თუ სამეფო ოჯახის შესახებ On.ge-ის სტატიებს თვალს ადევნებთ, აუცილებლად გეცოდინებათ, რომ სასექსის ჰერცოგინია მეგან მარკლი და პრინცი ჰარი პირველ შვილს ელოდებიან.

მეგანს სამეფო ოჯახისთვის განკუთვნილი წესები ისედაც არ აკლდა, თუმცა, ორსულობის გამო, მისი პროტოკოლი კიდევ უფრო გართულდა.

გაეცანით 11 წესს, რომლის დაცვაც მეგანს ორსულობის განმავლობაში და მისი დასრულების შემდეგ მოუწევს.

1. არავითარი წვეულება ბავშვის დაბადების წინ (Baby Shower)

ბავშვის გაჩენამდე ცოტა ხნით ადრე მოწყობილი წვეულებები ამერიკასა და ინგლისში ძალიან პოპულარულია, თუმცა, სამეფო ოჯახის ქონების გამო, დამატებითი საჩუქრების მიღება არამიზანშეწონილად ითვლება.

2. ბავშვის სქესის წინასწარ გამხელა? არა და არა!

დიახ, ვერც მეგანი და ვერც ჰარი წინასწარ ვერ გაამხელენ ბავშვის სქესს. თუმცა, ეს ყველაფერი არაა — ბავშვის სქესის შესახებ თავად მშობლებსაც არ ეცოდინებათ. თუმცა, გამონაკლისები არსებობს — პრინცესა დაიანა სამეფო ოჯახის წევრთაგან ის იშვიათი გამონაკლისი იყო, რომელმაც შვილის სქესი დაბადებამდე იცოდა, თუმცა, ამის შესახებ ჩარლზისთვისაც კი არ გაუმხელია.

3. მის გარშემო გამუდმებით იტრიალებენ ბებიაქალები.

იმის მიუხედავად, რომ ის ბავშვს სამშობიაროში გააჩენს, მეგანს სამეფო ბებიაქალებისა და გინეკოლოგების არმია ეყოლება, რომლებიც მასთან იქნებიან. როგორც ცნობილია, პრინცესა ქეითს სამი ბებიაქალი ჰყავდა, რომლებიც მისი ორსულობის ბოლო ტრიმესტრში ნებისმიერ დროს მზადყოფნაში იყვნენ. წესები მათზეც ვრცელდებოდა — ამ დროის განმავლობაში, ბებიაქალებს ალკოჰოლის მიღება ეკრძალებოდათ.

4. არავითარი დეკოლტე...

სამეფო ოჯახის წევრ ქალებს ორსულობისას გამოყვანილი სამოსისა და დეკოლტეს ჩაცმის უფლება არ აქვთ.

5. ... და არც ღია ფეხსაცმელი.

ეს წესიც ცოტა უცნაურია, რადგან ორსულ ქალებს ყველაზე მეტად თავისუფლება სიამოვნებთ. თუმცა, სამეფო ოჯახი აქაც ინარჩუნებს სიმკაცრეს და მის წევრებს, ორსულობის განმავლობაში, ფეხის თითების გამოჩენას უკრძალავს.

6. ბავშვის დაბადებაზე პირველ რიგში ელიზაბეტმა უნდა გაიგოს.

ვინ გაიგებს პირველი ბავშვის დაბადების შესახებ? მეგანის დედა? პრინცი ჩარლზი? არა, მეგანი და ჰარი პირველ რიგში მშობლებს ან მეგობრებს ვერ ამცნობენ სასიხარულო სიახლეს, რადგან ეს პატივი, დედოფალს ერგება. ალბათ, რომ შეიძლებოდეს, სამეფო ბავშვის დაბადებას ელიზაბეტი მეგანზე ადრეც გაიგებდა.

7. ვერც მსოფლიოს ამცნობენ მშობლები.

როგორც იცით, სამეფო ოჯახის წევრებს საერთო სოციალური ქსელები აქვთ, მაგრამ, გახარებული ჰარი შვილის დაბადების შესახებ ვერც ტვიტერზე დაწერს და ვერც ფეისბუქზე. ინფორმაციას თავდაპირველად ბუკინგემის სასახლის წინ ქალაქის მაუწყებელი გამოიტანს.

8. სამეფო შუშხუნები? კი! იქნება.

სამეფო ბავშვის დაბადებას შუშხუნები მოჰყვება, უფრო სწორად, 10 წუთის განმავლობაში თოფის 62-ჯერ გასროლა.

9. მისი შვილის ნათლობის სამოსს მეგანი ვერ აარჩევს

სამეფო ოჯახში დაბადებულ 62 ბავშვს, ნათლობისას ერთი და იგივე, ტრადიციული სამოსი ეცვათ, თუმცა ის 2004 წელს გამოცვალეს. მეგანისა და ჰარის შვილი თავისი ბიძაშვილების "გამონაცვალ" სამოსს მოირგებს.

10. "დეკრეტულ შვებულებას" სამეფო ოჯახი მხარს უჭერს

სამეფო ოჯახის წევრი დედები, შვილის გაჩენიდან მომავალი ექვსი თვის განმავლობაში ყველა სამეფო ვალდებულებისგან თავისუფლდებიან. დეკრეტული შვებულებას ჰარიც აიღებს, თუმცა, სამწუხაროდ, უფრო ხანმოკლეს, ვიდრე მეგანი.

11. მშობიარობიდან 24 საათში მეგანს იდეალურ ფორმაში ყოფნა მოუწევს

დროა, რომ ეს სასტიკი ტრადიცია სამეფო ოჯახმა ამოიღოს, რადგან, არ აქვს მნიშვნელობა რომელ ოჯახს წარმოადგენს, არცერთი ქალია ვალდებული, მშობიარობიდან 24 საათში იდეალურ ფორმაში გამოიყურებოდეს. როგორც ცნობილია, ქეითის საავადმყოფოდან გამოსვლამდე, დაწესებულებაში სამეფო ოჯახის ვიზაჟისტები შეიპარნენ, რომლებმაც მის უნაკლო გარეგნობაზე იზრუნეს.

პ.ს. თქვენი აზრით, ვინ მოერევა, მეგან მარკლი თუ სამეფო პროტოკოლი?