ამერიკის შეერთებული შტატების პრეზიდენტმა, დონალდ ტრამპმა 21 ივნისს ხელი მოაწერა აქტს, რომელიც კრძალავს არასრულწლოვანი და ჩვილი ბავშვების წართმევას მიგრანტებისათვის, რომლებმაც უკანონოდ გადაკვეთეს საზღვარი.

საქმე ისაა, რომ დონალდ ტრამპის გამარჯვების შემდეგ, მისი წინასაარჩევნო დაპირებების მიხედვით, აშშ-ს საემიგრაციო პოლიტიკაში არაერთი ცვლილება შევიდა. მათ შორის, 5 მაისს ძალაში შევიდა შესწორება, რომელიც ამერიკელ სამართალდამცავებს და საემიგრაციო სამსახურს აძლევდა უფლებას არალეგალი მიგრანტებისათვის ჩამოერთვათ არასრულწლოვანი შვილები.

შესწორების ამოქმედების დღიდან რამდენიმე ათასი ბავშვი მშობელს დააშორეს. მშობლები და ბავშვები ამერიკის საემიგრაციო სამსახურის სხვადასხვა დაწესებულებებში, ერთმანეთისგან მრავალი კილომეტრის მოშორებით აღმოჩნდნენ. მათ ერთმანეთის შესახებ ინფორმაცია არ ჰქონდათ.

ტრამპის აქტით, აშშ-ს შესაბამისს სამსახურებს იგივე უფლება აღარ ექნებათ და ოჯახები აღარ დაიშლებიან.

"საუბარია იმაზე, რომ ოჯახები იყვნენ ერთად და ერთმანეთს აღარ დავაშოროთ", - განაცხადა ტრამპმა აქტზე ხელის მოწერის შემდეგ.

ერთ-ერთი საპროტესტო აქცია ოჯახების განშორების წინააღმდეგ

ერთ-ერთი საპროტესტო აქცია ოჯახების განშორების წინააღმდეგ

ფოტო: NPR.org

აქტის მიხედვით, ბავშვები დარჩებიან მშობლებთან ერთად და აღარ მოათავსებენ საპყრობილეებში იმ დრომდე, სანამ სასამართლოს გადაწყვეტილება არ იქნება. იგივე დოკუმენტის მიხედვით, საემიგრაციო სამსახურს გამონაკლისის სახით მაინც შეეძლება არასრულწლოვანი ჩამოართვას მშობელს თუ კი მშობელთან ყოფნა ბავშვისთვის სასიცოცხლო და ჯანმრთელობის რისკებს შეიცავს. ამავე აქტის მიხედვით, ოჯახების შემთხვევას პრიორიტეტი მიენიჭება და მათ სასამართლო დაჩქარებული და სპეციალური წესით განიხილავს.

"საშინლად არ მომეწონა ის კადრები, რომლებიც ვნახე", - განაცხადა ტრამპმა, თუმცა იქვე დასძინა, რომ კვლავ ემხრობა იმ ადამიანების სისხლის სამართლის პასუხისგებას ვინც უკანონოდ გადაკვეთა აშშ-ს სახელმწიფო საზღვარი.

ტრამპის თქმით, ახალი აქტის მიღება გაუხარდა მის მეუღლეს მელანიას და მის შვილს ივანკას. გავრცელებული ინფორმაციის თანახმად, ივანკა და მელანია ტრამპი ბოლო დღეების განმავლობაში აქტიურად სთხოვდნენ დონალდ ტრამპს შეწყვიტა ამგვარი პოლიტიკა.

წარმომადგენელთა პალატაში, რესპუბლიკური პარტიის ლიდერის პოლ რაიანის თქმით, აქტზე მსჯელობა დღეს გაიმართება.

მანამდე განვითარებული მოვლენები

აპრილში აშშ-ს გენერალურმა პროკურორმა, ჯეფ სეშენსმა განაცხადა, რომ ამიერიდან იმ ადამიანების წინააღმდეგ ვინც უკანონოდ გადაკვეთავს სახელმწიფო საზღვარს სისხლის სამართლის საქმე აღიძვრებოდა და სასამართლომდე ისინი იქნებოდნენ დაპატიმრებულები.

ამერიკის კანონმდებლობის თანახმად, არასრულწლოვნების დაპატიმრება წინასწარი დაკავების სახით აკრძალულია და ამ მიზეზით, ბავშვები საემიგრაციო სამსახურის სხვა დაწესებულებებში იგზავნებოდნენ.

