უახლესი სტანდარტებით აღჭურვილი ტექინსპექტირების 26 ცენტრი, მობილური, გადაადგილებადი სადგური მთიანი რეგიონებისთვის, 350 ახალი სამუშაო ადგილი თბილისსა და რეგიონებში, სწრაფი და კომფორტული ტექინსპექტირების სერვისი - ეს კომპანია გრინვეი საქართველოს უახლოესი მიზნებია, რომელიც კომპანიამ გუშინ მედიას და საზოგადოებას გააცნო.

გრინვეი საქართველო ახალი ქართული კომპანიაა და ყველა ამ მიმართულებით ის უკვე აქტიურად მუშაობს. 2 ოქტომბერს, სასტუმრო რუმსში, გრინვეი საქართველოს კომერციულმა დირექტორმა თეონა ჭკადუამ და კომპანიის ტექნიკურმა დირექტორმა ლევან აბრამიშვილმა, კომპანიის სტრატეგიულ პარტნიორ, საერთაშორისო კომპანია Applus+ automotive-ის ვიცე პრეზიდენტ ჰანს-იურგენ შიმპგენთან ერთად დეტალურად ისაუბრეს გრინვეი საქართველოს მიერ უკვე შესრულებულ და დაგეგმილ სამუშაოებზე.

როგორც ცნობილია, საქართველომ, ასოცირების ხელშეკრულების ფარგლებში, აიღო ვალდებულება განახორციელოს ავტომანქანების ტექდათვალიერების რეფორმა. 1 ოქტომბრიდან ტექდათვალიერება უკვე სავალდებულო გახდა 3.0 და მეტი ძრავის მქონე მანქანებისთვის, 1 იანვრიდან კი - ყველა სხვა სატრანსპორტო საშუალებებისთვის.
გრინვეი საქართველოს უმთავრესი მიზანია ტექდათვალიერების აუცილებელი პროცესი გახადოს მაქსიმალურად სწრაფი და უსაფრთხო. ამიტომ მათთვის ძალიან მნიშვნელოვანია საერთაშორისო გამოცდილება და ძლიერი პარტნიორი.

"საქართველოში დაწყებულია პროცესი, რომელიც მიზნად ისახავს ავტომობილების ტექდათვალიერების ხარისხის ევროპულ სტანდარტთან შესაბამისობაში მოყვანას. ეს კი რამდენიმე მიმართულებით არის მნიშვნელოვანი, რადგან გულისხმობს ქვეყანაში ეკოლოგიური მდგომარეობის გაუმჯობესებას და გზებზე უბედური შემთხვევების შემცირებას. ამ მიზნების მისაღწევად კი მნიშვნელოვანია საერთაშორისო სტანდარტებზე დაფუძნებული, გამოცდილი სერვისის შექმნა", - განაცხადა კომპანია Applus+ automotive -ის ვიცე პრეზიდენტმა ჰანს-იურგენ შიმპგენმა.

შიმპნგენის თქმით, სწორედ ამ მიზნით, გრინვეი საქართველო ოპერირებას იწყებს ამ სფეროში მსოფლიოს ლიდერ კომპანიასთან Applus+ თანამშრომლობით, რომელიც 70 ქვეყანაშია წარმოდგენილი და დიდი გამოცდილება აქვს ავტომობილების ტექდათვალიერების სფეროში. სწორედ მის სახელს უკავშირდება იმ საერთაშორისო სტანდარტების დამკვიდრება, რაც უსაფრთხო და სანდო ტექდათვალიერების ცენტრების აუცილებელი პირობაა.

"ამ თანამშრომლობით საფუძველი ჩაეყრება თანამედროვე, ევროპული ტიპის ტექდათვალიერების ცენტრების ქსელის შექმნას მთელი საქართველოს მასშტაბით. გრინვეის ყავს პროფესიონალი გუნდი, რომელიც იქნება საიმედო მრჩეველი და თითოეულ მოქალაქეს გაუადვილებს ტექდათვალიერების აუცილებელ პროცესს,“ - ამბობს ჰანს-იურგენ შიმპგენი.

"Applus+-ის მასშტაბის კომპანიის შემოსვლა ქართულ ბაზარზე ძალიან მნიშვნელოვანი ფაქტია და თავისთავად გულისხმობს, რომ გრინვეი საქართველოს მომსახურება იქნება საერთაშორისო სტანდარტების შესაბამისი, რომლის მთავარი უპირატესობა სწრაფი, სანდო, მოქნილი და უსაფრთხო სერვისის უზრუნველყოფა იქნება" - განაცხადა გრინვეი საქართველოს კომერციულმა დირექტორმა, თეონა ჭკადუამ.

გრინვეი საქართველომ ასევე პარტნიორული ურთიერთობა დაამყარა მსოფლიოში წამყვან, ავტოტექინსპექტირების აღჭურვილობის მწარმოებელ კომპანიასთან Actia, რაც კომპანიას საშუალებას აძლევს ტექდათვალიერების პროცესი, ტექნოლოგიური კუთხით, პასუხობდეს ყველა თანამედროვე საერთაშორისო სტანდარტს.

თეონა ჭკადუა აღნიშნავს, რომ გრინვეი საქართველოს ერთ-ერთი სტრატეგიული მიზანია ჩამოაყალიბოს საუკეთესო სპეციალისტების, თანამედროვე სტანდარტებით მომზადებული პროფესიონალთა ძლიერი გუნდი. ესპანეთში, Applus+ ცენტრალურ ოფისში უკვე გადამზადდა კომპანიის ტექნიკური ჯგუფი. ეს პროცესი გაგრძელდება და კომპანიაში დასაქმებული ადამიანების პროფესიულ განვითარებას სისტემატიური ხასიათი ექნება.

ამ ეტაპზე კომპანიის მოსამზადებელი სამუშაოები აქტიურ ფაზაშია. წლის ბოლოსთვის, სახელმწიფოსთან აღებული ვალდებულებებით განსაზღვრულ ვადებში, საქართველოს სხვადასხვა რეგიონში 26 სადგური სრულ მზადყოფნაში იქნება. პარალელურად მიმდინარეობს ახალი სამუშაო ადგილების შექმნა და გრინვეი საქართველოს გუნდის წევრების მოძიება მთელი საქართველოს მასშტაბით.