Google Glass-მა საშუალო სტატისტიკურ მომხმარებლებში საკმარისი პოპულარობა ვერ მოიპოვა, თუმცა მალე ის შეიძლება აუტიზმის სპექტრის მქონე ბავშვებისთვის მნიშვნელოვანი მოწყობილობა გახდეს.

ახლახან გამოქვეყნებულ სტატიაში აღწერილია, რომ ვირტუალური რეალობის გამოყენება აუტიზმის მქონე ბავშვებს ყოველდღიურ ცხოვრებაში მნიშვნელოვნად ეხმარება.

მეცნიერების ჯგუფმა Google Glass და ანდროიდის სმარტფონი გააერთიანა, ამის საშუალებით კი მათ ახალი სისტემა, Superpower Glass შექმნეს. პროგრამა ხელოვნური ინტელექტით არის აღჭურვილი, რომელსაც სწავლების უნარი აქვს. ის ბავშვებს სხვადასხვა სოციალურ გარემოში მყოფი ადამიანების ემოციების განსაზღვრაში დაეხმარება. აუტიზმის მქონე ბავშვებს სხვა ადამიანების ემოციების აღქმა განსაკუთრებით უჭირთ.

კვლევის ფარგლებში ახალ პროგრამას 14 ბავშვი ორი თვის განმავლობაში ცდიდა. ბავშვთა ასაკი 3-დან 17 წლამდე მერყეობდა, მათ მოწყობილობა ორ სხვადასხვა რეჟიმში გამოიყენეს. კვლევის ბოლოს კი დადგინდა, რომ მოწყობილობის გამოყენების შედეგად ბავშვები სოციალური უნარებთან შეუთავსებლობის ტესტში დაახლოებით 7.5 ქულით ნაკლებს იღებდნენ. მაღალი ქულა უფრო ძლიერად გამოხატულ აუტიზმზე მიუთითებს, დაბალი კი - პირიქით. ჯგუფიდან ექვსმა ბავშვმა კი ტესტში იმდენად დაბალი (უკეთესი) შედეგი აჩვენა, რომ აუტიზმის უფრო ნაკლებად მწვავე კატეგორიაში გადაინაცვლა.

ფოტო: STEVE FISCH/STANFORD SCHOOL OF MEDICINE

"ოჯახების ნაწილმა განაცხადა, რომ ბავშვის ქცევა რადიკალურად შეიცვალა", - ამბობს კვლევის ხელმძღვანელი დენის ვოლი, - "მათ მშობლებთან მზერითი კონტაქტის დამყარება შეძლეს".

მეცნიერები ამბობენ, რომ დამაიმედებელ შედეგებთან ერთად ისიც უნდა გავითვალისწინოთ, რომ ექსპერიმენტში საკონტროლო ჯგუფი არ მონაწილეობდა, რაც მოწყობილობის გავლენის განსაზღვრას ართულებს. შემდეგი ეტაპი უფრო ფართო, 70-ბავშვიანი ექსპერიმენტის ჩატარებაა.

ვოლისა და მისი კოლეგების მიერ შექმნილ პროგრამას ადამიანებში სიხარულის, სევდის, გაბრაზების, გაოცების და სხვა ემოციების ამოცნობა შეუძლია. სათვალე კი ბავშვს გარშემო მყოფი ადამიანების ემოციურ მდგომარეობას ატყობინებს. სათვალეში ჩამონტაჟებული თამაშის ფარგლებში, ბავშვებმა მშობლებს უნდა შეხედონ და მათ სახეზე არსებული ემოცია გამოიცნონ.

ვოლი ვარაუდობს, რომ Superpower Glass კომერციულად ხელმისაწვდომი მომავალ წელს გახდება, მანამდე კი კომპანიამ ასეთი მოწყობილობის გაყიდვის ლიცენზია უნდა მოიპოვოს.