აშშ-ის სანქციების საპასუხო ქმედებებისთვის რუსეთის დუმაში კანონპროექტი შეიტანეს, წერს BBC-ის რუსული სამსახური. დეპუტატებს სურთ, რომ აშშ-დან მედიკამენტების, სიგარეტებისა და ალკოჰოლის იმპორტი აკრძალონ. ასევე, აიკრძალოს რუსეთში წარმოებული სარაკეტო ძრავების აშშ-ში გატანა.

ამავე დროს კანონპროექტი შეეხება იმ ქვეყნებსაც, რომლებიც ოლიგარქების წინააღმდეგ სანქციებს მხარს უჭერენ და სირიის საკითხზე ვაშინგტონის პოზიციას იზიარებენ.

დეპუტატებს სურთ, რომ აშშ-ის მოქალაქეებს რუსეთში მუშაობის უფლება შეუზღუდონ.

როგორც დეპუტატები ამბობენ, კანონპროექტის განხილვა დუმაში 16 აპრილს დაიწყება. თუმცა დოკუმენტის ძალაში შესვლით, ყველა პროდუქცია ერთბაშად არ აიკრძალება.

აკრძალული პროდუქტების შესახებ გადაწყვეტილებას პრეზიდენტი მიიღებს, ხოლო მთავრობა აამოქმედებს.

აკრძალვაში შეიძლება მოხვდეს

იმპორტი:

  • პროგრამული და საინფორმაციო ტექნოლოგიების შეძენა აშშ-სა და სხვა ქვეყნებისგან, მუნიციპალურ დაწესებულებებისგან და ზოგიერთ ორგანიზაციისგან;
  • მედიკამენტები, რომელთა ანალოგი რუსეთშიც მზადდება;
  • ამერიკული თამბაქოს ნაწარმი და ალკოჰოლი;
  • სოფლის მეურნეობის პროდუქცია და საკვები პროდუქტები, რომელთა წარმოშობის ქვეყანაა აშშ ან/და ის ქვეყნები, რომლებიც ვაშინგტონის პოზიციას იზიარებენ;
  • იშვიათი ლითონები, ნედლეული.

ექსპორტი:

  • ურანი (შესაძლოა, ბირთვულ სფეროში თანამშრომლობა შეწყდეს);
  • სარაკეტო ძრავები, რომლებსაც რუსული კომპანიები აწარმოებენ.

აშშ-ის სანქციები

აშშ-მ რუსი ბიზნესმენებისა და რუსული კომპანიების წინააღმდეგ ახალი სანქციები 6 აპრილს აამოქმედა. აშშ-ის პერსონალური სანქციების სიაში შვიდი რუსი ოლიგარქი მოხვდა. ასევე სახელმწიფო მოხელეები, ჩინოვნიკები და რადენიმე კომპანია.

ამერიკულმა ჟურნალმა ფორბსმა დაწერა, რომ ახალი სანქციების მონაწილე რუსმა ბიზნესმენებმა მხოლოდ ორშაბათს, 9 აპრილს, დღის პირველ ნახევარში, ჯამში სამი მილიარდი დოლარი დაკარგეს. ხოლო ზოგადად, ფორბსის სიაში შემავალმა ყველა რუსმა ოლიგარქმა ერთად (მათი ჩათვლით, ვისაც სანქციები არ შეეხო) საერთო ჯამში 14 მილიარდი დოლარი დაკარგა.