ტოდ ფილიპსის ფილმ Joker-ისთვის შექმნილი მუსიკისთვის ისლანდიელ კომპოზიტორს, ჰილდურ გუდნადოტირს ოსკარის ჯილდო გადასცეს. მას კონკურენციას ისეთი ფილმების კომპოზიტორები უწევდნენ, როგორებიცაა Little Women, Marriage Story, 1917 და Star Wars: The Rise of Skywalker.

ამით 37 წლის ჰილდურ გუდნადოტირი პირველი ქალი ხელოვანი გახდა, რომელსაც ოსკარი დრამატული ფილმის საუკეთესო მუსიკის შექმნისთვის გადასცეს.

ოსკარების ისტორიაში მანამდეც იყვნენ გამარჯვებული კომპოზიტორი ქალები: 1996-1997 წლებში რეიჩელ პორტმენი და ენი დადლი დააჯილდოვეს. უბრალოდ მაშინ ამერიკული კინოაკადემია ერთად განიხილავდა საუკეთესო მუსიკისა და სიმღერის ნომინანტებს, ხოლო მას შემდეგ, რაც 1990 წლიდან 1995 წლამდე დისნეის ანიმაციებისთვის დაწერილმა სიმღერამ ზედიზედ ექვსჯერ გაიმარჯვა ამ ნომინაციაში, 2000 წლიდან ორ ნამინაციად გაიყო ეს კატეგორია: საუკეთესო მუსიკა ფილმისთვის და წლის საუკეთესო სიმღერა. სწორედ მას შემდეგ გუდნადოტირი პირველი ქალია, ვინც საუკეთესო მუსიკის შექმნისთვის ოსკარით დაჯილდოვდა.

ფოტო: ROB LATOUR/SHUTTERSTOCK

მუსიკოსმა ჯილდოს ასაღებად სცენაზე ასვლის შემდეგ ტრადიციული მადლობა გადაუხადა რეჟისორ ტოდ ფილიპსს, თავის ქმარსა და დედას. სიტყვით გამოსვლა კი შთამაგონებელი მოწოდებით დაასრულა:

"იმ გოგოებს, ქალებს, დედებსა და ქალიშვილებს, ვისაც გესმით თქვენს შიგნით დაგროვილი მუსიკის ხმა, გთხოვთ, ჩვენც გაგვაგონეთ ის".

ჰილდურ გუდნადოტირმა იმავე ნომინაციაში მანამდე ოქროს გლობუსის 2020 წლის დაჯილდოებაზეც გაიმარჯვა.