებზე ინფორმაცია არ გვაქვს, თუმცა ვიცით, რომ 2019 წელს საიტს დღეში 115 მილიონი სტუმარი ჰყავდა, წლის განმავლობაში სულ 39 მილიარდამდამდე ავიდა.

"ეს ფილმი Pornhub-ის ახალი პოლიტიკის ნაწილია, რომლითაც გვსურს ხელოვნებას მხარი დავუჭიროთ. გვინდა, რომ ჩვენი პლატფორმა ხელოვანებმა და შემოქმედმა ადამიანებმა აქტიურად გამოიყენონ. აქამდეც ხშირად ტვირთავდნენ ისეთ მასალებს, რომელთა ატვირთვაც შეზღუდვის გამო YouTube-სა და სხვა საიტებზე არ შეეძლოთ, თუმცა ამჯერად პირველი სრულმეტრაჟიანი ფილმის პრემიერა გვაქვს და ძალიან გვიხარია", — განაცხადა კომპანიის წარმომადგენელმა, ალექს კლაინმა.