უკრაინის დელეგაციის წევრმა და რადას დეპუტატმა, ალექსეი გონჩარენკომ ევროპის საბჭოს საპარლამენტო ასამბლეაში (PACE) რუსეთის დაბრუნება გააპროტესტა და სხვა ქვეყნის დელეგატებს ემოციური სიტყვით მიმართა. მან დელეგატები ღირებულებების გაყიდვაში დაადანაშაულა:

"ჩემო ძვირფასო კოლეგებო, დღეს სავაჭრო დღეა, გრანდიოზული ფასდაკლებაა. ყველა ჩვენი ღირებულება მხოლოდ 77 მილიონ ევროდ. დემოკრატია 25 მილიონ ევროდ, ადამიანის უფლებები 25 მილიონ ევროდ, კანონის უზენაესობა 25 მილიონ ევროდ —კარგი ფასია.

ჩვენ სხვანაირადაც დათვლაც შეგვიძლია. ამ კვირაში ევროსაბჭომ მილიონობით ადამიანის გული დაკარგა. უკრაინელების, ესტონელების, ქართველების, ლატვიელების, პოლონელების, ლიეტუველების, ბრიტანელების გულები. დაახლოებით, 50 ცენტად თითო გული, კარგი ფასია.

მე მოვისმინე, რომ ამას რუსი ხალხისთვის ვაკეთებთ, რათა ისინი დავიცვათ. ამიტომაც წინადადება მაქვს თქვენთან — მოდი, სირია მოვიწვიოთ ჩვენს ორგანიზაციაში იმიტომ, რომ თქვენი ლოგიკის მიხედვით, უმჯობესია ბაშარ ალ-ასადი მოვიწვიოთ ამ ორგანიზაციაში, ვიდრე მის გარეთ იყოს.

მე მთელი ცხოვრება მიმაჩნდა, რომ თუ ტირანიის ქვეშ მყოფი ადამიანებისთვის კარგის გაკეთება გვინდა, ტირანებს უნდა ვებრძოლოთ და არა მათთან ერთად ვისხდეთ. ბატონმა ტოლსტოიმ [რუსეთის დელეგაციის წევრმა] გვითხრა, "ჩვენ გაშლილი ხელებით" და ჩვენ კი ზუსტად ვიცით რა არის თქვენს გაშლილ ხელებში: ნოვიჩოკი მოწამვლისთვის, ბუკის რაკეტები, თვითმფრინავების ჩამოგდებისთვის... როდესაც პუტინი შემდეგ ჯერზე ვინმეს მოკლავს, სისხლი თქვენს ხელებზეც იქნება და თქვენ ეს უნდა გახსოვდეთ.

უკრაინელმა რეჟისორმა ოლეგ სენცოვმა, რომელიც ხუთ წელზე მეტია სრულიად არაფრისთვის ზის რუსულ ციხეში, თქვა: თუ ჩემი ბედისწერაა, რომ ტირანის კუბოს ლურსმანი ვიყო, მე მივიღებ ამ ბედისწერას.

თუ უკრაინის ბედისწერაა, რომ იყოს მარტო ტირანიასთან ბრძოლაში, ბოროტებასთან ბრძოლაში, რომელიც მოდის ჩვენკენ, კარგი, ასე იყოს. ჩვენ ბოლომდე ვიბრძოლებთ, არასდროს დავნებდებით და გვჯერა გამარჯვების. ზუსტად ვიცი, რომ ასეც იქნება".

ევროპის საბჭოს საპარლამენტო ასამბლეაში (PACE) რუსეთის დაბრუნების გამო საქართველოს, ესტონეთის, ლატვიის, ლიეტუვის, პოლონეთის, სლოვაკეთისა და უკრაინის დელეგაციებმა პროტესტის ნიშნად ზაფხულის სესია დროზე ადრე დატოვეს.

ევროპის საბჭოს საპარლამენტო ასამბლეამ 26 ივნისს მხარი დაუჭირა რეზოლუციას, რომელიც რუსეთის დელეგაციისთვის უფლებამოსილების აღდგენას ეხებოდა. რეზოლუციას მხარი დაუჭირა 116 დელეგატმა, წინააღმდეგი იყო 62, ხოლო 15-მა თავი შეიკავა.

ყირიმის ანექსიის გამო PACE-მ 2014 წელს რუსეთს ხმის მიცემის უფლება ჩამოართვა. ერთი წლის შემდეგ ორგანიზაციამ სანქციები გაახანგრძლივა, რის გამოც რუსეთმა ასამბლეის სესიებში მონაწილეობაზე უარი განაცხადა. გარდა ამისა, 2017 წლიდან რუსეთმა ევროსაბჭოს ბიუჯეტში საწევრო შენატანის გაკეთება შეწყვიტა.

ხმის უფლების ჩამორთმევის გარდა რუსებს არ შეეძლოთ PACE-ში მომხსენებლობა, სხვა ქვეყნებში არჩევნებზე დამკვირვებლობა და საერთაშორისო ორგანიზაციებში ასამბლეას წარდგენა. ამასთანავე, მათ PACE-ში წამყვანი პოზიციების დაკავება ეკრძალებოდათთ.

25 ივნისს კი ევროსაბჭოს საპარლამენტო ასამბლეამ (PACE) მიიღო რეზოლუცია, რომელიც რუსეთს ასამბლეაში დაბრუნების საშუალებას აძლევს. ასამბლეის სხდომაზე მიღებულ რეზოლუციას PACE-ს რეგლამენტში ცვლილებები შეაქვს, რომელიც კრძალავს ევროსაბჭოს დელეგაციებისთვის ხმის და ასამბლეაში გამოსვლის უფლების ჩამორთმევას. გარდა ამისა, ორგანიზაციამ მხარი დაუჭირა, რომ ქვეყნები, რომლებიც ამჟამად PACE-ში წარმოდგენილი არ არიან, ასამბლეის ივნისის სესიაში მონაწილეობისთვის განაცხადი ახლა შეიტანონ.