ყინულისა და ცეცხლის სიმღერის მწერალი ჯორჯ მარტინი თავის პირად ბლოგზე, რომელსაც თავად ბლოგად არ აღიარებს, სერიალს ემშვიდობება.

მარტინი იხსენებს იმ საღამოს, როცა პირველად ლოს-ანჯელესში დ.ბ. ვაისსა და დევიდ ბენიოფს შეხვდა და გვიმჟღავნებს, თუ რატომ შეარჩია ისინი. მწერალი აღიარებს, რომ შოუს ასეთ პოპულარობას ვერ წარმოიდგენდა.

ვეება შესავლის შემდეგ, მარტინი იმ ნაწილსაც მიადგა, რომელიც ყველას აინტერესებს — რა ბედი ეწევა წიგნს, რომელიც ჯერ კიდევ არ დაუწერია? მწერალი ამბობს, რომ ის უდიდესი იქნება.

უფრო ზუსტად კი, მისი ხელნაწერი 3000 გვერდია. დიახ, 70 წლის ბუმბერაზი ავტორი წიგნის ტომებს ხელით წერს. ალბათ ამიტომაც გვიწევს ამდენი ლოდინი?

მეტს აღარ დაგისპოილერებთ — თავად წაიკითხეთ სრულად ჯორჯ მარტინის "არა ბლოგი" იმაზე, თუ როგორ ემშვიდობება სამეფო კარის თამაშებს, რას გვიმხელს ზამთრის სუსხზე და როგორ გვაიმედებს გაზაფხულის ოცნებით.

დასრულდა ღამე და დასრულდა შოუ. რვა ეპიკური სეზონის შემდეგ, HBO-ს სამეფო კარის თამაშები დამთავრდა.

სიმართლე რომ გითხრათ, ამის დაჯერება მიჭირს. წლებმა თვალის დახამხამებაში ჩაიარა. ნუთუ ათ წელზე მეტი გავიდა იმ დღიდან, როცა ჩემმა მენეჯერმა ვინს ჯერარდისმა შეხვედრა დანიშნა ლოს-ანჯელესის პალმში? მაშინ პირველად ვესაუბრე დევიდ ბენიოფსა და დ.ბ. ვაისს ლანჩის დროს. მე მათ ვკითხე, იცოდნენ თუ არა ვინ იყო ჯონ სნოუს დედა. საბედნიეროდ, — იცოდნენ.

ასე დაიწყო ყველაფერი, რაც წუხელ დასრულდა.

იმ საღამოს, წარმოდგენაც კი არ მქონდა, რომ ვიწყებდი მოგზაურობას, რომელიც ჩემს ცხოვრებას შეცვლიდა. მანამდეც დამიწერია წიგნები და მოთხრობები ტელევიზიებისთვის და ფილმებისთვის, თუმცა, ვერ ვიფიქრებდი, რომ ამ ისტორიას არამხოლოდ გადაიღებდნენ, არამედ ის გახდებოდა მსოფლიოში ერთ-ერთი ყველაზე პოპულარული და ასევე ყველაზე ხშირად მოპარული სერიალი პირატული საიტებიდან. HBO-ს ისტორიაში კი ყველაზე წარმატებული შოუ, რომელმაც ემის რეკორდული რაოდენობა მიიღო და ნიჭიერი, მაგრამ უცნობი მსახიობები მსოფლიოს შეაყვარა.

და ყველაზე ნაკლებად იმას გავაანალიზებდი, რომ როგორღაც მეც კი გავხდებოდი პოპულარული. გულწრფელად რომ გითხრათ, ჯერ კიდევ არ მჯერა, რომ ეს მოხდა.

შეიძლება ითქვას, რომ გიჟური თავგადასავალი იყო.

მინდა მადლობა გადავუხადო ადამიანებს, მაგრამ ძალიან ბევრნი არიან. ნიუ-იორკში გამართული ფინალური სეზონის პრემიერაზე 42 მსახიობი იყო მოსული და ეს მათი სრული შემადგენლობაც კი არ იყო. და ამის გარდა გუნდი, რომლებიც ნაკლებად ცნობილები არიან, მაგრამ მნიშვნელობით მსახიობებს არ ჩამოუვარდებიან. დევიდმა და დენმა ჩემპიონების გუნდს მოუყარეს თავი. რეჟისორებიც განსაცვიფრებლები იყვნენ. მინდა დავიწყო ყველას დასახელება, მაგრამ იმდენი არიან, რომ ვინმე აუცილებლად გამომრჩება. თუმცა, მინდა დავასახელი დევიდ ბენიოფი, დენ ვაისი, ბრაინ კოგმანი და HBO-ს შთამბეჭდავი გუნდი, რომელსაც რიჩარდ პლეპერი ხელმძღვანელობდა. ნებისმიერი სხვა ტელევიზიის პირობებში, სამეფო კარის თამაშები ასეთი ვერ იქნებოდა.

