ზელენსკის თქმით, პოლონეთში რაკეტის ჩამოვარდნის საქმის გამოძიებაში უკრაინელი სპეციალისტები მონაწილეობას მიიღებენ

ამის შესახებ უკრაინის პრეზიდენტმა, ვოლოდიმირ ზელენსკიმ Bloomberg New Economy Forum-ზე ისაუბრა.

რატომ არის მნიშვნელოვანი: პოლონეთის საგარეო საქმეთა სამინისტრომ 15 ნოემბერს განაცხადა, რომ რუსული წარმოების რაკეტა მათ ტერიტორიაზე, უკრაინის საზღვართან ჩამოვარდა, რის შედეგადაც ორი ადამიანი დაიღუპა.

პოლონეთის პრეზიდენტმა, ანდჟეი დუდამ 16 ნოემბერს კი თქვა, რომ ჩამოვარდნილი რაკეტები, სავარაუდოდ, უკრაინის თავდაცვას უკავშირდება;
NATO-ს გენერალური მდივნის, იენს სტოლტენბერგის განცხადებით, პოლონეთში რაკეტების ჩამოვარდნაზე საბოლოო პასუხისმგებლობა რუსეთს ეკისრება.

დეტალები: უკრაინულმა მხარემ გამოძიებაში ჩართვა გუშინ, 16 ნოემბერს მოითხოვა.

მოთხოვნას პოლონეთის პრეზიდენტმა უპასუხა და აღნიშნა, რომ გამოძიებაში უკრაინის ჩართვას, როგორც პოლონეთის, ასევე აშშ-ს ერთობლივი თანხმობა დასჭირდება.
"პროცესებს აწარმოებენ პოლონელი და ამერიკელი ექსპერტები და თუ ვინმეს სურს, მონაწილეობა მიიღოს ამ პროცესებში, მინიმუმ, ორივე მხარის თანხმობა დასჭირდება“, — განაცხადა ანდჟეი დუდამ პრესკონფერენციაზე.

ზელენსკის განცხადებით, გამოძიების დასრულებამდე, ზუსტად ვერ იტყვის, რომელი რაკეტები ან მათი ნაწილები ჩამოვარდა პოლონეთის ტერიტორიაზე, მაგრამ აღნიშნა, რომ ნახეს კრატერის დიამეტრის სურათები — "არ იყოს მხოლოდ რაკეტსაწინააღმდეგო სისტემების ნარჩენები".

მისი განცხადებით, მსოფლიოს უნდა ესმოდეს, რომ იმ დღეს რუსეთმა 100-მდე რაკეტა გაისროლა უკრაინის ტერიტორიაზე. თქვა ისიც, რომ ეს არ არის პირველი შემთხვევა, როდესაც ოკუპანტების რაკეტის ნაწილი სხვა ქვეყანაში ჩამოვარდა.
"არ ვიცი, რა მოხდა ამჯერად, ჩვენ 100% არ ვიცით, ვფიქრობ, არც მსოფლიომ იცის 100%-ით, მაგრამ დარწმუნებული ვარ, რომ რუსული რაკეტა იყო. ჩვენ გამოვიყენეთ საჰაერო თავდაცვის რაკეტები";
"ჩვენ უნდა ვიყოთ სამართლიანები და პატიოსნები, სანამ გამოძიება არ დასრულდება, ვერ ვიტყვით, რა ტიპის რაკეტა ჩამოვარდა პოლონეთის ტერიტორიაზე", — განაცხადა ზელენსკიმ.

პოლონეთი: ოფიციალური პირის თქმით, ნატოს, შეერთებული შტატებისა და პოლონეთის მიერ შეგროვებული ყველა მტკიცებულება მიუთითებს იმაზე, რომ რაკეტა, რომლითაც პოლონეთში ორი ადამიანი დაიღუპა, უკრაინელმა ძალებმა გაისროლეს.