სწრაფი მიტანის სერვისი Menu.ge გაზაფხულის დაწყებასთან ერთად მომხმარებელს მნიშვნელოვან სიახლეებს სთავაზობს, რომელთა შესახებაც კომპანიის დირექტორი, თამარ არევაძე დეტალურად მოგვითხრობს.

როგორც ვიცით, Menu.ge-ში სიახლეები გაქვთ. რას უკავშირდება მომხმარებლის აპლიკაციის განახლება და ქეშბექის სისტემა?

ჩვენ მუდმივად ვცდილობთ მომხმარებლებს მომგებიანი და საინტერესო შეთავაზებები გავუკეთოთ, რაც მოიცავს ფასდაკლებებს, კომბო აქციებსა და საჩუქრებს. ამჟამად, 5%-იანი ქეშბექის სისტემა გვაქვს დაგეგმილი, რომელიც 3 მარტიდან დაიწყება. მომხმარებელი თავისი შეკვეთის 5%-ს მიიღებს Menu.ge-ს ბალანსზე, ნებისმიერ შეკვეთაზე. მომხმარებელს შეეძლება როგორც ბონუსის დაგროვება, ასევე მათი გამოყენება ნებისმიერ დროს.

სიახლე გვაქვს აპლიკაციასთან დაკავშირებითაც. სულ ცოტა ხანია, რაც ჩავუშვით ახალი აპლიკაცია, უფრო თანამედროვე დიზაინითა და ფუნქციებით. ვფიქრობთ, რომ ამ აპლიკაციით ბევრად უკეთეს გამოცდილებას ვთავაზობთ ჩვენს მომხმარებლებს.

რა იყო მთავარი გამოწვევა აპლიკაციის განახლებამდე და როგორ აგვარებს ახალი ვერსია ამას?

მთავარი გამოწვევა, ალბათ, დღევანდელი რეალობაა. დღეს საჭმლის მიტანის სერვისის აპლიკაცია თუ მაქსიმალურად მორგებული არ არის იმაზე, რომ მართლა დრო და ენერგია დაზოგოს, მაშინ ნაკლებად სარგებლიანი გამოდის მისი გამოყენება. ჩვენი მთავარი გამოწვევა იყო მაქსიმალურად გამოგვეკვლია ჩვენივე მომხმარებელი, გაგვეგო, როგორ გამოიყენებდნენ ისინი ამ აპლიკაციას. ეს ყველაფერი კი იმისთვის გაკეთდა, რომ მაქსიმალურად კარგი გამოცდილება შევთავაზოთ მომხმარებელს, რაც მისგან ზედმეტ ძალისხმევას არ მოითხოვს. შესაბამისად, აპლიკაცია გახდა ძალიან მარტივი და დაბალანსებული UX-ის კუთხით და კიდევ უფრო ამართლებს იმ მიზანს, რასაც ჩვენი კომპანია ისახავს — დაუზოგოს დრო და რესურსი ჩვენს მომხმარებელს. ახალი აპლიკაცია შექმნილია როგორც Android-ისთვის, ასევე iOS-ისთვისაც.

რომელ ცვლილებას თვლით ყველაზე მნიშვნელოვნად?

ჩვენი აზრით, ეს აპლიკაცია მთლიანობაში არის დიდი ცვლილება კომპანიისთვის. ცალკე ელემენტების ცალსახად გამოყოფა არ შეიძლება. თუმცა, შემიძლია ჩემი პირადი აზრი გითხრათ, რომ განახლებული დიზაინი და ღილაკების განლაგება საკმაოდ მარტივი და მოსახერხებელია. თუმცა ცალსახაა, რომ არანაკლებ მნიშვნელოვანია რეგისტრაციის გამარტივება და გამრავალფეროვნება, რუკის ახალი და, რაც მთავარია, ძალიან ზუსტი ვერსია, გამარტივებული ძებნა და მრავალი სხვა. აქვე დავამატებდი, რომ აპლიკაციაში უკვე ინტეგრირებულია ხელოვნური ინტელექტის ელემენტები, რომლის მეშვეობითაც აპლიკაცია თითოეულ მომხმარებელს შესთავაზებს მასზე მორგებულ შეთავაზებებს მისი შეკვეთების ანალიზის შედეგად.

