The Wall Street Journal-ის ცნობით, ინვესტორები Tesla-ს აღმასრულებელ დირექტორზე, ილონ მასკზე, გაბრაზებულები არიან, რადგან თვლიან, რომ მან კომპანია მიმდინარე კრიზისში მიატოვა.

"დღეს Tesla-ს აღმასრულებელი დირექტორი არ ჰყავს", — დატვიტა გერი ბლექმა, რომელიც კომპანიის 50 მილიონი დოლარის ღირებულების აქციებს ფლობს.

კოშმარული კვირის შემდეგ, ახალი კვირა კიდევ უფრო მძიმედ დაიწყო, რადგან ორშაბათს, 12 დეკემბერს Tesla-ს აქციების ფასი 6%-ზე მეტით დაეცა. 2022 წელს კომპანიის ღირებულება განახევრდა.

ამერიკელი მილიარდერი კი თავისი დროის უდიდეს ნაწილს Twitter-ის სათაო ოფისში ატარებს, რათა სოციალური ქსელის კრიზისს რამე მოუხერხოს და გადახდილი ათეულობით მილიარდი წყალში არ ჩაიყაროს.

ასევე იხილეთ: საგა დასრულდა — მასკმა Twitter შეიძინა და წმენდა დაიწყო

ინვესტორების თქმით, Twitter-ის ირგვლივ არსებული გაუგებრობა Tesla-ს რეპუტაციას სერიოზულ ზიანს აყენებს. გასულ კვირას მასკმა, რომელმაც უკვე Tesla-ს 19 მილიარდი დოლარის ღირებულების აქციები გაყიდა, სოციალური ქსელი ტრანსფობიური ხუმრობების გამოსაქვეყნებლად, კომპანიის ყოფილი აღმასრულებლების გასალანძღად და კოვიდის შესახებ დეზინფორმაციის გასავრცელებლად გამოიყენა.

შესაბამისად, გასაგებია, რომ Tesla-ს ინვესტორები მასკის ქცევით მოხიბლულები არ არიან და ავტომწარმოებელი კომპანიის ინტერესების უგულებელყოფაში ადანაშაულებენ.

ბლექი არ არის ერთადერთი ინვესტორი, რომელმაც აღმასრულებელი დირექტორის წინააღმდეგ ხმა აიმაღლა:

"Tesla-ს პრობლემა საერთოდ არ აქვს, გარდა იმისა, რომ მისი აღმასრულებელი დირექტორი სხვა კომპანიაში მუშაობს. ეს კომპანია ნამდვილად იმსახურებს უფრო ფოკუსირებულ დირექტორს. სასარგებლო იქნებოდა იმის ცოდნა, თუ რა გეგმები აქვს ილონს", — დაწერა Twitter-ზე ინვესტორმა როს გერბერმა.

მიუხედავად ყველაფრისა, მასკი ამბობს, რომ Tesla-სა და SpaceX-ს უყურადღებოდ არ ტოვებს, თუმცა ამ კომპანიების მმართველი გუნდები იმდენად კომპეტენტურები არიან, რომ მას ჩარევა ხშირად არ უწევს.

თუ სტატიაში განხილული თემა და ტექნოლოგიების სფერო შენთვის საინტერესოა, შემოგვიერთდი ჯგუფში, სადაც ვლაპარაკობთ ტექნოლოგიებზე.