საქართველოს პრეზიდენტმა, სალომე ზურაბიშვილმა დავით ნარმანიას კანდიდატურა ენერგეტიკისა და წყალმომარაგების კომისიის თავმჯდომარედ კონსტიტუციასთან შეუსაბამოდ წარადგინა. ამ საკითხზე თანხმდებიან როგორც ევროპული საქართველოს, ისე ქართული ოცნებისა და არასამთავრობო ორგანიზაციის წარმომადგენლები. ამ მიზეზით კენჭისყრა განუსაზღვრელი ვადით გადაიდო.

დავითა ნარმანიას კანდიატურის დამტკიცებამდე რამდენიმე წუთით ადრე ამ წარდგენის კონსიტუციასთან შეუსაბამობის საკითხი ევროპული საქართველოს წევრმა, ხათუნა გოგორიშვილმა დააყენა. მან კონსტიტუციის ის მუხლი წაიკითხა, რომლითაც განსაზღვრულია პრეზიდენტის უფლებამოსილებები. ჩამონათვალში ვერ მოხვდა სემეკის თავმჯდომარის წარდგენის პროცედურა.

"ქალბატონ პრეზიდენტს, როგორც ჩანს, სხვა პრობლემებთან ერთად იურიდიული კონსულტაციის პრობლემაც აქვს. მოგეხსენებათ, რომ კონსტიტუციით განსაზღვრულია პრეზიდენტის უფლებამოსილებები, ამავე კონსტიტუციის 52-ე მუხლის "ი" ქვეპუნქტით გვეუბნება, რომ მან უნდა განახორციელოს მხოლოდ კონსტიტუციით განსაზღვრული უფლებამოსილება და ვერანაირ დამატებით უფლებამოსილებას ის ვერ მიიღებს", — თქვა ხათუნა გოგორიშვილმა.

საქართველოს ახალგაზრდა იურისტთა ასოციაციის წარმოამდგენელი, ვახუშტი მენაბდე ამბობს, რომ პრეზიდენტს მხოლოდ ის უფლება-მოსილება აქვს, რაც კონსტიტუციითაა გაწერილი.

"რაც შეეხება თავმჯდომარის საკითხს, პრეზიდენტს ეს უფლებამოსილება არ აქვს", — ამბობს ვახუშტი მენაბდე.

უმრავლესობის წევრი, დავით კახიანი ამბობს, რომ პრეზიდენტმა იმოქმედა კანონის შესაბამისად, რომელიც წინააღმდეგობაში მოდის მოქმედ კონსიტუციასთან.

"კანონში წერია, რომ პრეზიდენტი წარადგინს მარეგულირებელი კომისიის თავმჯდომარის კანდიდატს, თუმცა, კონსტიტიუციაში მსგავსი ჩანაწერი არ არის. კანონი წინააღმდეგობაშია კონსტიტუციასთან", — განმარტავს კახიანი On.ge-სთან საუბრისას.

ის ვარაუდობს, რომ სემეკის თავმჯდომარე იმ დრომდე ვერ აირჩევა, სანამ შესაბამისი საკანონმდებლო ნორმა არ იარსებებს.