აშშ-ს საემიგრაციო სამსახურის ცნობით, 5 მაისიდან დღემდე 2 200 არალეგალ მშობელს 2 300 ბავშვი ჩამოართვეს.

მალევე, სოციალურ ქსელებში გავრცელდა მშობლებს დაშორებული ბავშვების ფოტოები და აუდიოჩანაწერები. გავრცელებულ კადრებში ბავშვები ტირიან და მშობლებს ეძახიან.

ორი წლის ჰონდურასელი ბავშვი მას შემდეგ, რაც ის დედას დააშორეს

ორი წლის ჰონდურასელი ბავშვი მას შემდეგ, რაც ის დედას დააშორეს

ფოტო: John Moore

არალეგალი დედა-შვილი დაკავების მომენტში

არალეგალი დედა-შვილი დაკავების მომენტში

ფოტო: John Moore/

არალეგალი დედა შვილი განშორებამდე რამდენიმე წუთით ადრე

არალეგალი დედა შვილი განშორებამდე რამდენიმე წუთით ადრე

ფოტო: John Moore

შექმნილი ვითარების გამო აშშ-ს პრეზიდენტი თითქმის ყველა პოლიტიკურმა ჯგუფმა გააკრიტიკა. პრეზიდენტის ნაბიჯები უარყოფითად შეაფასა საერთაშორისო თანამეგობრობამაც. ტრამპის გადაწყვეტილება მწვავედ გააკრიტიკეს დიდი ბრიტანეთის, კანადის, გერმანიის და მექსიკის პირველმა პირებმა.

სად მიჰყავდათ ბავშვები

მშობლებს დაშორებულ ბავშვებს წინასწარი დაკავების იზოლატორებში, საპატიმრო დაწესებულებასა და ბანაკებში.

წინასწარი დაკავების იზოლატორები

დაპატიმრების წუთიდან ბავშვები აშშ-ს სასაზღვრო სამსახურის სპეციალურ შენობებში არიან. აქ ბავშვების ყოფნის მაქსიმალური ვადა სამი დღით განისაზღვრება.

ბავშვების თავშესაფარი რიო გრანდეში, ტეხასი

ბავშვების თავშესაფარი რიო გრანდეში, ტეხასი

ფოტო: John Moore

საპატიმრო დაწესებულებები

3-დღიანი ვადის შემდეგ ბავშვები იგზავნებიან, ამერიკის დევნილთა ბიუროს სხვადასხვა დაწესებულებებში, ასეთი დაწესებულებების რიცხვი 100-ს აღემატება. დევნილთა ბიუროს ინფორმაციით, აქ 10-დან 17 წლამდე ბავშვები.

დაწესებულება ბავშვებისთვის, კარნეს სითი, ტეხასი

დაწესებულება ბავშვებისთვის, კარნეს სითი, ტეხასი

თავშესაფარები

გამოცემა Associated Press-ის ინფორმაციით, ჩვილ და ხუთ წლამდე ბავშვებს ტეხასის ჩრდილოეთში მდებარე სპეციალურ თავშესაფრებში აგზავნიან.

ბანაკები

ამერიკის საემიგრაციო სამსახურმა რამდენიმე თვის წინ გახსნა კარვების ახალი ბანაკი მიგრანტებისათვის, ქალაქ ტორნილოს მახლობლად ტეხასის შტატში.

მიგრანტთა კარვების ბანაკი ტორნილო, ტეხასი

ფოტო: Reuters

ამერიკული კანონმდებლობის მიხედვით, ბავშვები სახელმწიფო ზედამხედველობიდან მაქსიმალურად სწრაფად უნდა გათავისუფლდნენ და შეუერთდნენ ოჯახებს. ამისთვის ორგანიზებულია სპეციალური ცხელი ხაზი, რომელიც გათავისუფლების შემდეგ მშობლებს აძლევს ინფორმაციას მათი შვილის ადგილსამყოფელის შესახებ.

ბარაკ ობამას პრეზიდენტობის განმავლობაში ბავშვებთან ერთად დაკავებულ არალეგალ მიგრანტებს გადაეცემოდათ უწყება სასამართლოდან და პროცესამდე მათ ათავისუფლებდნენ.

დღეიდან ბავშვების საკითხი უმთავრესად ამერიკის სასამართლოებში გადაწყდება. რესპუბლიკური პარტიისთვის ტრამპის გადაწყვეტილება გააუქმოს ძველი პოლიტიკა სასარგებლო იქნება ვინაიდან, ნოემბერში კონგრესის შუალედური არჩევნები უნდა გაიმართოს.