გაიცანით პლუნეტები

ჩვენმა მთვარემ შეიძლება ყოველთვის არ გაუწიოს დედამიწას ერთგული კომპანიონობა.

მკვლევრების საერთაშორისო გუნდი გვთავაზობს ახალ ჰიპოთეტურ ტერმინს — "პლუნეტა" (მიღებულია სიტყვების, moon და planet, შეერთების შედეგად), ესაა ყოფილი მთვარე, რომელიც გამოეყო თავისი მასპინძელი პლანეტის ორბიტას და მასპინძელი ვარსკვლავის ირგვლივ დაიწყო ბრუნვა.

მკვლევრები ფიქრობენ, რომ პლუნეტებს ბევრი უცნაური ასტრონომიული ფენომენის ახსნა შეუძლიათ. ასევე, შესაძლოა ერთ დღესაც ჩვენი მთვარე მათ რიცხვს შეუერთდეს.

თეორიები

რა უჩვეულო მოვლენები შეიძლება აიხსნას პლუნეტების არსებობით:

მას შემდეგ, რაც მთვარე პლანეტის ორბიტას მოშორდება და ვარსკვლავისკენ გაიწევს, მისი გაყინული ზედაპირიდან წყალი შეიძლება აორთქლდეს, რაც პლუნეტას კომეტის მსგავს კუდს მისცემს. ამით შეიძლება აიხსნას ზოგიერთი ვარსკვლავის ციმციმი.


ასევე, პლუნეტის თავის ყოფილ მასპინძელ პლანეტასთან შეჯახებით შეიძლება წარმოიქმნას ნამსხვრევები, რითაც შესაძლოა აიხსნას ზოგიერთი ეგზოპლანეტის ირგვლივ არსებული რგოლები.

"ეს სტრუქტურები [რგოლები და ციმციმი] აღმოჩენილია და დაკვირვების ქვეშაა", — ამბობს მკვლევარი მარიო სუკერკია Science News - თან საუბრის დროს. "ჩვენ უბრალოდ გთავაზობთ ბუნებრივ მექანიზმს მათ ასახსნელად".

მთვარის შუქი

შეიძლება მთვარე მანამ მოშორდეს თავის პლანეტას, სანამ ჩვენ მას აღმოვაჩენთ. ამის შემდეგ კი, ასტრონომებს მარტივად შეიძლება ის ეგზოპლანეტაში აერიოთ.

მეცნიერების მიერ ჩატარებულ სიმულაციებზე დაყრდნობით, პლუნეტებს ასტრონომიული გადმოსახედიდან საკმაოდ ხანმოკლე ცხოვრება აქვთ - დაახლოებით ნახევარ მილიონ წელიწადში მათი 50 პროცენტი თავისივე პლანეტას ეჯახება, დანარჩენებსაც იგივე ბედი ეწევათ პლუნეტობიდან მილიონ წელზე ნაკლებ დროში. ამით შეიძლება აიხსნას, თუ რატომ არ აღმოგვიჩენია ისინი აქამდე.

ჩვენი მთვარეც, სუკერკიას თქმით, პოტენციური პლუნეტაა იმის გათვალისწინებით, რომ ყოველწლიურად დედამიწას 4 სანტიმეტრით შორდება. თუმცა ჯერ სანერვიულო არაფერი გვაქვს - ამ ტემპით ის დედამიწის ორბიტიდან მომდევნო 5 მილიარდი წლის განმავლობაში ვერ გაიქცევა.