ირაკლი ოქრუაშვილი, რომელიც რუსთავი 2-ის ფლობასთან დაკავშირებით პრეტენზიას აცხადებს, ამბობს, რომ არხის დამფუძნებელს, დავით დვალს ტელევიზია უსასყიდლოდ არ დაუთმია. ასე უპასუხა ოქრუაშვილმა დვალის მიერ მედიისთვის მიწოდებულ ინფორმაციას, სადაც დამფუძნებლებისთვის რუსთავი 2-ის ძალადობით ჩამორთმევაზეა საუბარი.

"თუ წართმევას ჰქონდა ადგილი, რაში აიღო დვალმა 1,2 მილიონი დოლარი და ჯორჯიან ონლაინის 10 პროცენტიანი წილი, რომლის ღირებულაბაც მაშინ იყო 800 ათასი დოლარი... თუ წართმევას ჰქონდა ადგილი, მაშინ კეთილი ინებოს და ეს თანხები უკან დააბრუნოს", — განაცხადა ოქრუაშვილმა.

თავად დვალი ამბობს, რომ ოქრუაშვილი ჯორჯიან ონლაინის 10 პროცენტიანი წილის მდლობელი 2001 წლიდან 25 ათასი დოლარის სანაცვლოდ გახდა. თუმცა საკუთარი წილი არა რუსთავი 2-ში, არამედ არხზე ნაციონალური მოძრაობისთვის რეკლამის განთავსების მიზნით დათმო. დვალი On.ge-სთან საუბრისას განმარტავს, რომ შეთანხმება ვარდების რევოლუციამდე, 2003 წელს მოხდა.

"2003 წელს, ვარდების რევოლუციამდე სააკაშვილი მოვიდა ჩვენთან, რომ სარეკლამო კამპანია გაეშვა ჩვენთან და ფული არ აქვს, მაგ დროს ეროსი [კიწმარიშვილი, რუსთავი 2-სა და ჯორჯიან ონლაინის მაშინდელი მეწილე] უკმაყოფილო იყო ოქრუაშვილით და ამბობდა არაფრის მაქნისი არ არისო, ტყუილად მივიღეო და შესთავაზა [ჯორჯიან ონლაინის 10 %] გაექვითათ წილში. ანუ ჯორჯიან ონლაინის მეწილე აღარ ყოფილიყო და განუთავსებდა რეკლამას", — უთხრა დვალმა On.ge-ს.

მანამდე მანვე ოქრუაშვილის დაკითხვის შინაარსი მედიას მიაწოდა. როგორც გასაჯაროებულ ინფორმაციაშია აღნიშნული, რუსთავი 2-ის მაშინდელ მფლობელთან ეროსი კიწმარიშვილთან მოლაპარაკებას თავად ირაკლი ოქრუაშვილი აწარმოებდა, დვალთან და ჯარჯი აქიმიძესთან დაძაბული ურთიერთობის გამო მათთან კომუნიკაცია მაშინდელ მაღალჩინოსნებს ზურაბ ადეიშვილსა და ვანო მერაბიშვილს დაევალათ.

"ერთ-ერთ შეხვედრაზე ადეიშვილმა და მერაბიშვილმა მითხრეს, რომ აქიმიძე და დვალი წილის გასხვისებაზე უარს აცხადებდნენ და მათთან მოლაპარაკების გზით შედეგს ვერ მიაღწევდნენ. მათი განმარტებით, საჭირო იყო გარკვეული ხერხებით მათთვის ეიძულებინათ ტელევიზიის წილების დათმობა. კონკრეტულად იძულების რა ხერხების გამოყენებას აპირებდნენ ჩემთვის არ უთქვამთ… ივნისში შეხვედრისას მათ მითხრეს, რომ მათმა ჩანაფიქრმა გაამართლა და მათი ძალისხმევის შედეგად დვალი და აქიმიძე თანახმა იყვნენ წილების გასხვისებაზე. საჭირო იყო ახალი მფლობელის მოძებნა", — ვკითხულობთ დვალის მიერ გავრცელებულ დოკუმენტში, რომელიც ოქრუაშვილის დაკითხვას ასახავს.

რუსთავი 2-ის საქმე

ბიზნესმენმა ქიბარ ხალვაშმა, რომელიც რუსთავი 2-ის საკონტროლო პაკეტს 2004-2006 წლებში ფლობდა, დავა ტელეკომპანიის დასაბრუნებლად 2015 წლის აგვისტოში წამოიწყო და ეს საქმე საქალაქო, სააპელაციო და უზენაეს სასამართლოებში 20 თვეში მოიგო. უზენაესი სასამართლოს საბოლოო გადაწყვეტილებით არხი ქიბარ ხალვაშს მიაკუთვნეს.

2004 წლის ზაფხულში ხალვაშმა რუსთავი 2-ის 10%-იანი წილი ნიკა ტაბატაძისგან შეიძინა, 30%-იანი ეროსი კიწმარიშვილისგან და 60%-იანი ვინმე პაატა კარსანიძისგან. კარსანიძეს რუსთავი 2-ის საკონტროლო პაკეტი, მას შემდეგ ჩაუვარდა ხელში, რაც დავით დვალსა და ჯარჯი აქიმიძეს კუთვნილი 30-30 პროცენტიანი წილის დათმობა მოუწიათ.

ხალვაში ტელეკომპანიას ორი წლის მანძილზე მართავდა. 2006 წელს, სააკაშვილსა და ოქრუაშვილის შორის მომხდარი ცნობილი დაპირისპირებასთან ერთად მან არხის წილები დათმო . საბოლოოდ, 2011 წელს, კომპანიის მფლობელები შპს საქართველო და ძმები ყარამანიშვილები გახდნენ.

2016-2017 წლებში, საქართველოს სასამართლოებში გამარჯვების შემდეგ ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.