როგორ მიმდინარეობდა განახლების პროცესი, ვინ იყო ჩართული? როგორ გაიარა აპლიკაციამ ტესტირების ეტაპი?

განახლების პროცესი იყო საკმაოდ ხანგრძლივი და მრავალფეროვანი. მოგეხსენებათ, ჩვენი კომპანია რამოდენიმე ქვეყანაშია წარმოდგენილი, შესაბამისად, თითოეულ ქვეყანას ჰქონდა თავისი მოთხოვნები აპლიკაციის მიმართ, გარდა ზოგადი მიდგომებისა. აპლიკაციაზე მუშაობა მიმდინარეობდა პირდაპირი მნიშვნელობით 24/7-ზე და პროცესში ჩართული იყო აბსოლუტურად ყველა რგოლის თანამშრომელი, რათა მაქსიმალურად ყოფილიყო გათვალისწინებული ყველა მხარე: მომხმარებელი, ჩვენი პარტნიორი კურიერები, ქოლ-ცენტრი და ა.შ. აპლიკაციის ტესტირება მიმდინარეობდა ქვეყნების მიხედვით, სადაც გვყავდა ფოკუს ჯგუფები. თითოეული ჯგუფი შედგებოდა ჩვენი თანამშრომლებისგან, ერთგული მომხმარებლებისგან და ახლადდარეგისტრირებული, ჩვენთვის სრულიად უცნობი ადამიანებისგან. ასობით ადამიანი ყოველდღიურად იყენებდა აპლიკაციას რამოდენიმე თვის განმავლობაში. ჩვენ მაქსიმალურად გავითვალისწინეთ მათი ინტერესები და სურვილები და სწორედ ამის გამო, დავამატეთ რამდენიმე ახალი ფუნქციონალიც, მაგალითად, კატეგორია რჩეული, სადაც შესაძლებელია საყვარელი პროდუქციის მოთავსება, შემდგომში გამარტივებული შეკვეთისთვის.

როგორია მომხმარებლების უკუკავშირი, როგორი შეფასებები აქვს ახალ აპლიკაციას?

ძირითადად ძალიან პოზიტიური გამოხმაურება აქვს აპლიკაციას, თუმცა, რა თქმა უნდა, კიდევ ბევრი ე.წ. ბაგია სისტემაში და მათი აღმოფხვრა მიმდინარეობს ყოველდღიურ რეჟიმში. აპლიკაცია ცოცხალი ორგანიზმია და შესაბამისად, მისი საბოლოო დახვეწა მუდმივ რეჟიმშია.

როგორ ფიქრობთ, რა არის ის, რაც Menu.ge-ს კონკურენტებისგან განასხვავებს?

როგორც ზემოთ აღვნიშნე, ჩვენი მთავარი პრინციპია დავზოგოთ მომხმარებლის ყველა რესურსი, რომელსაც ის ხარჯავს საჭმლის დამზადებაზე, შესაბამისად, ჩვენი უპირატესობებიც აქედან გამომდინარეობს. პირველი და მთავარი, ჩვენ ვმუშაობთ ყველა ადამიანზე, მათ შორის იმ ადამიანებზე, ვინც მაგალითად არც აპლიკაციას იყენებს და ვერც დესკტოპ ვერსიასთან მეგობრობს, მათთვის გვაქვს ქოლ-ცენტრი. ასევე ჩვენ მომხმარებელს არ ვზღუდავთ არჩევანში და მას შეუძლია შეკვეთა ყველა რესტორნიდან, რომელიც განთავსებულია სისტემაში. შესაძლებელია რამდენიმე რესტორნიდან ერთდროული შეკვეთაც. ხშირად ხდება, რომ ამის გამო შეკვეთის მიტანის დრო იზრდება, თუმცა ამომავალი წერტილი მაინც მომხმარებლის სურვილია, ჩვენ ხომ იმისთვის ვართ შექმნილი, რომ ადამიანებს ყოველდღიურად სიხარული მივაწოდოთ.