სიდნი სვინის თქმით, იმდენს არ უხდიან, რომ 6 თვით შეისვენოს

24 წლის სიდნი სვინი ჰოლივუდის ერთ-ერთი ახალი და წარმატებული სახეა, რომელმაც პოპულარულობა სერიალ ეიფორიაში შესრულებული როლით მოიპოვა. ცოტა ხნის წინ სიდნიმ ინტერვიუ გამოცემა The Hollywood Reporter-ს მისცა, სადაც განაცხადა, რომ საკმარისად კარგად არ უხდიან, რის გამოც მსახიობობისგან 6 თვით შესვენება არ შეუძლია.

"6-თვიანი შესვენება რომ მომინდეს, არ მაქვს ამისთვის საკმარისი შემოსავალი. არ მყავს ადამიაი, რომელიც დამეხმარება, არ მყავს არავინ, ვისთანაც მივალ, ვინც გადასახადებს გადამიხდის ან დამეხმარება", — განაცხადა სიდნიმ.

სიდნის თქმით, ახალგაზრდა ვარსკვლავებს ძალიან ბევრი ხარჯი აქვთ — ადვოკატების, აგენტების, მენეჯერებისა და წარმომადგენლებისთვის გადასახდელი თანხები. წარმატების მისაღწევად მან ეს ყველაფერი უნდა გაიღოს, თუმცა, მისი თქმით, მსახიობებს ისე აღარ უხდიან, როგორც ადრე.

სიდნიმ ისიც აღნიშნა, რომ ფინანსური პრობლემების გადასაჭრელად უამრავ ბრენდთან უწევს თანამშრომლობა. სიდნის ოჯახის შექმნაც უნდა, თუმცა თვლის, რომ ფინანსურად სტაბილური არაა:

"მინდა, ოჯახი მქონდეს. ყოველთვის მინდოდა, ახალგაზრდა დედა ვყოფილიყავი, მაგრამ ვღელავ, რომ ინდუსტრია სტიგმებითაა სავსე იმ ახალგაზრდა ქალების მიმართ, რომელთაც შვილები ჰყავთ — მათ განსხვავებულად უყურებენ. მეშინია, რომ თუ არ ვიმუშავებ, ფული არ მექნება და შვილებს მხარდაჭერას ვერ აღმოვუჩენ", — განაცხადა სიდნიმ.

ფინანსურ არასტაბილურობაზე საუბრის გამო სიდნი უამრავმა ადამიანმა გააკრიტიკა. მათი თქმით, მსახიობი რეალობასაა მოწყვეტილი და 6-თვიანი შვებულების აღების ფუფუნება არავის აქვს.