9 წლის გოგო, რომელსაც წარსულში ორივე ფეხი მოკვეთეს, ნიუ-იორკის მოდის კვირეულზე გამოვა.

დეიზი-მეი დემიტერი ინგლისის ქალაქ ბირმინგემიდანაა და ის მოდის ბრენდმა, Lulu et Gigi Couture, შეარჩია შოუსთვის. დეიზი მანამდე ლონდონში მისდევდა მოდელის კარიერას.

გოგონა პირველია, რომელსაც ორივე ფეხი ამპუტირებული აქვს და ნიუ-იორკის ოფიციალურ მოდის კვირეულზე გამოვა. როგორც დეიზის მამა, ალექს დემიტერი ამბობს, გოგონას სურდა სხვა ამპუტირებული კიდურების მქონე ახალგაზრდებისთვის მაგალითი მიეცა.

ფოტო: EMMA WRIGHT

დეიზი ფიბულარული ჰემიმელიით დაიბადა, რაც მცირე წვივის განვითარების შეფერხებას და ძვლების არქონას ნიშნავს, სწორედ ამიტომ მოკვეთეს მას ფეხები.

თუმცა ამას მისთვის ხელი არ შეუშლია ისეთ ბრენდებთან ემუშავა, როგორიცაა Nike, Boden და Matalan. ქალაქ ბირმინგემში გამართულ მამაცი ბავშვების პრაიდზე კი მას მთავარი ჯილდო გადასცეს.

ფოტო: BEAR AND PINE

დეიზი ნიუ-იორკის მოდის კვირეულზე 8 სექტემბერს გამოჩნდება და ბავშვთა ტანისამოსს წარადგენს. როგორც მოდის ბრენდის წარმომადგენელი ამბობს, როდესაც მას ჰკითხეს, სურდა თუ არა მისი კოლექციის ჩვენებაში მოდელი ამპუტირებული ფეხებით გამოსულიყო, გაოცდა:

"ჩემთვის ყველა ბავშვი ლამაზი და სრულყოფილია, ასე რომ, რა თქმა უნდა კი ვუპასუხე".

შოუში გამოვა დეიზის 11 წლის და ელაც. როგორც გოგონების მამა ამბობს, მოდელობა ბავშვების ცხოვრებაში მთავარი გამოწვევა არაა, თუმცა ეს ჰობი დეიზის სახეზე მუდამ ღიმილს ტოვებს.

ფოტო: River Island