კრემლში პუტინმა ხელი მოაწერა ბრძანებას, რომლითაც დონეცკის, ლუგანსკისა, ხერსონისა და ზაპოროჟიეს ოლქები რუსეთს "მიუერთა".

დეტალები: პუტინმა იკადრა და ამ ცერემონიიდანაც მოუწოდა უკრაინას დაუყოვნებლივ შეწყვიტოს ცეცხლი და დაბრუნდეს მოლაპარაკების მაგიდასთან. თუმცა მისი თქმით, დონეცკის, ლუგანსკის, ხერსონის და ზაპოროჟიეს ხალხის არჩევანი უკვე გაკეთებულია და "რუსეთი მას არ უღალატებს".

  • მისივე თქმით, კიევის ხელმძღვანელობამ მოსახლეობის "თავისუფალი ნების გამოხატვას პატივი უნდა სცეს და მხოლოდ ასეთი შეიძლება იყოს მშვიდობა".
  • "მინდა, რომ კიევის ხელისუფლებამ და მათმა მფლობელებმა მომისმინონ. DNR-ში, LNR-ში, ხერსონსა და ზაპოროჟიეში მცხოვრები ხალხი ჩვენი მოქალაქეები ხდებიან. სამუდამოდ", — განაცხადა პუტინმა.
  • "მათ გააკეთეს არჩევანი იყვნენ თავის ხალხთან ერთად, იყვნენ სამშობლოსთან, იცხოვრონ მისი ბედით, ჩვენს უკან სიმართლეა, ჩვენს უკან რუსეთია", — თქვა პუტინმა რის შემდეგაც ე.წ. ხელმძღვანელებთან ერთად ხელი მოაწერა დოკუმენტს.

პროცედურები: ახლა რუსეთის სახელმწიფო დუმამ უნდა მოახდინოს შეთანხმების რატიფიცირება, რის შემდეგაც ფედერაციის საბჭომ უნდა დაამტკიცოს.

  • ბოლო ეტაპი გულისხმობს ვლადიმერ პუტინის მიერ შესაბამის კანონზე ხელმოწერას.

ფოტო: კადრი ვიდეოდან

რატომ არის მნიშვნელოვანი: ამ გადაწყვეტილებით პუტინმა კიდევ ერთხელ უხეშად დაარღვია სხვა ქვეყნის ტერიტორიული მთლიანობა და სუვერენიტეტი.

  • ოკუპანტი ქვეყანა ცდილობს ეს ყველაფერი ხალხის ნებად შეფუთოს და "რეფერენდუმით" გაამართლოს.
  • უკრაინაში ე.წ. რეფერენდუმები კრემლის მარიონეტულმა ძალებმა 28 სექტემბერს ჩაატარეს და ამტკიცებენ, თითქოს ოკუპირებულ დონეცკში, ლუგანსკსა და ზაპოროჟიეში რუსეთთან შეერთების მომხრე 98% იყო, ხერსონში კი 97%.
  • ამის შემდეგ კრემლის მართულმა ხელმძღვანელებმა პუტინს ოფიციალურად მიმართეს და "ხალხის სურვილის" საფუძველზე რუსეთთან მიერთება "თხოვეს".

კრემლში ამბობენ, რომ უკრაინის ოკუპირებული ტერიტორიები "რუსეთის ფედერაციის განუყოფელი ნაწილი და სუვერენული ტერიტორია გახდება", ამიტომ ამ ტერიტორიებზე დარტყმას რუსეთის წინააღმდეგ აგრესიის აქტად განიხილავენ და შესაბამისი პასუხი ექნებათ.

  • რაც შეეხება დონბასის იმ ნაწილს, რომელიც ჯერ კიდევ არ აქვთ ოკუპირებული, აცხადებენ, რომ მის "გასათავისუფლებლად ოპერაცია გაგრძელდება".

რეფერენდუმის შედეგებს არ აღიარებს არც უკრაინა და არც საერთაშორისო საზოგადოება.

  • NATO-მ 23 სექტემბერს განაცხადა, რომ დონეცკის, ლუგანსკის, ზაპოროჟიესა და ხერსონის ოლქებში რუსეთს რეფერენდუმის ჩატარებას ლეგიტიმაცია არ აქვს და ეს გაეროს წესდების აშკარა დარღვევაა.
  • "რეფერენდუმები" დაგმო ევროკავშირმაც — საგარეო პოლიტიკისა და უსაფრთხოების საკითხებში ევროკავშირის უმაღლესმა კომისარმა ჯოზეფ ბორელმა განაცხადა, რომ ადამიანის უფლებების სისტემური შეურაცხყოფების ფონზე, ეს უკრაინის სუვერენიტეტისა და ტერიტორიული მთლიანობის კიდევ ერთი დარღვევაა;
  • ეს დაგმო საქართველოს საგარეო საქმეთა სამინისტრომაც — უწყებამ "რეფერენდუმებს" უკანონო, ხოლო უკრაინის ტერიტორიების ანექსიის მცდელობებს მიუღებელი უწოდა.

კონტექსტი: ანალოგიური ცერემონია 2014 წელს გაიმართა, როდესაც რუსეთმა ყირიმის და სევასტოპოლის ანექსია მოახდინა.

  • მაშინაც პუტინმა თავისია აგრესია და სუვერენიტეტის დარღვევა ხალხის ნებით და "რეფერენდუმით" გამაართლა, რომლის შედეგები ოკუპანტი ქვეყნის გარდა არავის უღიარებია.
  • უკრაინა ამ ტერიტორიებს დროებით ოკუპირებულს უწოდებს და აცხადებს, რომ აუცილებლად დაიბრუნებს.