შენიშვნა: სტატია არ შეიცავს ეპიზოდურ სპოილერებს, თუმცა კინოკრიტიკოსების შეფასებებმა, შესაძლოა, ფილმზე წარმოდგენა წინასწარ შეგიქმნან.

Breaking Bad სატელევიზიო შოუების ისტორიაში ერთ-ერთი ყველაზე გამორჩული სერიალია და მან მილიონობით მაყურებელს შეაყვარა თავი. ეს საკულტო სატელევიზიო შოუ ბოლო, მეხუთე სეზონით 2013 წელს დასრულდა და მას შემდეგ ერთგული მაყურებლები მუდმივად ელოდნენ ნებისმიერ იმედისმომცემ სიახლეს.

ერთგული ფანების მოლოდინი 2019 წლის ზაფხულის ბოლოს გამართლდა და Breaking Bad-ის შემქმნელებმა სასიხარულო სიახლე გვაუწყეს: უკვე ყველასთვის ნაცნობი სიუჟეტის განვითარებას ერთ ფილმად გადაიღებდნენ. მართლაც, სულ რამდენიმე დღის წინ, 11 ოქტომბერს ნეტფლიქსზე ნანატრი ფილმის, El Camino-ს პრემიერა შედგა და მის შესახებ მთელს მსოფლიოში უკვე აქტიურად ლაპარაკობენ.

ახლა სწორედ რამდენიმე კინოკრიტიკოსის შეფასებას შემოგთავაზებთ, რაც მეტ-ნაკლებად წარმოდგენას შეგიქმნით ფილმის მიმართ მაყურებლების ზოგად დამოკიდებულებაზე:

პოლ მაკინსი, The Guardian: "რეჟისორი კვლავ წარმატებულად ახერხებს, რომ მაყურებლების ყურადღება ეკრანებზე არ მოადუნოს"

"ფილმის სიუჟეტური თხრობა საინტერესო სტრუქტურითაა აგებული და ის ერთი მხრივ აცამტვერებს იმ მოლოდინებს, რასაც ფილმის გამოსვლამდე მარკეტინგული კამპანიით გვიქმნიდნენ. ვინს გილიგანი, რომელიც ერთდროულად ამ ფილმის სცენარისტი და რეჟისორია, კვლავ წარმატებულად ახერხებს, რომ მაყურებლების ყურადღება ეკრანებზე არ მოადუნოს. თუმცა, თავისი სტილისა და შინაარსის მიუხედავად, El Camino სერიალის ერთ-ერთ ეპიზოდს უფრო ჰგავს და ვიდრე დამოუკიდებელ, სრულყოფილ ფილმს. მისი სიუჟეტი ძალიან ფრაგმენტულია, რის გამოც თუ მანამდე Breaking Bad-ის ჯამში 62 საათის ხანგრძლივობის ხუთი სეზონი არ გინახავთ, ამ ფილმით გაგიჭირდებათ სიამოვნების მიღება".

ფოტო: Netflix

ჰიუ მონტგომერი, BBC: "ეს არის ყველაზე მოსაწყენი და სულელური რამ, რისი ნახვაც კი ეკრანზე შეიძლება"

"ამ ფილმმა სერიალს რეპუტაცია შეულახა და მხოლოდ მისი ცუდი ასპექტების მოსაგონებლად თუ გამოდგება. დაბეჯითებით შემიძლია ვთქვა, რომ ის არც დამოუკიდებელი კინოა - ის უბრალოდ ერთმანეთზე გადაბმული ორი მოსაწყენი ეპიზოდია. ეს სრული არარაობაა და მისი ყურება კიდევ - დროის ფუჭად ხარჯვა. თუ ბოლო პერიოდში ტელევიზია "ახალ კინოდ" მოგვევლინა, ხოლო კინომ ძირითადად სუპერგმირებისა და დისნეის სამყაროში გადაინაცვლა, El Camino სულ სხვა განზომილებას გვთავაზობს: ეს არის ყველაზე მოსაწყენი და სულელური რამ, რისი ნახვაც კი ეკრანზე შეიძლება".

ფოტო: Netfix

სონია სარაია, Vanity Fair: "სერიალში ჯესი პინკმენი ვოლტერ ვაითის ისტორიის ერთგვარი დანამატი იყო, ამ ფილმში კი მთავარი ფოკუსი სწორედ ჯესისკენაა მიმართული"

"გილიგანმა კვლავ დაამტკიცა, რომ ამ სამყაროში ერთ-ერთი საუკეთესო მთხრობელია და თუ Breaking Bad-ს დასრულების შემდეგ ერთგვარი ეპილოგი უნდა ჰქონოდა, El Camino მშვენიერი ფინალური აკორდი გამოდგა. სერიალში ჯესი პინკმენი ვოლტერ ვაითის ისტორიის ერთგვარი დანამატი იყო, ამ ფილმში კი მთავარი ფოკუსი სწორედ ჯესისკენ იყო მიმართული - მშობლებისგან დაშორება, მეგობრების მიმართ განსაკუთრებული დამოკიდებულება და უსაზღვრო ემპათია უმწეო ადამიანების მიმართ. ეს ყველაფერი კი აარონ პოლს დაეხმარა, რომ თავისი როლი შესანიშნავად შეესრულებინა".

ფოტო: Netflix

ლიზ შენონ მილერი, The Verge: "ეს არის ისტორია ახალგაზრდა კაცზე, რომელმაც გზიდან არასწორად გადაუხვია"

"ჯესი პინკმენს, ალბათ, არასდროს მიეცემოდა შესაძლებლობა, რომ სარკეში შეეხედა საკუთარი თავისთვის და რაც წარსულში ჩაიდინა, ყველაფერი სრულად გახსენებოდა. თუმცა, ის იმედი მაინც არსებობს, რომ, შესაძლოა, ჯესის წარსულში ვიღაცამ მაინც შეძლოს მისი მომავლის შეცვლა. El Camino-ში რეჟისორმა და სცენარისტმა, გილიგანმა, მართალია, შეუმჩნევლად, მაგრამ მაინც სწორედ ეს იდეა გააჟღერა. ეს ერთი შეხედვით სპეციფიკური ისტორიაა ახალგაზრდა კაცზე, რომელმაც გზიდან არასწორად გადაუხვია, თუმცა, ამავდროულად, მისი სათქმელი საყოველთაო და უნივერსალურია".

ფოტო: Netflix

დენიელ ფინბერგი, Hollywood Reporter: "კი, ის გადარჩა, მაგრამ რის ფასად?"

"ამ ფილმის გადაღების საჭიროება იმაში მდგომარეობდა, რომ Breaking Bad ძირითადად მხოლოდ ვოლტერ ვაითის ისტორიაზე იყო ორიენტირებული და ფინალიც მისი ამბის დასასრულით შემოიფარგლა. როგორც ჩანს, ერთხელაც გილიგანმა გააცნობიერა, რომ სერიალის სიუჟეტი ვაითის ისტორიით იკვრება, მაგრამ მისი ასევე მნიშვნელოვანი ნაწილი ნამდვილად ეკუთვნის ჯესის. ამას კი მხოლოდ მაშინ მიხვდები, როცა სერიალს სრულად ნახავ ან შემდეგ კიდევ ხელახლა უყურებ. ჯესი პინკმენმა ეს ნამდვილად დაიმსახურა. კი, ის გადარჩა, მაგრამ რის ფასად?"

ფოტო: Netflix