თბილისის მერი, კახა კალაძე ვაკის პარკში მშენებლობის ინვესტორს პასუხს და ამბობს, რომ კვლავ ადგილმონაცვლეობას სთავაზობს.

"ეს ბრიფინგებით საუბარი რაღაც სიახლეა, მე მგონი. მას არანაირი პრობლემა არ აქვს ჩვენთან კომუნიკაციის. ჩვენ მზადყოფნას გამოვხატავთ ადგილმონაცველობასთან დაკავშირებით და თუ მას რეალურად სურვილი აქვს, რომ ადგილმონაცვლეობა მოხდეს, ჩვენ ამისთვის მზად ვართ", — განაცხადა კალაძემ.

ვაკის პარკში სასტუმრო ბუდაპეშტის მშენებელი კომპანია მერიას სასტუმროს ნაცვლად რესტორნის აშენებას სთავაზობს. დღეს, 17 თებერვალს ინვესტორი კომპანიის ხელმძღვანელმა, გიორგი ზაქაიძემ თქვა, რომ 1958 წელს აშენებულ რესტორან ბუდაპეშტს აღადგენენ. მისივე განცხადებით, შენობა ზუსტად იგივე სიმაღლის იქნება, როგორც ადრე. რესტორანი ბუდაპეშტი 2-სართულიანი იყო, მისი ფართობი კი 480 მ²-ს შეადგენდა.

"ჩვენ გვინდა, მივმართოთ თბილისის მერიას ინიციატივით, რომლის შედეგადაც ამ ტერიტორიაზე სასტუმრო ბუდაპეშტი აღარ აშენდება. ვიხილეთ პრეზენტაცია ვაკის პარკისა და ისტორიული კასკადის აღდგენა პრეზენტაციაზე, ჩვენც გვინდა მივიღოთ მონაწილეობა ამ პროცესში", — ამბობს ზაქაიძე.

თბილისის მერის პასუხის შემდეგ გიორგი ზაქაიძემ გადაცემა საქმის კურსში განაცხადა, რომ ისინი ეცადნენ თბილისის მერიასთან კომუნიკაციაზე გასულიყვნენ თუმცა უშედეგოდ. მისივე თქმით, მათ მერიას სპორტული კომპლექსის, კაფის და აუზის გაკეთებაც შესთავაზეს, თუმცა დადებითი პასუხი ვერ მიიღეს.

როგორც ზაქაიძე განმარტავს, ადგილმონაცველობისთვის მერიამ ონკოლოგიური საავადმყოფოს გვერდით არსებული ტერიტორია შესთავაზა, რაზეც მათ უარი თქვეს.

6 თებერვალს თბილისის მერიამ ვაკის პარკის რეაბილიტაციის პრეზენტაცია წარადგინა, რომლის მიხედვით, პროექტის ღირებულება 30 მილიონი ლარი იქნება. როგორც მერია განმარტავს, რეაბილიტაცია 34 ჰექტარ ტერიტორიას ჩაუტარდება და პარკის გარდა, ცენტრალური ღერძის გასწვრივ არსებული კასკადისა და შადრევნების აღდგენა-რეაბილიტაციას ითვალისწინებს.

თბილისის მერის მოადგილის, მაია ბითაძის თქმით, პროექტი 2020-2021 წლებში უნდა განხორციელდეს.

ერთი თვის წინ ინვესტორმა კომპანიამ განაცხადა, რომ ვაკის პარკში სასტუმროს აშენების სრული უფლება აქვს და მშენებლობის განახლებას გეგმავს. ტიფლის კოსტავას დირექტორი, გიორგი ზაქაიძე აცხადებდა, რომ მათ აქვთ სამშენებლო ნებართვა და სამივე ინსტანციის სასამართლო გადაწყვეტილება, მშენებლობის უფლებაზე.

გიორგი ზაქაიძის თქმით, კომპანიამ აუდიტორული დასკვნა წარუდგინა მერიას, რის საფუძველზეც უნდა აენაზღაურებინათ მათივე ინვესტიცია, თუმცა როგორც ამბობს, მათთვის სასურველი შეთავაზება მერიისგან ამ დრომდე ვერ მიიღეს.

თბილისის ვიცე-მერმა, ირაკლი ხმალაძემ ვაკის პარკში სასტუმროს მშენებლობა გამორიცხა და განაცხადა, რომ კომპანიის მხრიდან წაყენებულ ბრალდებებს მერია ვერ მიიღებს:

"დავიფიცები თუ გნებავთ, ვერ ააშენებენ".

სასტუმროს მშენებლობა ვაკის პარკში

2013 წლის 24 ივლისის განკარგულებით, თბილისის მერმა, გიგი უგულავამ თბილისში, ჭავჭავაძის #68-ში არსებულ მიწის ნაკვეთზე სასტუმროს განთავსების მიზნით სპეციალური (ზონალური) შეთანხმება გასცა, რომლითაც ქალაქთმშენებლობითი პარამეტრები გაიზარდა. ამავე წლის 20 სექტემბრის ბრძანებით, არქიტექტურის სამსახურმა თბილისში ჭავჭავაძის გამზირ #68-ში სასტუმროს მშენებლობის ნებართვა გასცა.

აღნიშნული განკარგულებისა და ბრძანების გაუქმება მწვანე ალტერნატივამ 2014 წელს საქალაქო სასამართლოში მოითხოვა. ორწლიანი დავის შემდეგ საქალაქო სასამართლომ სარჩელი ნაწილობრივ დააკმაყოფილა — სადავო საკითხის გადაუწყვეტლად მერიის 24 ივლისის განკარგულება ბათილად იქნა ცნობილი.

2016 წელს მწვანე ალტერნატივამ სააპელაციო საჩივარი წარადგინა და წინა ინსტანციის გადაწყვეტილების იმ ნაწილში გაუქმება მოითხოვა, რომლითაც საჩივარი ნაწილობრივ დაკმაყოფილდა და მოითხოვა სარჩელის სრულად დაკმაყოფილება. საქალაქო სასამართლოს გადაწყვეტილება გაასაჩივრეს, ასევე, შპს გრაალმა და შპს ტიფლის კოსტავამ, რომლებიც აშენებენ სასტუმრო ბუდაპეშტს.

2018 წლის 28 მაისს თბილისის სააპელაციო სასამართლომ დააკმაყოფილა კომპანიების სარჩელი და გააუქმა საქალაქო სასამართლოს გადაწყვეტილება. 2019 წლის 16 იანვარს კი უზენაესმა სასამართლომ მშენებლობასთან დაკავშირებით მწვანე ალტერნატივის საკასაციო საჩივარი დაუშვებლად ცნო, რითაც წინა ინსტანციის გადაწყვეტილება უცვლელად დატოვა.