2018 წელი დატვირთულია საინტერესო კინოპრემიერებით. შეიძლება ითქვას, რომ წელს განსაკუთრებით ბევრია ისეთი პროექტი, რომელსაც მაყურებელი და კინოჟურნალისტები ერთნაირად ელიან.

ვაიოლა დევისი და სტივ მაქუინი

12 Years A Slave-ის შემდეგ სტივ მაქუინი ახალ ფილმს ვაიოლა დევისთან ერთად იღებს. კინოსურათს Widows ჰქვია და ის ვერონიკას (ვაიოლა დევისი) ისტორიას მოგვითხრობს, რომელიც გადაწყვეტს, რომ ქმარი მოკლას. ვაიოლასთან ერთად ფილმში Get Out-ის ვარსკვლავი დანიელ კალუია, კერი კუნი და კოლინ ფარელი თამაშობენ.

ბარი ჯენკინსი და რეგინა კინგი

Moonlight-ის რეჟისორი ბარი ჯენკინსი ჯეიმს ბოლდუინის წიგნის If Beale Street Could Talk ადაპტაციას გადაიღებს. ფილმის სიუჟეტი მოგვითხრობს ტიშის, ახლად დაქორწინებული ქალის ისტორიას, რომელიც თავისი საყვარელი მამაკაცის უდანაშაულობის დამტკიცებას ცდილობს. ფილმი წყვილის სიყვარულს, მათ ცხოვრებასა და სამართლიანობისთვის ბრძოლას ეხება.

დამიენ შაზელი და რაიან გოსლინგი

ახალ ბიოგრაფიულ ფილმში რაიან გოსლინგი ამერიკელი ასტრონავტის ნილ არმსტრონგის როლს შეასრულებს. კინოსურათის შემქმნელი La La Land-ის რეჟისორი დემიენ შაზელია. ფილმში გოსლინგთან ერთად კლერ ფოი თამაშობს მსოფლიო პრემიერა კი 2018 წლის 11 ოქტომბერს არის დაგეგმილი.

ლუკა გუადანინო და ტილდა სუინტონი

მანამ სანამ გუადანინო Call Me By Your Name-ის გაგრძელებას გადაიღებს, რეჟისორმა გადაწყვიტა დარიო არგენტოს Suspiria-ს რიმეიქს გადაიღებს, რომელშიც მთავარ როლს ტილდა სუინტონი ითამაშებს.

რობ მარშალი და ემილი ბლანტი

2018 წელს ეკრანზე რეჟისორ რობ მარშალის მიერ გადაღებული მერი პოპინსის ახალი ვერსია გამოვა. პრინციპში, ახალ ვერსიაზე მეტად, ეს ისტორიის გაგრძელება იქნება. მერი პოპინსი ბრუნდება - ასე ერქმევა ფილმს, რომელშიც მერი პოპინსის როლს მსახიობი ემილი ბლანტი ასრულებს. მასთან ერთად ფილმში მერილ სტრიპს, კოლინ ფერტს, ბენ ვიშოუს, ანგელა ლენსბერნს, დიკ ვან დაიკსა და ჯული უოლტერსაც ვიხილავთ.

ჯულია რობერტსი და პიტერ ჰეჯესი

2018 წელს მსოფლიო ეკრანებზე რეჟისორისა და სცენარისტის პიტერ ჰეჯესის ახალი ფილმი Ben is Back გამოვა, რომელშიც ოსკარის მფლობელი მსახიობი ჯულია რობერტსი და Manchester By the Sea-ს ვარსკვლავი ლუკას ჰეჯესი დედა-შვილის როლს შეასრულებენ. სიუჟეტის ეპიცენტრში ბენ ბერნსი (ლუკას ჰეჯესი) და ჰოლი ბერნსი (ჯულია რობერტსი) არიან.

ბენი ახალი წლის ღამეს სახლში ბრუნდება, ჰოლის ძალიან უხარია შვილის გამოჩენა, თუმცა ხვდება რომ მის თავს რაღაც უბედურება ხდება. დრამის სიუჟეტი ერთი დღე ღამის განმავლობაში ვითარდება და რობერტსის პერსონაჟი ცდილობს მისი ოჯახი ყველაზე დიდ ტრაგედიას ააცილოს.

იორგოს ლანთიმოსი და ემა სტოუნი

იორგოს ლანთიმოსი ახალ ფილმს ემა სტოუნის, ოლივია კულმანისა და რეიჩელ უეისის მონაწილეობით გადაიღებს. კინოსურათის სიუჟეტი მე-18 საუკუნის ინგლისში ვითარდება და დედოფალ ანას შესახებ მოგვითხრობს.

ქეით ბლანშეტი და რიჩარდ ლინკლეიტერი

ოსკარის ნომინანტი რეჟისორი, Boyhood-ისა და Before ტრილოგიის ავტორი (Before Sunrise, Before Sunset და Before Midnight), რიჩარდ ლინკლეიტერი ახალ ფილმზე მუშაობს.

Where'd You Go, Bernadette ასე ჰქვია კინოსურათს, რომელშიც მთავარ როლს ქეით ბლანშეტი შეასრულებს. ფილმი მარია სემპლის ბესტსელერი რომანის ადაპტაცია იქნება. ამ ისტორიის ეპიცენტრში აგორაფობიით (გაშლილი სივრცის შიში) შეპყრობილი ბერნადეტ ფოქსია (ქეით ბლანშეტი), რომელიც სახლიდან მას შემდეგ გარბის, რაც გაიგებს, რომ მისი ოჯახი არდადეგების გატარებას ანტარქტიდაზე გადაწყვეტს. ბერნადეტი ქრება, ოჯახი კი მის მოძებნას გადაწყვეტს, რა დროსაც ყველაზე დიდ საიდუმლოებებს მიაგნებენ.

სებასტიან ლელიო და ჯულიანა მური

ლელიოს ფილმმა, A Fantastic Woman, 2018 წლის ოსკარზე საუკეთესო უცხოენოვანი ფილმის ნომინაციაში გაიმარჯვა. რეჟისორი ამჯერად 2013 წელს, თავისივე გადაღებული ფილმის რიმეიქს იღებს. Gloria - ასე ჰქვია კინოსირათს, რომელიც შუახნის ასაკის ქალის შესახებ მოგვითხრობს.

კარინ კუსამა და ნიკოლ კიდმანი

კარინ კუსამამ ახალ ფილმის, Destroyer, გადაიღებები დაიწყო, რომელშიც მთავარ როლს ოსკარის მფლობელი მსახიობი ნიკოლ კიდმანი ასრულებს. ფილმს სცენარი ფილ ჰეის და მეთ მანფრიდს ეკუთვნით, სიუჟეტი კი ლოს-ანჯელესის პოლიციაში ვითარდება. კალიფორნიელი დეტექტივი ერინ ბელი (კიდმანი) ტრაგიკულ და საიდუმლოებით მოცული მკვლელობებს იძიებს, რომელიც რელიგიურ კულტსა და დემონურ ძალებს უკავშირდება.

ასგარ ფარჰადი და პენელოპე კრუზი

რეჟისორი ასგარ ფარჰადი ესპანურენოვან დრამას გადაიღებს. ფილმის სიუჟეტი ცოლ-ქმრის ისტორიას მოგვითხრობს. მთავარ როლებს კი პენელოპე კრუზი და ხავიაერ ბარდემი შეასრულებენ.

კლერ ფოი და ფედ ალვარესი

2018 წლის ოქტომბერში ეკრანზე ფილმის გოგონა დრაკონის ტატუთი ახალი ნაწილი გამოვა, რომელსაც Sony Pictures გადაიღებს. ფილმს გოგონა ობობას ქსელში ჰქვია და მას მილენიუმის მეოთხე წიგნის მიხედვით გადაიღებენ. ფილმში მთავარ როლს სერიალ The Crown-ის ვარსკვლავი კლერ ფოი შეასრულებს.