41-წლიანი მოგზაურობის შემდეგ, ვოიაჯერ 2-მა მზის სისტემა დატოვა და ვარსკვლავთშორის სივრცეში შეაბიჯა. ეს არის ადამიანის მიერ შექმნილი მეორე ხომალდი, რომელაც მზის სისტემა დატოვა. NASA-მ აღნიშნული ინფორმაცია ოფიციალურ განცხადებაში უკვე დაადასტურა.

ვოიაჯერ 2 NASA-მ 1977 წლის 20 აგვისტოს, სატურნისა და იუპიტერის შესასწავლად ვოიაჯერ 1-ის გაშვებამდე 16 დღით ადრე გაუშვა. პირველადი მისიის წარმატებით შესრულების შემდეგ ვოიაჯერ 2-ის მისია გაგრძელდა და ის უკვე ურანისა და ნეპტუნისკენ გაემართა. მათი შესწავლის შემდეგ კი, 1989 წლიდან ვოიაჯერ 2-მა, მის ტყუპ ხომალდ ვოიაჯერ 1-თან ერთად გეზი ვარსკვლავთშორისი სივრცისკენ აიღო.

"ისტორიაში მეორედ, ადამიანის მიერ შექმნილმა ობიექტმა მზის სისტემა დატოვა და ვარსკვლავთშორის სივრცეში გაემართა. ვოიაჯერ 2 ჰელიოსფეროს საზღვრებს უკვე გასცდა", - ნათქვამია NASA-ს განცხადებაში.

ვოიაჯერ 2-ის მიერ გადაღებული ნეპტუნი და მისი მთვარე ტრიტონი

ვოიაჯერ 2-ის მიერ გადაღებული ნეპტუნი და მისი მთვარე ტრიტონი

ფოტო: Voyager 2/ARC/NASA

აღსანიშნავია, რომ ხომალდს მზის სისტემა "სრულად" ჯერ კვლავ არ დაუტოვებია - ვოიაჯერ 2 ვარსკვლავთშორის სივრცეში შევიდა, მან შეაღწია იმ რეგიონში, სადაც მზიური ქარი პრაქტიკულად ვეღარ აღწევს.

ვოიაჯერ 1-ის შემთხვევაში, აღნიშნული ფაქტის დადასტურებას თითქმის ერთი წელი დასჭირდა. თუმცა, ვოიაჯერ 2-ის გარშემო ჰელიოსფეროსთვის დამახასიათებელი ნაწილაკების რაოდენობა უკვე რამდენიმე თვეა, რაც იკლებდა, რის გამოც ცხადი იყო, რომ ის მზის სისტემას მალე დატოვებდა. დეკემბერში კი აღნიშნული ნაწილაკების რაოდენობამ კიდევ უფრო მეტად იკლო.

გრაფიკი, რომელზეც ჰელიოსფეროსთვის დამახასიათებელი ნაწილაკების თანდათანობით ვარდნას ვხედავთ

გრაფიკი, რომელზეც ჰელიოსფეროსთვის დამახასიათებელი ნაწილაკების თანდათანობით ვარდნას ვხედავთ

ფოტო: NASA/JPL

ვოიაჯერ 1-ისგან განსხვავებით, ვოიაჯერ 2-ის დაბალი ენერგიის მქონე ნაწილაკების აღმომჩენი ხელსაწყო კვლავ გამართულად მუშაობს, რაც ნიშნავს, რომ 40 წლის წინანდელი ხომალდისგან ვარსკვლავთშორის სირვცეზე ახალი ტიპის ინფორმაციის მიღებას შევძლებთ.

"ინფორმაცია, რომელსაც ახლა ვიღებთ სრულებით ახალია. ვოიაჯერ 1-მა ჰელიოსფერო 2012 წელს დატოვა, თუმცა ამ ხომალდზე გარკვეული ინსტრუმენტები მწყობრიდან იყო გამოსული. მსგავსი მონაცემები, რომელსაც ვოიაჯერ 2-სგან ვიღებთ, ამ დრომდე არ გვქონია", - აცხადებს მასაჩუსეტსის ტექნოლოგიური ინსტიტუტის მეცნიერი ჯონ რიჩარდსონი.

ვოიაჯერი ხომალდზე განთავსებული ოქროს ფირფიტით არის ცნობილი, რომელზეც დედამიწის ხმები და სურათებია ჩაწერილი.