ინფრასტრუქტურის მინისტრის, მაია ცქიტიშვილის განმარტებით, ანაკლიის კონსორციუმთან ხელშეკრულების გაწყვეტის შემდეგ პრიორიტეტულია დასავლური პარტნიორის ყოლა. რაც შეეხება რუსეთთან პარტნიორობის შანსებს, მინისტრი ამბობს, რომ პორტს ეკონომიკურთან ერთად უსაფრთხოების განზომილებაც აქვს, ამიტომ გამორიცხულია საქართველოს მთავრობას ჰყავდეს ისეთი ინვესტორი, რომელიც შეუთავსებელი იქნება ქვეყნის სტრატეგიულ ინტერესებთან.

"ჩვენთვის ყოველთვის საინტერესო და ძალიან მიმზიდველი იყო უშუალოდ ანაკლიის განვითარების კონსორციუმში ამერიკული კომპანიის წილის ფლობა, რაც გამარჯვებულად გამოვლენის მნიშვნელოვანი ფაქტორი გახდა. ამერიკის შეერთებული შტატების მხრიდან ინვესტორის ყოლა განსაზღვრავს პროექტის არა მხოლოდ ეკონომიკურ წარმატებას, არამედ უსაფრთხოების კომპონენტის სრულად გამოყენებას. ანაკლიის განვითარების კონსორციუმის გარდა სხვა ინვესტორთან ჩვენ დღემდე არ გვქონია არანაირი მოლაპარაკება", — განაცხადა მან.

მინისტრმა აღნიშნა, რომ ახალი პარტნიორის შერჩევას გარკვეული დრო დასჭირდება, რადგან საინვესტიციო ხელშეკრულებაში ბევრი ცვლილება შევიდა და ყველაფერი გასათვალისწინებელია.

"მათ შორისაა ის დათმობები, რაზეც სახელმწიფო წავიდა ამ პროცესში, ასევე, ის ცვლილება, რაზეც ბანკებთან ვართ შეთანხმებული. რა თქმა უნდა, ამ ყველაფრის გათვალისწინებით უნდა მოხდეს ახალი საინვესტიციო პაკეტის მომზადება, რასაც ალბათ, რამდენიმე თვე დასჭირდება, რის შემდეგაც გამოვაცხადებთ ინტერესთა გამოხატვას", — განმარტა ცქიტიშვილმა.

საქართველოს მთავრობამ ღრმაწყლოვანი პორტის მშენებლობასთან დაკავშირებით ანაკლიის კონსორციუმთან ხელშეკრულებისა შეწყვიტის შესახებ დღეს, 9 იანვარს განაცხადა. მინისტრის თქმით, კონსორციუმმა ვერ შეძლო ხელშეკრულებით ნაკისრი ვალდებულებების შესრულება. რაც შეეხება ხელშეკრულების გაწყვეტასა და პირგასამტეხლოს, ცქიტიშვილი ამბობს, რომ ისინი ხელშეკრულების მიერ გაწერილ პროცედურებს მიჰყვებიან.

ანაკლიის განვითარების კონსორციუმმა და სახელმწიფომ პროექტზე ერთობლივი მუშაობა 2016 წელს დაიწყეს. პროექტის მიხედვით, სამუშაოების სრულად დასრულების შემდეგ, ის პორტი 3 000 ჰექტარზე მეტ ფართობზე უნდა გაშლილიყო და 32 ნავმისადგომი უნდა ჰქონოდა.

ბოლო ორი წლის განმავლობაში მთავრობამ კონსორციუმის ვალდებულებების შესრულება არაერთხელ გადაუვადა. ისინი კონსორციუმს ვალდებულებების შეუსრულებდლობაში ადანაშაულებდნენ მაშინ, როცა კონსორციუმი, პირიქით, მთავრობას ადანაშაულებდა ხელშეშლაში.

კონსორციუმში შემავალი თიბისი ჰოლდინგის მაშინდელი ხელმძღვანელი და ახლა მოძრაობა ლელოს ლიდერი, მამუკა ხაზარაძე აცხადებდა, რომ მთავრობა ანაკლიის პორტის მშენებლობას მიზანმიმართულად უშლის ხელს.

ანაკლიის პორტის და თიბისი ბანკი

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. თიბისი ჰოლდინგ საქართველო ანაკლიის განვითარების კონსორციუმის წევრია. მას შემდეგ, რაც პროკურატურამ ფულის შესაძლო გათეთრებასთან დაკავშირებით გამოძიება დაიწყო თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს.

ამ საქმესთან დაკავშირებით 2019 წლის 13 თებერვალს საქართველოს ეროვნულმა ბანკმა თიბისი ბანკში მათი ხელმძღვანელი თანამდებობიდან გადაყენება მოითხოვა. თიბისი ბანკში ამბობდნენ, რომ აპირებენ სამართლებრივი საშუალებები გამოიყენონ ბანკისა და აქციონერების ინტერესების დასაცავად.

ეროვნული ბანკის მოთხოვნის შემდეგ კომპანიის საბაზრო კაპიტალიზაცია 7,29 პროცენტით შემცირდა, რეალურ თანხაში ეს მაჩვენებელი 55 მილიონზე მეტი გირვანქა სტერლინგია.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში განაცხადეს, რომ ხაზარაძის წასვლას მიესალმებიან. მათი თქმით, ეს დადებითად აისახება ბანკის გამჭვირვალობაზე.

მოგვიანებით, მაშინდელმა ეკონომიკის მინისტრმა, გიორგი ქობულიამ თქვა, რომ თიბისის დამფუძნებლების, მამუკა ხაზარაძისა და ბადრი ჯაფარიძის ირგვლივ შექმნილი ნეგატიური ფონი, კერძო ინვესტორებს "მინიმალური კაპიტალის" შეგროვებას ურთულებს "ანაკლიის პროექტის დასაძრავად".

შემდგომში უკვე მამუკა ხაზარაძემ და ბადრი ჯაფარიძემ ანაკლიის პორტის მმართველ საბჭოში თავმჯდომარისა და თავმჯდომარის მოადგილის პოსტები დატოვეს.

2019 წლის აგვისტოში ანაკლიის განვითარების კონსორციუმი ერთ-ერთმა მთავარმა ინვესტორმა, ამერიკულმა კონტი ჯგუფმა დატოვა. ამასთანავე, ყაზახურ-ჰონკონგური კომპანია Meridian Capital NL B.V.-მა ანაკლიის პროექტში მონაწილეობაზე უარი თქვა.

ამავე თემაზე: