ჰარვი ვაინშტაინი, შაკირა, მადონა, ჯასტინ ტიმბერლეიკი, ნიკოლ კიდმანი - მათი სახელები სამოთხის დოკუმენტებში ფიგურირებს. ზოგიერთი მათგანი ახალბედაა, ზოგიერთი კი დიდი ხანია ოფშორში ქონებას ფლობს.

როგორიც არ უნდა იყოს მოტივი, არაფერია უკანონო იმაში, რომ ფული ოფშორში გადაიტანო და არც იმის მტკიცებაა შესაძლებელი, რომ რომელიმე ზევით ჩამოთვლილ ცნობილ ადამიანს რაიმე უკანონობის ჩადენა სურდა. მაგრამ ბოლო პერიოდში ინდუსტრიამ ევოლუცია განიცადა და გეომეტრიული პროგრესიით გაიზარდა, ამიტომაც ოფშორების მიმართ დამოკიდებულებაც მკვეთრად შეიცვალა. ძირითადი მიზეზი, რის გამოც მდიდარი ადამიანები ოფშორში ინვესტიციებს აბანდებენ დაბალი გადასახადებია.

ჰარვი ვაინშტაინი

ფოტო: Getty Images

სექსუალურ შევიწროებაში დადანაშაულებულმა, ჰოლივუდელმა პროდიუსერმა ჰარვი ვაინშტაინმა ინვესტიცია ჩადო ბერმუდაში Scientia Health Group Ltd-ში, რომელიც ახლა აღარ ფუნქციონირებს. კომპანიის წილები ვაინშტაინმა 2001 წელს მიიღო.

საკონტაქტო პირად მას მითითებული ჰყავს რიჩარდ კონიგსბერგი, რომელიც ვაინშტაინ კომპანის ერთ-ერთი რეჟისორია. ჯერ კიდევ უცნობია პროდიუსერმა გაყიდა თუ არა Scientia-ს წილი, სანამ ბიზნესიდან გამოვიდოდა. როგორც The Guardian წერს, ვაინშტაინს ამ კითხვაზე არ უპასუხია.

მადონა

ფოტო: Getty Images

გამჟღავნებულ დოკუმენტებში მადონას სახელი 31 დოკუმენტში ფიგურირებს. დოკუმენტებში ნახსენებია Ciccone, Madonna (ჩიკონე, მადონა). მადონას სრული სახელი და გვარია მადონა ლუიზა ჩიკონე. ის რომ, დოკუმენტებში მადონას სახელია ნახსენები იმითაც მყარდება მფლობელის მიერ მითითებული მისამართით: Provident Financial Management-ის მანჰეტენის ოფისი. ეს კომპანია კონცერტებისა და გამოსვლების ორგანიზებით არის დაკავებული და ხშირად პოპის დედოფალთანაც უთანამშრომლია.

დოკუმენტებში მითითებულია, რომ მადონა ბერმუდაში დაარსებული SafeGard Medical Ltd-ს ორი ათასი აქცია 1998 წელ შეიძინა. უცნობია გაყიდა თუ არა მადონამ აქციები მანამ, სანამ 2013 წელს კომპანია დაიშლებოდა. როგორც The Guardian წერს, ისინი მადონას წარმომადგენელსაც დაუკავშირდნენ, მაგრამ კითხვებზე პასუხი ვერ მიიღეს.

ჯასტინ ტიმბერლეიკი

ფოტო: Rolling Stones

2015 წლის აგვისტოში მუსიკოსმა და მსახიობმა ჯასტინ ტიმბერლეიკმა დააფუძნა კომპანია Delaware. სამოთხის დოკუმენტების მიხედვით, კომპანიის ერთადერთ წევრად ტიმბერლეიკია დასახელებული, ხოლო მომღერლის ბუღალტერი მენეჯერად.

დოკუმენტებიდან ირკვევა, რომ კომპანიის დაარსების მიზანი ბაჰამებზე უძრავი ქონების შეძენა-გაყიდვაა. უცნობია რატომ არის კომპანიის მუშაობის სქემა დაფარული და ამასთან დაკავშირებით მომღერალმაThe Guardian-ის კითხვებსაც არ უპასუხა.

ნიკოლ კიდმანი

მსახიობმა ნიკოლ კიდმანმა და მისმა ქმარმა კიტ ურბანმა ბაჰამის კუნძულებზე კომპანია 2015 წელს დაარსეს. როგორც დოკუმენტებიდან ირკვევა, ამით მათ საგადასახადო თანხების დაზოგვა სურდათ. ოფშორულ ზონაში მოქმედი საგადასახადო შეღავათების საშუალებით წყვილმა 23 ინვესტიციის დაახლოებით 23%-ი დაზოგა.

შაკირა

ფოტო: Reuters

სამოთხის დოკუმენტებში კოლუმბიელი მომღერლის სახელი სრულად არის მითითებული. საცხოვრებელ ადგილად კი მითითებულია ბაჰამის კუნძულები, მაგრამ შაკირა ბარსელონაში ცხოვრობს.

დოკუმენტებიდან ირკვევა, რომ შაკირა არის კომპანია Tournesol Ltd-ს ერთადერთი აქციონერი. კომპანია მალტაში მდებარეობს და მისი კაპიტალი 3 მილიონი ევროა. დოკუმენტებში ნათქვამია, რომ მომღერალი ქონების დიდ ნაწილს ოფშორებში ფლობს.

მომღერლის ადვოკატმა ჟურნალისტებს უთხრა, რომ კომპანია ყველა კანონის დაცვით მუშაობს. კითხვაზე თუ რატომ არის საცხოვრებელ ადგილად ბაჰამის კუნძულებია მითითებული, ადვოკატმა თქვა, რომ შაკირას კარიერის განმავლობაში ბევრ ადგილას უცხოვრია და არც ერთ შემთხვევაში საცხოვრებელ ადგილთან დაკავშირებით კანონი არ დაურღვევია.