მერილ სტრიპი - რას გეუბნებათ ეს სახელი?

მოდით, თქვენს ნაცვლად მე ვიტყვი, ამ სახელის გაგონებისას, ძირითადად ყველამ ვიცით, რომ საუბარი ჩვენი დროის ყველაზე ნიჭიერ, გავლენიან და ბრწყინვალე მსახიობზეა საუბარი.

მართალია, დონალდ ტრამპმა ცოტა ხნის წინ სტრიპს ზედმეტად დაფასებული მსახიობი უწოდა, მაგრამ როგორც მერილ სტრიპი იტყოდა, მერე რა? ის ერთადერთი და განუმეორებელია და ეს ყველამ კარგად იცის.

ერთ-ერთ სატელევიზიო ინტერვიუში ბეტ მიდლერს ჟურნალისტმა ჰკითხა, უყურა თუ არა მერილ სტრიპის ახალ ფილმს, რაზეც მსახიობმა თქვა, რომ ნახა და იხუმრა, რომ ძალიან არ მოეწონა, რადგან მერილ სტრიპი მასზე ბევრად უკეთესია, რაზეც წამყვანისგან ცოტა ხისტი პასუხიც მიიღო - "არაუშავს, ნუ იდარდებ ამაზე, ის ყველას გჯობნით".

ასეა თუ ისე, მერილ სტრიპი დღესდღეობით ყველაზე ტიტულოვანი მსახიობია - სამი ოსკარით (ოცი ნომინაცია), ოქროს გლობუსებით, ემით, ბაფტათი და ა. შ. მოკლედ რომ ვთქვათ, ის თუ ჯილდოები ნამდვილად ოქროსია, მერილ სტრიპი მსოფლიოში ყველაზე მდიდარი ადამიანი იქნება თუ მათ გადაადნობს.

თქვენი აზრით, ამდენი ჯილდოს მიუხედავად, აქვს თუ არა მერილ სტრიპს ცუდ ფილმში მონაწილეობა მიღებული? პასუხი ერთია - რა თქმა უნდა, მგონი არც ერთი მსახიობი დედამიწაზე არ მოიძებნება, რომელსაც ცუდ ფილმში არ მიუღია მონაწილეობა, გამონაკლისი არც მერილ სტრიპია.

მოდით, თვალი გადავავლოთ მის კარიერას და ამოვარჩიოთ ის ცუდი ფილმები, სადაც სტრიპი მონაწილეობას ან კარგი ჰონორარის გამო დათანხმდა, ან მეგობრებს არ გაუტეხა ან კიდევ ცუდ რჩევებს დაუჯერა.

She-Devil

ალბათ არ გაგიკვირდებათ თუ ვიტყვი, რომ ამ ფილმში შესრულებული როლით მერილ სტრიპმა ოქროს გლობუსის ნომინაცია მიიღო, მაგრამ ვიყოთ გულახდილები და ვთქვათ, რის გამო შეიძლებოდა, რომ სტრიპი მწერალ მერი ფიშერის როლს დათანხმებოდა? ფულის? მეგობარმა სთხოვა? ღმერთმა უწყის რა მოხდა სინამდვილეში. სტრიპი ცდილობს რომანტიკული და ელეგანტური მწერლის თამაშს, მაგრამ საბოლოო ჯამში ვიღებთ უმარილო, უსახურ ფილმს, რომელიც დიდი ალბათობით მერილ სტრიპსაც სძულს.

Dark Matter

შეიძლება ითქვას, რომ ამ ფილმში სტრიპი თავისი აქამდე ცნობილი როლებისგან განსხვავებულ ამპლუაში გვევლინება. შესაძლოა, სწორედ ამის ბრალია, რომ ფილმზე პრესაში სულ რამდენიმე რეცენზია დაიწერა და უარესი - მერილ სტრიპს არც ერთი ნომინაცია მიუღია. წარმოგიდგენიათ? სწორედ ამიტომ, ხშირად ზუსტად ამ ფილმს ასახელებენ მერილ სტრიპის ყველაზე დაუფასებელ როლად.

Rendition

რიზ უიზერსპუნი, ჯეიკ ჯილენჰოლი, ალან არკინი და მერილ სტრიპი - წესით ეს შემადგენლობა სრულიად საკმარისი უნდა ყოფილიყო იმისათვის, რომ ფილმი ბოქს ოფისების ლიდერი გამხდარიყო, მაგრამ ვერ მოგართვით. ფილმი ჩავარდა, თან ისე რომ გადაღებების დროს დახარჯული თანხაც კი ვერ ამოიღო, გულწრფელად ვთქვათ, რამდენს გვაქვს ეს ფილმი ნანახი?

Into the Woods

ამ ფილმის წყალობით მერილ სტრიპმა ოსკარის კიდევ ერთი ნომინაცია ჩაიწერა თვის ანგარიშზე, ძირითადად ეს გრიმის დამსახურება იყო, აბა ის სამი წუთი რაც ფილმში ჩანდა არაფერი განსაკუთრებული არ გაუკეთებია, იმის გარდა რომ ზუსტად ისე დიდებულად თამაშობს როგორც სხვა ფილმებში. ამასთანავე, მიუხედავად იმისა, რომ ფილმში ნამდვილი ვარსკვლავთცვენაა, ნამდვილად ვერ ვიტყვით, რომ ამ ფილმში თამაშმა მერილს რამე განსაკუთრებული მოუტანა, გარდა რამდენიმე მილიონი დოლარისა.

Ricki and the Flash

ამ ფილმში მერილ სტრიპის გარდა სხვა მსახიობს რომ ეთამაშა, ვერ იტყოდი, რომ ცუდი ფილმია, პრინციპში ვერც ახლა იტყვი, მაგრამ როდესაც სტრიპის კარიერას იცნობ და ერთ დღეს მის ფილმოგრაფიაში 50 წელს გადაცილებული როკერის როლი გხვდება პირველი განცდა, რაც გიჩნდება, აღფრთოვანებაა და ფიქრობ, ღმერთო, რა მაგარი ქალია ეს მერილი. შემდეგ უყურებ ფილმს და ამბობ - ბლაჰ, მაგრად ითამაშა, მაგრამ ეგ ხო აღარ გვიკვირს? ფილმისგან კი ვერანაირ ემოციას ვერ იღებ.

ასეა თუ ისე, ყველა ზემოთ ჩამოთვლი, არ ჩამოთვლილ და სამომავლო ფილმებში ერთდერთი რაც ზუსტად შეგვიძლია ვთქვათ არის ის, რომ მერილ სტრიპი ნამდვილად დიდებული მსახიობია იქნება ეს ცუდი, ძალიან ცუდი თუ იდეალური ფილმი და როგორც კემერონ ტაკერი იტყოდა, მერილ სტრიპი ბეტმენის როლსაც კი არაჩვეულებრივად შეასრულებს.