რუსთავი 2-ის ინფორმაციით, მათ პატრიარქის დაცვის ყოფილი უფროსის, სოსო ოხანაშვილის ე.წ. ციანიდის საქმის დახურულ სხდომაზე მიცემული ჩვენების ჩანაწერი მოიპოვეს.

ჩანაწერის მიხედვით, სოსო ოხანაშვილი ამბობს, რომ კონკრეტული პირები საპატრიარქოში შესაწყალებელ პატიმართა სიის შედგენაში, გარკვეული თანხის სანაცვლოდ, მონაწილეობდნენ.

რუსთავი 2-ის თქმით, პატრიარქის დაცვის ყოფილი უფროსი სიის შედგენის მონაწილეებად პარლამენტის დეპუტატ ეკა ბესელიას, უფლებადამცველ ნანა კაკაბაძეს, პატრიარქის მდივან-რეფერანტ შორენა თეთრუაშვილსა და საპროკურორო საბჭოს წევრ ირმა ჭკადუას ასახელებს.

ტელეკომპანიამ სასამართლოს დახურული სხდომის ჩვენების ჩანაწერის ნაწილი გაასაჯაროვა:

- შეწყალების კომისია... მოგეხსენებათ არის თეოდორე ჭუაძე. ნაწილობრივ ერეოდა იქ ბესელია, ეს ჭკადუა გადახვევას გავაკეთებ სხვათა შორის - ნანა კაკაბაძე, ეკა ბესელია და ირმა ჭკადუა მამალაძის დაკავების შემდეგ ერთი თვე გამოუსვლელად ისხდნენ იქ, შორენას ოთახში და პატრიარქთან რაღაც თემებს განიხილავდნენ. როცა მამალაძის ოჯახს მხოლოდ ხუთი თვის შემდეგ მისცეს საშუალება მღვდელმთავრებმა, სამწუხაროდ, პატრიარქთან შეხვედრის. ამ შეწყალების კომისიის დროს ვერ გავიხსენებ გვარებს, მაგრამ რამდენიმე პატიმართან მქონდა შეხვედრა და ისეთ მდგომარეობაში იყვნენ ეს პატიმრები... რომლებიც შეიწყალეს საპატრიარქოს სახელით, რომ აქ რაღაც თანხებით ხდებოდა და რაღაც ცუდიც ხდებოდა. ანუ გარკვეულ თანხებს იხდიდნენ გამოყვანაში, გათავისუფლებაში.

- შორენა ცდილობდა? ლობირებდა?

- სია კეთდებოდა, რა თქმა უნდა, თეოდორე, ნანა კაკაბაძე დასხდებოდნენ და სია კეთდებოდა.

- ეს იცოდით თქვენ ამის შესახებ?

- მე 2015-2016-ში გავიგე ამის შესახებ. რამდენიმე პატიმარს ვუთხარი წამოდი და დაგვეხმარე, რომ ეს გამოვავლინოთ. პასუხი იყო ერთი და იგივე: "იცი რა არის? თავისუფალი ვარ და არ ვიცი ახლა. ვიცი, რომ ფული მიიტანეს და თავი დამანებეთ, არ შემიძლია, მე არ მინდა იქ შებრუნება". ამით მთავრდებოდა ეს ყველაფერი.

ჩვენების არც ერთი ადრესატი, ვინც სოსო ოხანაშვილმა კორუფციაში დაადანაშაულა, ბრალდებებს არ აღიარებს. რუსთავის 2-ის ინფორმაციით, ამ თემასთან დაკავშირებით მოკვლევა არ დაწყებულა.

რატომ ითხოვს ირმა ჭკადუა რუსთავი 2-ის ჟურნალისტის დასჯას?

საპროკურორო საბჭოს წევრი, იურისტი ირმა ჭკადუა მოითხოვს, რომ სისხლის სამართლებრივი პასუხისმგებლობა დაიწყოს რუსთავის 2-ის ჟურნალისტის, თამარ ბაღაშვილის მიმართ. როგორც ჭკადუამ აიპრესს განუცხადა, თამარ ბაღაშვილმა მას დაურეკა და კომენტარი სთხოვა ე.წ. ციანიდის დახურულ სხდომაზე პატრიარქის დაცვის ყოფილი უფროსის, სოსო ოხანაშვილის ბრალდებაზე.

ირმა ჭკადუა დარწმუნებულია, რომ ბაღაშვილს არ აქვს უფლება, საჯარო გახადოს დახურული საქმის შესახებ გაგებული დეტალები და ის სწორედ ამიტომ ითხოვს მის დასჯას.

ჟურნალისტური ეთიკის ქარტიის აღმასრულებელი დირექტორი ნატა ძველიშვილი On.ge-სთან საუბარში ამბობს, რომ საქართველოში ინფორმაციის წყარო დაცულია. ძველიშვილი მიიჩნევს, სრულიად წარმოუდგენელია ჟურნალისტისთვის რაიმე პასუხისმგებლობის დაკისრება მოპოვებული ინფორმაციის გამო.

როგორც საქართველოს ახალგაზრდა იურისტთა ასოციაციის იურისტმა, ლევან ვეფხვაძემ On.ge-ს უთხრა, ჟურნალისტს უფლება აქვს, გაასაჯაროოს წყაროს მიერ მიცემული ის ინფორმაცია, რომელიც დახურულ სასამართლო სხდომაზე გავრცელდა. მას პასუხისმგებლობა მხოლოდ იმ დროს შეიძლება დაეკისროს, თუ თავად ჟურნალისტი ესწრებოდა ასეთ სხდომას და ის მოსამართლისგან იყო გაფრთხილებული სხდომის დახურვის შესახებ. თამარ ბაღაშვილის თქმით, მას მსგავსი გაფრთხილება არ მიუღია და წყაროს გამჟღავნებას არ აპირებს.