გასულ წელს Netflix-ის ახალი სერიალის, Monster: The Jeffrey Dahmer Story-ის (მონსტრი: ჯეფრი დამერის ამბავი) პრემიერა შედგა. სერიალში მთავარ როლს ევან პიტერსი ასრულებს, რომელმაც ახლახან ჯეფრი დამერის განსახიერებისთვის ოქროს გლობუსი მიიღო. სერიალი ამერიკის ერთ-ერთ ყველაზე ცნობილ სერიულ მკვლელზე მოგვითხრობს. დამერმა 1978 წლიდან მოყოლებული შემდეგი 13 წლის განმავლობაში 17 კაცი და ბიჭი გააუპატიურა, მოკლა და დაანაწევრა. ის საბოლოოდ 1991 წელს დააკავეს და უვადო პატიმრობა 15-ჯერ მიუსაჯეს.

სერიალი მოკლე დროში უამრავმა მაყურებელმა ნახა და პოპულარობაც მალევე მოიპოვა. ჯეფრი დამერის მსხვერპლების ოჯახის წევრებმა სერიალი უკვე არაერთხელ გააკრიტიკეს. "ამ ყველაფერს ტრავმის თავიდან და თავიდან გადატანა ახლავს და რისთვის? რამდენი ფილმი, შოუ ან დოკუმენტური ფილმი გვჭირდება?", — აცხადებს ჯეფრი დამერის ერთ-ერთი მსხვერპლის ნათესავი, ერიკ პერი.

ფოტო: Netflix

"მინდა, მადლობა გადავუხადო ჩემს ოჯახს, მეგობრებსა და ახლობლებს, რომლებიც მძიმე დროს გვერდში დამიდგენენ და ეს ყველაფერი ბოლომდე მიმაყვანინეს. რაც მთავარია, მადლობა ყველას, ვინც ამ შოუს უყურა. ეს ყველაფერი ძნელი გადასაღები და რთული საყურებელი იყო. გულწრფელად ვიმედოვნებ, რომ მნიშვნელოვან შედეგს მივაღწიეთ", — განაცხადა ევან პიტერსმა ოქროს გლობუსის დაჯილდოებაზე.

პიტერსის სიტყვას სოციალურ ქსელებში უარყოფითი გამოხმაურება მოჰყვა, რასაც დამერის ერთ-ერთი მსხვერპლის დედა, შირლი ჰიუზიც დაეთანხმა. ჰიუზის თქმით, პიტერსს დამერის მსხვერპლთა ოჯახები ერთხელ მაინც უნდა ეხსენებინა, რადგან ისინი ამ ყველაფრის გამო დღემდე იტანჯებიან.

"სამყაროში უამრავი ავადმყოფია და ის ფაქტი, რომ მსახიობები სერიული მკვლელის როლის თამაშისთვის ჯილდოებს იღებენ, ავადმყოფების თავდაჯერებას კიდევ უფრო ზრდის. სირცხვილია, რომ ადამიანები ჩვენი ტრაგედიით ფულს შოულობენ. მსხვერპლთა ოჯახებს ერთი ცენტიც არ მიუღიათ და ჩვენ ამ ემოციებს ყოველდღე თავიდან განვიცდით", — განაცხადა შირლიმ.

ფოტო: Getty Images

დამერის მსხვერპლის ნათესავმა ერიკ პერიმ აქამდეც აღნიშნა, რომ რადგან დამერისა და მსხვერპლთა ოჯახების სასამართლო პროცესების საჯარო ჩანაწერები არსებობს, შოუს პროდიუსერებს იმ ადამიანებისგან ნებართვა არც აუღიათ, რომელთა შესახებაც სერიალი გვიყვება. "შოუს შემქმნელები აცხადებენ, რომ ამ ყველაფერს მსხვერპლთა ოჯახის პატივისცემით აკეთებენ, თუმცა ჩემს ბიძაშვილს არავინ დაჰკავშირებია და შოუს გადაღების შესახებ სხვა მაყურებელთან ერთად გაიგო. ეს სისასტიკეა", — აცხადებს ერიკ პერი.

შოუს პროდიუსერების თქმით, მათი პროექტის მიზანი მსხვერპლთა პერსპექტივის ჩვენებაა. "10 ეპიზოდის განმავლობაში ყურადღების ცენტრში ექცევა დამერის მსხვერპლებისა და იმ ხალხის ჯერ კიდევ უთქმელი ისტორიები, ვინც მისი შეჩერება სცადა, ასევე იმ სისტემური მარცხის ამბავი, რომელმაც მას საშუალება მისცა მთელი ათწლეულის განმავლობაში გაეგრძელებინა მკვლელობების სერია," — ვკითხულობთ სერიალის აღწერაში.