აჭარის ტელევიზიაში დირექტორის პირველი მოადგილე ნათია ზოიძის ნაცვლად ვახო ხუზმიაშვილი იქნება. ის კომისიამ დახურულ სხდომაზე შეარჩია. ინფორმაციას ამის შესახებ აჭარიის მაუწყებელი ავრცელებს.

ხუზმიაშვილის არჩევის შესახებ ცნობა მედიაში იმ დროს გავრცელდა, როცა კომისიის თავმჯდომარე ჯემალ გვენეტაძე On.ge-ს ჟურნალისტს არწმუნებდა, რომ შედეგები ჯერ ცნობილი არ იყო.

ნათია ზოიძე ბოლო რამდენიმე კვირაა, აჭარის ტელევიზიის თანამშრომელი აღარაა. როგორც ის ამბობს, ტელევიზიიდან წასვლა სამუშაო პირობების შეზღუდვის გამო მოუწია.

აჭარის ტელევიზიის ინფორმაციოთ, კომისიის წევრებმა არჩევანი სამ კანდიდატს შორის გააკეთეს. კონკურსში მაუწყებლის ორი ჟურნალისტი ფირუზ ბოლქვაძე და ემზარ დიასამიძე მონაწილეობდნენ. კონკურსანტებთან გასაუბრება მედიისთვის დახურეს. კომისიის წევრებმა სხდომის დახურვა მას შემდეგ გადაწყვიტეს, რაც საინფორმაციო სამსახურმა იკითხა, რატომ უჩვენებდნენ კონკურსანტებს ტელევიზიის რეპორტაჟს, რომელსაც თვითრეგულირების საბჭო განიხილავდა.

აჭარის ტელევიზიაში განვითარებული მოვლენები მოკლედ

აჭარის მაუწყებელში დირექტორის, ნათია კაპანაძის გადაყენების შემდეგ მოსალოდნელ საფრთხეებზე საუბრობდნენ. ტელევიზიების თანამშრომლებს მიაჩნდათ, რომ ხელისუფლება მათზე გავლენის მოპოვებას ცდილობდა. დირექტორის გადაყენებიდან რვა თვის განმავლობაში კონკურსი სამჯერ ჩაიშალა, მეოთხე ცდაზე კი მმართველი პარტიისგან დაკომპლექტებულმა საბჭომ გიორგი კოხრეიძე აირჩია, რომლის მიმართაც თანამშრომლებს კითხვები აქვთ.

აჭარის ტელევიზიის თანამშრომლების ნაწილი ჯერ კიდევ კენჭისყრამდე ამბობდა, რომ კოხრეიძის არჩევით სარედაქციო დამოუკიდებლობას საფრთხე შეექმნებოდა. კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ ჟურნალისტებს კრიტიკულ ტონს უწუნებდა. ამავე ეთერში მან უყვირა წამყვანს, თეონა ბაკურიძეს, რაც იმით განმარტა, რომ ჟურნალისტი მის კითხვებს არ პასუხობდა. საუბრის გაგრძელების შემდეგ კი მან აჭარის მთავრობის თავმჯდომარე თორნიკე რიჟვაძე გაამართლა, რომელმაც ბაკურიძეს ეთერში "დაოკებისკენ" მოუწოდა. კოხრეიძის თქმით, ამ რეპლიკამდე რიჟვაძე წამყვანმა მიიყვანა.

კოხრეიძის არჩევის შემდეგ აჭარის ტელევიზია დატოვეს მაუწყებლის კონსულტანტმა ზვიად ქორიძემ და მედიამენეჯერმა, მარინა ვაშაყმაძემ. ტელევიზიიდან წავიდა დირექტორის ყოფილი მოადგილე, ნათია ზოიძეც. ის აცხადებდა, რომ კოხრეიძე სარედაქციო პოლიტიკისგან ჩამოშორებისკენ მოუწოდებდა ან სისხლის სამართლებრივი დევნით ემუქრებოდა.

აღნიშნული თანამდებობების გაუქმების საკითხი დღის წესრიგში მას შემდეგ დადგა, რაც მაუწყებლის დირექტორმა, გიორგი კოხრეიძემ ცვლილებათა პაკეტი წარმოადგინა. საშტატო ცვლილებები ეხებათ: ახალი ამბების სამსახურის უფროსის მოადგილის, მაია მერკვილაძის თანამდებობას, შემოქმედებითი პოლიტიკის განმსაზღვრელ გიორგი მურვანიძეს, შემოქმედებითი მიმართულებით კიდევ ერთ მოადგილეს ბესო დუმბაძეს და ფინანსური სამსახურის უფროსის მოადგილეს.