ამერიკის შეერთებული შტატების სენატში პრეზიდენტ დონალდ ტრამპის იმპიჩმენტის პროცესი დაიწყო. კერძოდ, დღეს სენატის სრული შემადგენლობის წინ ოფიციალურად წაიკითხეს ორი ბრალდება, რომელსაც ტრამპს ედავებიან: კონგრესის მუშაობაში ხელის შეშლა და ძალაუფლების ბოროტად გამოყენება.

გარდა ამისა, ფიცი დადო აშშ-ის მთავარმა მოსამართლემ (უზენაესი სასამართლოს თავმდჯომარე), ჯონ რობერტსმა, რომელიც ისტორიულ განხილვას უხელმძღვანელებს. ს

ფოტო: კადრი ვიდეოდან / NY Times

Washington Post სენატის უმრავლესობის ლიდერ მიჩ მაკონელზე დაყრდნობით წერს, რომ ოფიციალური განხილვა სენატში მომდევნო კვირას დაიწყება.

აშშ-ის წარმომადგენლობითმა პალატამ ტრამპს იმპიჩმენტი ერთი თვის წინ გამოუცხადა. რის შემდეგაც საქმე განსახილველად სენატს გადაეცა. იმპიჩმენტისთვის 216 ხმა იყო საჭირო, თუმცა ტრამპმა უფრო მეტი მიიღო. პირველ ბრალდებას — ძალაუფლების ბოროტად გამოყენება — 230-მა კონგრესმენმა დაუჭირა მხარი, 197 კი წინააღმდეგი იყო, 1-მა თავი შეიკავა. მეორე ბრალდებას — კონგრესის საქმიანობაში ხელის შეშლა — 229 კონგრესმენმა დაუჭირა მხარი, წინააღმდეგი კი 198 იყო.

ხმები პრაქტიკულად პარტიების მიხედვით გაიყო და თითქმის ყველა დემოკრატმა იმპიჩმენტს დაუჭირა მხარი, რესპუბლიკელებმა კი პირიქით. თუმცა აღსანიშნია, რომ წარმომადგენლობით პალატაში ხმების უმრავლესობას დემოკრატები ფლობენ, სენატში კი რესპუბლიკელები. თუ იმპიჩმენტს მხარს სენატიც დაუჭერს, ტრამპი აშშ-ს ისტორიაში პირველი პრეზიდენტი გახდება, რომელიც თანამდებობას კონგრესმა ჩამოაშორა.

ტრამპი დარწმუნებულია, რომ სენატში მიმდინარე პროცესისას ის სრულად რეაბილიტირდება.

იმპიჩმენტის საფუძველი

ტრამპის იმპიჩმენტის დაწყების მიზეზი მისი და უკრაინის პრეზიდენტის, ვოლოდიმირ ზელენსკის სატელეფონო საუბარი გახდა, რომელიც ივლისში შედგა, თუმცა მისი დეტალური შინაარსი მხოლოდ სექტემბერში გახდა ცნობილი.

საუბრის დროს ტრამპმა ზელენსკის უთხრა, გამოძიება დაეწყო 2020 წლის არჩევნებში მისი სავარაუდო კონკურენტის, ჯო ბაიდენისა და მისი შვილის, ჰანტერ ბაიდენის წინააღმდეგ. გარდა ამისა, ცნობილი გახდა, რომ სატელეფონო საუბრამდე ერთი კვირით ადრე აშშ-ს პრეზიდენტმა უკრაინისთვის სამხედრო დახმარება ორი თვით შეაჩერა.

აშშ-ს პრეზიდენტმა დახმარების შეჩერება აღიარა და გადაწყვეტილება დაასაბუთა იმით, რომ ევროპის სხვა ქვეყნები, როგორიცაა გერმანია და საფრანგეთი, უკრაინას არასათანადოდ ეხმარებიან. სექტემბრის შუა რიცხვებში კი 400 მილიონი დოლარის დახმარება უკრაინამ, საბოლოოდ, მიიღო.

ყოფილი ვიცე-პრეზიდენტი ჯო ბაიდენი 2020 წლის საპრეზიდენტო არჩევნებში დონალდ ტრამპის მთავარ კონკურენტად განიხილება. მისი შვილი ჰანტერ ბაიდენი 2014-2019 წლებში კომპანია ბურისმაში დირექტორთა საბჭოს წევრი იყო. ყოფილმა გენპროკურორმა ვიქტორ შოკინმა კომპანიის მფლობელის, ნიკოლაი ზლოჩევსკის წინააღმდეგ სისხლისსამართლებრივი დევნა დაიწყო. უკრაინის ხელისუფლებამ ბურისმას საქმე 2017 წელს დაასრულა და ვერანაირი დარღვევა ვერ გამოავლინა.

შოკინის საქმიანობით დასავლეთში არაერთი ლიდერი იყო უკმაყოფილო, რადგან ამბობდნენ, რომ ის კორუფციას არასათანადოდ იძიებდა. 2015 წლის დეკემბერში კიევში ვიზიტისას ჯო ბაიდენმა შოკინის გათავისუფლებაც მოითხოვა. საბოლოოდ, გენპროკურორი თანამდებობიდან 2016 წელს გადააყენეს.