"30 წელია ამერიკის შეერთებული შტატები მხარს უჭერს საქართველოს სასამართლოს პროგრამებით, რომელიც მიმართულია მისი დამოუკიდებლობისა და შესაძლებლობების გაძლიერებაზე", — ასე ეხმიანება აშშ-ის საელჩო ბოლო დღეებში განვითარებულ მოვლენებს. კერძოდ, დისკუსიას ნიკა გვარამიას საქმის მოსამართლის საელჩოს პროგრამიდან სავარაუდო ჩახსნის შესახებ.

საელჩო კონკრეტულად ამ საკითხზე კომენტარს არ აკეთებს და განმარტავს, რომ მათი არაპარტიული, აპოლიტიკური დახმარება ხორციელდება მიუხედავად იმისა, თუ რომელი პარტია არის ხელისუფლებაში.

აქვე ისინი პასუხობენ ქართული ოცნების თავმდჯომარის, ირაკლი კობახიძის განცხადებას იმაზე, რომ "რადიკალურმა ოპოზიციამ საელჩოს დისკრიმინაციაში, სასამართლოს დამოუკიდებლობის ხელყოფასა და არაფორმალურ მმართველობის მცდელობაში დასდო ბრალი". კობახიძე თქმით, ეს ქმედება სისხლის სამართლის კოდექსის 364-ე მუხლის მეორე ნაწილით გათვალისწინებული დანაშაულია. ის ამბობდა, რომ "ამ სპეკულაციებს საელჩოს ერთი მცირე განცხადება მარტივად დაასრულებდა".

"დარწმუნებული ვართ, რომ ჩვენი ძალისხმევა თანხვედრაშია როგორც საქართველოს, ისე ამერიკის კანონმდებლობასთან", — ნათქვამია საელჩოს მიერ მედიისთვის მიწოდებულ კომენტარში.

20 მაისს რამდენიმე მედიამ წყაროებზე დაყრდნობით გაავრცელა ინფორმაცია, რომ მოსამართლე ლაშა ჩხიკვაძე, რომელმაც ნიკა გვარამიას საქმეზე გადაწყვეტილება გამოაცხადა, საელჩომ ამოაგდო პროგრამიდან, რომლის ფარგლებშიც კვალიფიკაციის ასამაღლებლად აშშ-ში მიდიოდა. ჩვენი ინფორმაციით, ეს საკითხი მედიების წარმომადგენლებმა ელჩ კელი დეგნანთან შეხვედრისას განიხილეს. თუმცა, უცნობია, უკავშირდება თუ არა გადაწყვეტილება ამას. საელჩოს განმარტება არ გაუვრცელებია. იმავე დღეს On.ge ჩხიკვაძეს დაუკავშირდა, თუმცა მოსამართლემ განაცხადა, რომ კომენტარს არ აკეთებს.

გუშინ, 24 მაისს ირაკლი კობახიძემ საელჩოს ამ თემაზე განცხადების გამოქვეყნება "სთხოვა". მანვე, აღნიშნა, რომ თუ საელჩო ამას არ გააკეთებდა, საზოგადოებას ექნებოდა უფლება ეფიქრა, რომ "საუბრები მოსამართლის დისკრიმინაციის შესახებ რადიკალური ოპოზიციის მორიგი დემაგოგია და სპეკულაციაა".

კობახიძემ იგივე გაიმეორა დღესაც. მისი თქმით, საელჩოს დუმილი მათ პოზიციაზე თანხმობის ნიშანია. როგორ მან აღნიშნა, ამით დადასტურა, რომ "ბრალდებები", რომლებსაც ოპოზიცია საელჩოს უყენებდა, იყო "ცარიელი სპეკულაცია და სრული დემაგოგია".


16 მაისს ლაშა ჩხიკვაძემ ნიკა გვარამიას 3 წლითა და 6 თვით პატიმრობა მიუსაჯა და დაუყოვნებლივ დაკავების ბრძანება გასცა. ადგილობრივი ავტორიტეტული არასამთავრობო ორგანიზაციების განცხადებით, ნიკა გვარამიას მიმართ გამოტანილი განაჩენი უკანონო და პოლიტიკურად მოტივირებულია და კრიტიკულ მედიაზე ზეწოლის კიდევ ერთი პრეცედენტია. სახალხო დამცველიც აცხადებს, რომ განაჩენი კანონთან შეუსაბამოა და ემსახურება კრიტიკულ მედიასაშუალებებზე ისეთ ზეწოლას, როგორიც დემოკრატიულ სახელმწიფოში არ ხდება.