შემიძლია განვაგრძო და რადგან ამ პოსტს ჩემს გონებაში ვწერ, გეტყვით, რომ სათქმელი ბევრია. განშორება მტკივნეულია. სამომავლოდ, როცა ნოსტალგია შემომაწვება, შესაძლოა გაგიმჟღავნოთ ჩემი საყვარელი მომენტები შოუდან, მაგრამ ახლა, მეტისმეტად ბევრი მოგონება მიტრიალებს თავში.

გასული ღამე იყო დასასრული და ასევე დასაწყისი. არავინ აპირებს პენსიაზე გასვლას. დევიდი და დენი Star Wars-ისა და სხვა პროექტებში ჩაერთვებიან. ამაზონმა ბრაიან კოგმანი მიითვისა, რომ საკუთარი შოუები შექმნას. ჩვენი ბრწყინვალე მსახიობები კი ქარს ოთხივე მხარეს გაყვნენ და თქვენ მათ უახლოეს წლებში ნახავთ ეკრანებზე.

და მე? რაც შემეხება მე, მე ისევ აქ ვარ და ისევ დაკავებული ვარ. როგორც პროდიუსერი, ხუთ შოუს ვქმნი HBO-ზე. ზოგ მათგანს ვესტეროსთან კავშირი არ აქვს, ორ შოუს Hulu-ზე და ერთს History Chanel-ზე. კიდევ, ვიმედოვნებ მოკლემეტრაჟიანი ფილმების გადაღებას, კლასიკური ნაწარმოებების ადაპტაციას. ვეხმარები იაპონიას ვიდეო-თამაშის შექმნაში.

და ამის გარდა... ვწერ. ზამთარი მოდის, დიდი ხნის წინ როგორც გითხარით და ის მართლაც მოდის. ვიცი და ვიცი, რომ ზამთრის ქარი ძალიან აგვიანებს, მაგრამ ის აუცილებლად დასრულდება. არ გეტყვით როდის, ერთხელ ამის თქმა ვცადე, მხოლოდ იმისთვის, რომ თქვენ გამეგიჟებინეთ და თავი დამეწყევლა... მაგრამ ის დასრულდება და შემდეგ იქნება გაზაფხულის ოცნება.

როგორ დასრულდება ის? კითხულობენ ადამიანები. იგივე დასასრული ექნება რაც შოუს? თუ განსხვავებული?

ჩემი პასუხია: კი. და არა. და კი. და ისევ არა. და ისევ კი. და ისევ არა.

არ დაგავიწყდეთ, რომ მე დევიდისგან და დენისგან განსხვავებულად ვმუშაობ. მათ ფინალური სეზონისთვის 6 საათი ჰქონდათ. მე ვფიქრობ, რომ ჩემი ბოლო ორი წიგნი 3000 ხელნაწერ გვერდს შეავსებს სანამ მოვრჩები და თუ რამე სცენის დამატება გახდა საჭირო, ამასაც დავამატებ. პეპლის ეფექტი იქნება ამ ქმნილებაშიც. თქვენ, ვინც ამ არა-ბლოგს მიყვებით, გეცოდინებათ, რომ ამაზე პირველივე სეზონიდან ვსაუბრობ. არიან პერსონაჟები, რომლებიც ვერ მოხვდნენ ეკრანებზე და ისინიც, ვინც შოუში დაიღუპნენ და წიგნში არა.

ასე რომ, მკითხველი წიგნიდან გაიგებს, რა დაემართათ ჯეინ პულს, ლედი სტოუნჰერთს, პენისა და მის ღორს, სკაჰაზ შავეპეიტს, არიანე მარტელს, დარქსტარს, ვიქტორიან გრეიჯოის, სირ გარლან გალანტს, ეიგონ მეექვსესა და კიდევ უამრავ სხვა გმირს, რომლებთაგანაც ზოგს შოუდან არ იცნობდით. და დიახ, იქ იქნებიან უნიქორნებიც... ასე რომ ვთქვათ...

რომლის დასასრული იქნება "ნამდვილი", წიგნის თუ სერიალის? ეს კითხვა უბრალოდ სისულელეა. რამდენი შვილი ჰყავს სკარლეტ ო'ჰარას?

ამაზე რას იტყვით. მე ამას დავწერ. თქვენ მას წაიკითხავთ. შემდეგ კი ყველანი დასკვნებს გამოიტანთ და ამაზე ინტერნეტში იდებატებთ.